نازاربايەۆ: ستۋدەنتتەر ءۇشىن قوسىمشا 20 مىڭ گرانت ءبولىنىپ، 75 مىڭ ورىندىق جاتاقحانا سالىنادى
2018-2019 وقۋ جىلىندا ستۋدەنتتەرگە قوسىمشا 20 مىڭ گرانت بولىنەتىن بولدى. مەملەكەت باسشىسى نۇرسۇلتان نازاربايەۆ بۇل جۇمىستى ق ر پارلامەنتى پالاتالارىنىڭ بىرلەسكەن وتىرىسىندا بەلگىلەنگەن بەس الەۋمەتتىك باستامانىڭ ءبىرى ەكەنىن اتادى.
«بۇگىنگى تاڭدا ەلىمىزدەگى جوو-لاردا 530 مىڭعا جۋىق جاس ورەن ءبىلىم الىپ جاتىر. ولاردىڭ ىشىندەگى 30 پايىزى مەملەكەت بولگەن گرانت بويىنشا وقۋدا. جوعارى ءبىلىم بەرۋدى قولجەتىمدى ءارى ساپالى ەتۋ ءۇشىن كەلەسى شارالاردى ۇسىنامىز. 2018-2019 وقۋ جىلىندا جىل سايىن بولىنەتىن 54 مىڭ گرانتقا قوسىمشا تاعى 20 مىڭ گرانت بولگەلى وتىرمىز. ول گرانتتاردىڭ ىشىندەگى 11 مىڭىن، مۇمكىندىك بولسا ودان دا كوبىن سۇرانىس بار تەحنيكالىق ماماندىقتار بويىنشا باكالاۆرعا ءبولۋ جوسپارلانۋدا. بۇل قادام ءتورتىنشى ونەركاسىپتىك ريەۆوليۋسيا جاعدايىندا جاڭا ەكونوميكادا سۇرانىسقا يە بولاتىن مىڭداعان مامانداردى دايارلاۋعا مۇمكىندىك بەرەدى. بۇل جەردە ينجەنەرلەر، اقپاراتتىق تەحنولوگيالار سالاسى مەن روبوتوتەحنيكا، نانوتەحنولوگيا سالاسىنداعى ماماندار تۋرالى ايتىپ وتىرمىن. بۇل دا مەملەكەتتىڭ جاستارعا قولداۋى بولىپ تابىلادى»، - دەدى مەملەكەت باسشىسى.
نۇرسۇلتان نازاربايەۆتىڭ ايتۋىنشا، بارلىق جوو-لاردا تەحنيكالىق، اۋىل شارۋاشىلىعى ماماندىقتارى بويىنشا ۇلتتىق جوو-لار دەڭگەيىندە جاڭا گرانتتاردىڭ قۇنىن وسىرگەن ءجون.
«بۇل شارالار جوعارى ءبىلىم بەرۋمەن ورتا مەكتەپتەردىڭ وقۋشىلارىن كوبىرەك قامتۋعا جول اشادى. بۇل - ادامي كاپيتالعا، دەمەك بىلىمگە سالىنعان سالىم. ەكىنشى جاعىنان، الەمدىك ستاندارتتار بويىنشا ءبىلىم جۇيەسىن جاساي وتىرىپ، ستۋدەنتتەردىڭ ءومىر ءسۇرۋى جاعدايىنا باسا ماڭىز بەرۋىمىز كەرەك. قالالىق ەمەس جاستاردىڭ ءبىر پاراسى قالا شەتىنەن باسپانا جالداۋعا ءماجبۇر ەكەنىن بىلەسىزدەر. ونداي جاعدايدا ساپالى ءبىلىم جايلى قالاي ايتۋعا بولادى. بۇگىنگى تاڭدا جوو-لار مەن كوللەدجدەردىڭ ستۋدەنتتەرىن جاتاقحانامەن قامتۋ ماسەلەسى وتكىر بولىپ وتىر. وسى ماسەلەنى شەشۋ ءۇشىن مەملەكەتتىك-جەكەشەلىك ارىپتەستىك اياسىندا جاتاقحانا تۇرعىزۋ قولعا الىنادى. مەملەكەت ءوز تاراپىنان بعم (ق ر ءبىلىم جانە عىلىم مينيسترلىگى - اۆت.) ارقىلى ينۆەستيسيالاردىڭ ءبىر بولىگىن جاتاقحانا قۇرىلىسىنا جۇمساۋعا كەپىلدىك بەرەدى. 2022 جىلعا دەيىن 75 مىڭ ورىندىق ستۋدەنتتىك جاتاقحانا سالۋدى تاپسىرامىن»، - دەدى نۇرسۇلتان نازاربايەۆ.
ەسكە سالا كەتسەك، قازىرگى ۋاقىتتا ق ر پارلامەنتى پالاتالارىنىڭ بىرلەسكەن وتىرىسى وتكىزىلىپ جاتىر.
قازاقپارات
You Might Also Like
-
ەكونوميكاداعى جانە ونەركاسىپتەگى تىڭشىلىقتىڭ پايدا بولۋ تاريxى تەرەڭدە جاتىر. شىركەۋ قىزمەتشىسى فرانسۋا كساۆەنىڭ جۇمىستارى ونەركاسىپتەگى تىڭشىلىقتىڭ العاشقى جەتىستىكتەرى بولدى. ول 1712 جىلى جۇڭگو ...
