InfoHub Logo

«ۆاۆيلونداعى ەڭ باي ادام» كىتابىنىڭ اۆتورى دجوردج سامۋەل كلەيسون بىردە: «ادامنىڭ بايلىعى ونىڭ ءاميانىنداعى تەڭگەنىڭ سانىمەن ولشەنبەيدى»، — دەگەن ەكەن. بايلىق ونىڭ اكەلگەن تابىسىمەن ايقىندالادى. ال تابىس ءاميانىڭىزعا ۇزدىكسىز قۇيىلىپ وتىراتىن جانە ونى تومپايتاتىن التىن اعىنى سياقتى. ءاربىر ادام وسىعان ۇمتىلادى. تابىس ءسىزدىڭ جۇمىس ىستەيتىنىڭىزگە نەمەسە ساياحاتتايتىنىڭىزعا قاراماستان كوبەيۋى كەرەك.

قىسقاشا مازمۇنى

كلەيسوننىڭ بۇل كىتابى الەمنىڭ كوپتەگەن تىلدەرىنە ونداعان جىلدار بويى تۇراقتى تۇردە اۋدارىلىپ باسىلىپ كەلەدى. قازاق تىلىنە سەرىك ابدىرەش ۇلى ەرعالي اۋداردى. بۇكىلالەمدىك بۇل بەستسەللەردىڭ وراسان تانىمالدىعى كىتاپتا ەجەلگى ءارى سىناقتان وتكەن بايلىق ەرەجەلەرىنىڭ جازىلعاندىعى. بۇل كىتاپتى ءاربىر ميلليونەر وقىعان كىتاپ دەپ تە اتايدى. بۇل كىتاپ قارجىڭىزدى جوسپارلاۋدى، ءوز تابىسىڭىزدى ساقتاۋدى ءارى ەسەلەۋدى ۇيرەتەدى. مۇنى بايلىق الىپبەسى دەسە دە بولادى. بۇعان دەيىن بۇل ەڭبەك ءجۇز مىڭداعان ادامدارعا قارجىلاي تاۋەلسىز بولۋعا جاردەمدەستى. ءسىز دە وقىپ سولاردىڭ قاتارىنا قوسىلا الاسىز. ءبىز سىزدەرگە وسى كىتاپتان ەڭ ماڭىزدى جەرلەرىن جيناقتاپ، قىسقارتىپ ۇسىنىپ وتىرمىز.

قابىسقان ءامياندى تولتىرۋدىڭ جەتى داۋاسى:

ءبىرىنشى داۋاسى — تاپقان اقشانىڭ ءبىر بولىگى عانا ساعان تيەسىلى (ءاميان تولتىرۋدى باستا)

ءاميانعا تۇسەتىن ءاربىر ون تەڭگەنىڭ توعىزىن عانا ءوز قاجەتتەرىڭە جۇمساڭدار. جۇمسالۋعا ءتيىس ون اقشانىڭ ورنىنا توعىزىن عانا شىعىنداعانىمىزدا، ول بايعۇس قامپيا باستادى. سەندەردىڭ ءامياندارىڭ دا سونى باستان وتكىزەدى ءالى!

...بايلىققا بارار جولعا، تاپقان اقشامىزدىڭ ءبىر بولىگىن وزىمىزگە تيەسىلى بولعاندا عانا تۇسەمىز. ول سەنىڭ دە قولىڭنان كەلەدى.

سەن تاپقان اقشانىڭ ءبىر بولىگى عانا ساعان تيەسىلى. بۇل بولىك تابىس مولشەرىنە قاراماستان، كەمىندە وننان ءبىر بولىگىن قۇراۋى كەرەك. ارينە، ودان دا كوپ بولىگىن وزىڭە ارناۋعا بولادى، ەگەر دە سەنىڭ جاعدايىڭ ونى كوتەرسە. تابىس تاپقان كۇنى ەڭ الدىمەن وزىڭمەن ەسەپتەسكەن ءجون. تىگىنشىمەن دە، ەتىكشىمەن دە وزىڭنەن قالعانىمەن عانا ەسەپتەسۋگە داعدىلان. سونىڭ ىشىنەن، اسقا دا، ساداقاعا دا، قايىرىمدىلىققا دا قالدىرۋدى ۇمىتپا.

بايلىق تيتتەي تۇقىمنان جايقالاتىن اعاش سەكىلدى. ءوزىڭ ءۇشىن ساقتاعان العاشقى جەز باقىر، كەيىن ءوسىپ شىعاتىن بايلىق اعاشىنىڭ تۇقىمى بولماق. نەعۇرلىم سول تۇقىمدى تەزىرەك ەكسەڭ، سوعۇرلىم تەزىرەك بايلىق اعاشى كوگەرىپ شىعادى.

ىجداعاتپەن جيناقتاۋ ارقىلى نەعۇرلىم ونىڭ توپىراعىن تىڭايتىپ، سۋارعان سايىن، ونى كولەڭكەلەپ، راحاتىنا سوعۇرلىم تەزىرەك بولەنەسىڭ.

ەكىنشى داۋا — شىعىندى قاداعالا

سەندەردىڭ ءبارىڭ ايتاتىن «كۇندەلىكتى قاجەتتىلىك»-تەرىڭ تابىستارىڭ وسكەن سايىن ارتىپ وتىرادى، ەگەر وعان وزدەرىڭ قارسى تۇرا الماساڭدار.

كۇندەلىكتى قاجەتتىلىك پەن وزدەرىڭنىڭ ناپسىلىك قۇمارلارىڭدى شاتاستىرماڭدار. ءارقايسىڭدا تاپقان تابىسقا سايكەس قاجەتتىلىكتەن گورى قۇمارلارىڭ باسىم. سوندىقتان دا جينالعان اقشا الگى قاپتاعان قۇماردى قاندىرۋعا شىعىندالىپ جاتادى. سوعان قاراماستان، قاناعاتتاندىرىلماعان قۇماردىڭ شەگى ءبارىبىر دە بولمايدى.

تابىستىڭ وننان ءبىر بولىگى شىعىندالمايتىنداي، قارجىڭدى كۇندەلىكتى قاجەتكە دە، سايرانداۋعا دا جانە نەگىزگى قۇماردى قاندىرۋعا دا جەتەتىندەي جۇمسا.

ءۇشىنشى داۋا — جيناق اقشاڭدى كوبەيۋگە يتەرمەلە (تابىستى ارتتىرۋدىڭ جولدارىن تابىڭىز)

ءاميانىڭ تولا باستادى. ونداعى تابىستىڭ وننان ءبىر بولىگىن قالدىرۋعا ءوزىڭدى كوندىردىڭ. جيناقتى قور ءۇشىن ءوز شىعىندارىڭدى قاداعالاي باستادىڭدار. ەندى اقشالارىڭدى سەندەرگە جۇمىس ىستەتەتىن ءارى كوبەيتەتىندەي سايمان كەرەك. ءامياندا جاتقان التىن سەندەردىڭ جاندارىڭدى جادىراتىپ، كوڭىل توعايتقانىمەن، ەشبىر تابىس اكەلمەيدى. جينالعان قارجى - بار بولعانى العاشقى قادام عانا. جيناق تابىس اكەلە باستاعاندا عانا ەسىكتەن بايلىق سىعالايدى.

قابىسقان ءاميانعا ارنالعان ءۇشىنشى داۋا، مىنە وسى: ءاربىر تەڭگەنى ورىستەگى قاپتاعان مالداي، وزىندەيلەردى وندىرەتىندەي ەتىپ، ءاميانعا بايلىق اعىنىن باعىتتايتىنداي جۇمىسقا سالىڭدار.

ءتورتىنشى داۋا — جيناقتى جويىلۋدان ساقتا (ءتيىمسىز ينۆەستيسيادان اۋلاق بولىڭىز)

التىننىڭ جارقىلى قايعى تارتادى. ءاميانداعى التىندى جوعالۋدان ساقتاعان ءجون. سوندىقتان دا، داناگوي ادام جاراتقاننىڭ بۇيرىعىمەن ءىرى سالىم قولعا تۇسكەنشە، اۋەلى از عانا سومانى ىسكە سالىپ، سونى ساقتاۋدى ۇيرەنەدى. ءاربىر التىنى بار ادام، سەنىمدى كورىنگەن ىسكە ۇلكەن قارجىسىن سالعىسى كەلىپ، قىپىلدايدى دا تۇرادى. ول كوبىنە دوستارى مەن تۋىستارىنىڭ جولىن قۋىپ، سولاي ىستەيدى دە.

قارجى سالۋدىڭ ءبىرىنشى ءارى باستى ۇستانىمى — نەگىزگى مال-مۇلىكتىڭ ساقتالۋىن قامتۋ. ىسكە سالار قورىڭمەن قوشتاسپاي تۇرىپ، ونىڭ قايتىپ ورالارىنا كوز جەتكىزىپ، زەردەلەگەن ءجون. تەزىرەك بايۋدى كوكسەگەن ءوزىڭنىڭ جەلبۋاز تىلەگىڭدى باسشىلىققا الماعايسىڭ.

جيناعان قورىڭدى بىرەۋگە وتكىزەر بۇرىن، ول كىسىنىڭ قايتارىم قابىلەتى مەن ابىرويىنىڭ دۇرىستىعىن تەكسەرگەن دۇرىس، ايتپەسە، ەبىل-سەبىل بولىپ جيناعان قورىڭدى وعان ءوز قولىڭمەن سىيعا تارتقانداي كۇي كەشۋىڭ ىقتيمال.

التىنىڭدى تاۋەكەل ەتىپ، ءوز اقىلىڭا سەنبە. ونان دا، التىنمەن ىستەۋدى مەڭگەرگەن بىلىكتى ادامنان كەڭەس العان دۇرىس.

قابىسقان ءاميان ءۇشىن ءتورتىنشى داۋا مىناۋ: ءوز جيناقتارىڭدى پايدامەن قايتارىپ الاتىنداي، سەنىمدى ىسكە سالۋ ارقىلى ساقتاڭدار. اقىلگوي، بىلىكتى ادامنان كەڭەس الىڭدار. بىلىكتىنىڭ كەڭەسى التىنعا پاراپار. ءارى ونىڭ اقىلدى كەڭەسى سەندەردىڭ ءامياندارىڭا قويعان كۇزەت بولىپ تابىلادى.

بەسىنشى داۋا — جيناقتى تۇرعىنجايعا سال

قابىسقان ءامياننىڭ بەسىنشى داۋاسى دەگەنىمىز — جەكە باسپانالى بول.

التىنشى داۋا — كەلەشەككە جەتەر تابىستى قامتى

بايلىقتىڭ ءوسۋ زاڭىن بىلە تۇرا اقشا جيناعان ادام، ىلعي دا كەلەشەك تۋرالى ويلاۋى كەرەك. دەر كەزىندە الدىن الا ويلاستىرىلعان جىلدارعا جەتەتىندەي كەيبىر سالىمدى جوسپارلاعان ابزال.

سونىمەن قابىسقان ءاميانعا ارنالعان التىنشى داۋا: ەگدە كەزەڭدەگى ءوز قاجەتىڭ مەن جانۇياڭدى قورعاۋعا الدىن الا قامدان.

جەتىنشى داۋا — تابىس تابۋ مۇمكىندىگىن كەڭەيتە ءتۇس

العىشارت رەتىندە تابىس تابۋعا دەگەن ادامدا اسا كۇشتى دە ايقىن تىلەك بولۋى قاجەت. ايقىندالماعان تىلەك – ول بار بولعانى ارمان عانا. بايۋعا ۇمتىلاتىن ادام ءۇشىن ونىڭ پايداسى جوق. ەگەر ادام بەس التىن اقشا تاپقىسى كەلسە، ونداي تىلەك ورىندالادى. ەگەر وعان ول قول جەتكىزسە، وندا ول ءدال سولايشا ون دا، جيىرما دا، مىڭ دا اقشا تابا الادى دا، اقىرىندا بايىپ كەتەدى. ۇساق تىلەكتى ورىنداۋ ارقىلى ول ءوزىن ۇلى تىلەكتەرگە ازىرلەيدى. بايلىق وسىنداي جولدارمەن عانا قۇرالادى. اۋەلى ول ۇساق-تۇيەكتەن جينالادى دا، ارتىنان ادامنىڭ بىلىك پەن تاجىريبە جيناقتاۋىنا وراي، بۇل سوما ۇلعايا بەرەدى، ۇلعايا بەرەدى.

تىلەك قاراپايىم دا، انىق بولۋى كەرەك. ول اسا كوپ جانە كۇردەلى بولسا، ەگەر دە ول بۇلدىر ءارى ادامنىڭ ءوز مۇمكىندىگىنەن تىس بولسا، كۇشىن جويادى.

ادامنىڭ ءوز كاسىبى بويىنشا كەمەلدەنۋىنە وراي، ونىڭ تابىس تابۋ قابىلەتى دە شىڭدالا تۇسەدى.

نەعۇرلىم كوبىرەك بىلسەك، سوعۇرلىم كوپ تابىسقا كەنەلەمىز. ءوز ءىسى جونىندە كوپ بىلۋگە ۇمتىلاتىن ادام مىندەتتى تۇردە ماراپاتتالادى.

سونىمەن، قابىسقان ءاميانعا كەرەك جەتىنشى داۋا مىناۋ: دانالىق پەن بىلىككە قول جەتكىزۋ ءۇشىن ىزدەن، وقى جانە ءوزىڭدى ءوزىڭ قۇرمەتتەيتىندەي قىلىقتى تاڭدا. سوندا عانا وزىڭە دەگەن سەنىم زورايىپ، ءوزىڭ اڭساعان تىلەكتەرگە جەتە الاسىڭ.

ءوزىمنىڭ ۇزاق تا، جەمىستى عۇمىرىمدا اشقان قابىسقان ءاميانعا ارنالعان جەتى داۋا وسى ەدى، بۇلاردى بايلىقتى اڭساعانداردىڭ بارىنە پايدالانۋعا كەڭەس بەرەم.

بايلىقتىڭ بەس زاڭى

بىرەۋدە كوپ التىن بولىپ، كەلەسى بىرەۋىندە ەشتەڭە بولاماسا، ونى تاعدىردىڭ تالكەگى ساناماي-اق قويىڭدار. بايلىققا يە بولعاندار - بايلىقتىڭ بەس زاڭىن ءبىلىپ، سونى ۇستانعاندار.

بايلىقتىڭ ءبىرىنشى زاڭى

تابىسىنىڭ كەمىندە وننان ءبىر بولىگىن ءوزى مەن جانۇياسىنىڭ بولاشاعىنا جينايتىن ادامنىڭ قولىنا عانا بايلىق داريدى ءارى مولايادى.

تابىسىنىڭ وننان ءبىر بولىگىن تۇراقتى تۇردە جيناپ، ونى ىسكە اقىلمەن سالعان ادام، ءوز بولاشاعىنا جەتەتىندەي ءارى ارتىندا قالعان جانۇياسىنا جەتكىلىكتى تىرلىك كوزىن قالدىرىپ، لايىقتى بايلىققا قول جەتكىزەدى. بۇل زاڭ وسىنداي ادامنىڭ قولىنا ءارۋاقتا التىن قۇيماسىن بۇيىرتادى. بۇعان كۋا رەتىندە مەن ءوز ءومىرىمدى مىسالعا كەلتىرە الامىن. ماعان نەعۇرلىم التىن كوپ جينالعان سايىن، سوعۇرلىم ول ماعان مول كولەمدە كەلدى. جينالعان التىن، مەن ويلاعاننان ارتىق تابىس اكەلدى. ال، جينالعان قور ەسەلەنە تۇسەدى ەكەن. ءبىرىنشى زاڭنىڭ وسىنداي كۇشى بار.

بايلىقتىڭ ەكىنشى زاڭى

وزىنە تابىستى ءىس تاپقان ادامنىڭ بايلىعى عانا تۇراقتى دا قالقىسىز جۇمىس ىستەپ، ورىستەگى مالداي كوبەيەدى.

جيناق – شىنىندا دا قالتقىسىز ەڭبەكقور. ول مۇمكىندىك تۋعاندا قۇلشىنىسپەن مولايادى. بايلىق جىيعان ءار كىسى وسىنداي تابىستى مۇمكىندىككە يە. جىل وتكەن سايىن ول تابىس ەسەلەنىپ، قايران قالارلىق مولشەرگە جەتەدى.

بايلىقتىڭ ءۇشىنشى زاڭى

بىلىكتى ادامداردىڭ كەڭەسىنە قۇلاق اسىپ، اقىلمەن ىسكە جاراتقان كىسىنىڭ بايلىعى ەسەلەنەدى.

جيناق شىنىندا دا، ەسۋاستان قاشقان جانداي، قامقور قوجايىنعا سىتىلىپ كەتەدى. بايلىقپەن ءىسى بولعان ادامنىڭ كەڭەسىنە قۇلاق اساتىن جان، ءوز جيناعىن تاۋەكەلگە سالمايدى، وعان قاۋىپتى جولاتپاي، مولايۋىنا قۋانا قول جەتكىزەدى.

بايلىقتىڭ ءتورتىنشى زاڭى

وزىنە بەيتانىس ىسكە ۇرىنعان ادامنىڭ بايلىعى قولدان سۋسىيدى.

جيناق كورمەگەن ادامنىڭ قولىنداعى بايلىق كەز كەلگەن مۇمكىندىكتى پايدالى ەتىپ كورسەتەدى. الايدا، ول مۇمكىندىكتەردىڭ كوپشىلىگى جيناققا قاتەر توندىرەدى. ەگەر دە ول مۇمكىندىكتەردى تاجىريبەلى كىسىلەر ساراپتايتىن بولسا، ولار پايداعا جارايتىن مۇرساتتىڭ از ەكەنىنە كوز جەتكىزەر ەدى. سوندىقتان دا وزدىگىمەن وزىنە بەيتانىس ىسكە قول ارتاتىن جيناق يەسى كوبىنە تاجىريبەسىزدىگى سالدارىنان قولدا بارىن شاشىپ تىنادى. ءىستىڭ ءمانىسىن بىلەتىندەر كەڭەسىنە جۇگىنىپ جيناعىن جاراتقان جان عانا دانالىققا جول سالادى.

بايلىقتىڭ بەسىنشى زاڭى

قولدان كەلمەيتىن ىسكە ۇرىنعان بولماسا الاياقتار مەن قۋلاردىڭ قارماعىنا تۇسكەن نەمەسە تاجىريبەسىزدىگى مەن قيالي قىلىعى كەسىرىنەن تەز بايۋعا ۇمتىلعان ادام بايلىعىنىڭ بەرەكەسى قاشادى.

جيناعى بار ادامعا ىلعي دا سىيقىرعا تولى ەرتەگىدەي الدامشى ۇسىنىستار تۇسەدى. ولارعا قاراپ، شەكسىز بايلىقتى سىيقىرلى كۇش قانا قولعا تۇسىرەتىندەي كورىنەدى .ءبىراق تا ونداي جوسپارعا قالاي مۇقيات ۇڭىلسەڭ، تەز بايىتاتىن ول ىستەردىڭ سونشالىقتى تاۋەكەلگە تولى ەكەنىنە كوز جەتكىزۋگە بولار ەدى.

قارىز جايلى

جاستىق شاقتا ادام تاۋەكەلشىل كەلەدى. بايلىققا دا، الدامشى يگىلىككە دە جەڭىل جول ىزدەيدى. تەزىرەك بايۋ ءۇشىن جاستار ويلانباستان قارىزعا باتىپ جاتادى. ءومىردى باستاماي جاتىپ، ولار سەنىمسىز قارىزدىڭ ءبىر تۇسسەڭ شىعا المايتىن تەرەڭ قۇز ەكەنىن سەزبەيدى. ول - تۇنەك تۇڭعيىق قوي.

اقشانى قارىزعا بەرۋ قيىن ەمەس، ءبىراق ويسىز بەرە سالعان اقشانى كەرى قايتارۋ — قيىننىڭ قيىنى. بىلىكتى مولايتۋشى اقشاسىن بوسقا تاۋەكەلگە تىكپەيدى، وعان قايتارىم كەپىلى كەرەك.

اقشانى قارىزعا بەرۋ — تەڭىز كەشكەن اڭعال ساپارشىنى جارتاسقا سوقتىراتىنداي الدامشى جايت.

جاساندى تۋىستىق سەزىمگە بەرىلۋ كەرەك ەمەس. ەگەر دە تۋىسىڭا جاناشىرلىق جاساعىڭ كەلسە، ونى باسقا جولمەن، قولدا بار جيناعىڭدى تاۋەكەلگە تىكپەيتىندەي، ىستە. التىننىڭ ساقتاي المايتىن ادامنىڭ قولىنان الدى-ارتىنا قاراماي كەتەتىنىن ۇمىتپا. ودان دا، وزگەنىڭ اقشاڭدى قالاي جوعالتىپ جاتقانىن باقىلاپ وتىرعاننان، ونى ءوزىڭ جۇمساعانىڭ ءجون عوي.

وزدەرى ءىستىڭ رەتىن بىلمەيتىن جانە سەنىڭ اقشاڭدى تاۋەكەلگە تىگىپ بايىعىسى كەلىپ، باس قاتىراتىندارعا باسىڭ اينالماسىن. ولاردىڭ قۇرعاق ۋادەسى سەنىڭ جيعان-تەرگەنىڭدى ءبىر ساتتە-اق، جويۋى مۇمكىن. ونان دا ءىسى وڭعا باسقاندارمەن بىرگە بولعانىڭ ابزال. بىلىگى مەن تاجىريبەسىنىڭ ارقاسىندا ولار ساعان اقشاڭدى دا ساقتايدى، مول تابىسقا دا كەنەلتەدى. وسى جولمەن عانا كۇتپەگەن ولجاعا كەنەلگەن كوپ ادامداردىڭ جىبەرەتىن قاتەسىنە جولامايسىڭ.

ۇلكەن وكىنىشتەن، بولماشى ساقتىق ارتىق

قارىزعا بەلشەسىنەن باتىپ، كەيىن قايتارىپ، مول بايلىققا جەتكەن ادامنىڭ جوسپارى

بىرىنشىدەن، جوسپار مەنىڭ بولاشاق يگىلىگىمە نەگىز قالايدى. ول ءۇشىن ءار تابىسىمنىڭ وننان ءبىر بولىگىن جينايمىن ءارى ونى ساقتايمىن.

ەكىنشىدەن، ءوز تابىسىمنىڭ وننان جەتى بولىگىن جانۇيامنىڭ قاجەتىنە، كيىم-كەشەك پەن ازىققا، سونداي-اق، از بولىگىن ءومىرىمىزدىڭ ءلاززاتى مەن قۋانىشىنا جۇمسايمىن. ءبىراق، بۇل پايدالى شىعىنداردىڭ تابىستىڭ وننان جەتىدەن ارتپايتىنىن مۇقيات قاداعالايمىن. جوسپاردىڭ ساتتىلىگى دە سوندا بولماق. مەن بولىنگەن قارجىعا عانا تىرلىك ەتىپ، قارجى جەتپەيتىن ەشبىر نارسەنى ساتىپ الماۋىم كەرەك.

ۇشىنشىدەن، جوسپار بويىنشا، تابىسىمنان قارىزدى قايتارىپ وتىرۋىم قاجەت.

سول سەبەپتى، اي تولىسقاندا، تابىسىمنىڭ وننان ەكى بولىگىن ماعان سەنىپ قارىز بەرگەندەرگە ءادىل تۇردە ءبولىپ وتىرۋىم كەرەك. وسىلايشا، بەلگىلى ءبىر ۋاقىتتان سوڭ مەنىڭ قارىزىمنىڭ ءبارى قايتارىلادى.

بۇل ادام تۋرا وسى جوسپارمەن ءجۇرىپ، بۇلجىتپاي ورىنداپ قارىزدارىنان قۇتىلعان. ءارى كەدەي قۇل دارەجەسىنەن شىرىگەن بايلاردىڭ قاتارىنا دەيىن كوتەرىلگەن. وسى دەڭگەيگە جەتۋىنە ارقاۋ بولعان وسى جوسپار ەكەندىگىن ءوزى قۋانا وتىرىپ جازىپتى.

«ءبىراق ماسەلە مەندە ەمەس، ماعان ساتتىلىك اپەرگەن جوسپاردا عوي. ول ماعان بارلىق قارىزدان قۇتىلۋعا جول اشتى، ال ءاميانىما سىڭعىرلاعان التىن مەن كۇمىس تولتىردى. بۇل جوسپاردى ومىردەن ءوزىنىڭ مول سىباعاسىن العىسى كەلەتىن اركىمگە دە ۇسىنار ەدىم»، — دەپتى.

جوعارىدا ءبىز جازعان زاڭدىلىقتار مەن ەرەجەلەردى قولدانۋ ياكي قولدانباۋ ءوز ەركىڭىزدە. دەگەنمەن، وسى ەرەجەلەردى قولدانا وتىرىپ، ەجەلگى ۆاۆيلونداعى كەدەي ادامدار بايلىققا، قارجىلاي تاۋەلسىزدىككە قول جەتكىزگەن. بۇل وتكەن زاماننىڭ ەرەجەسى بۇگىنگى نارىققا مۇلدەم كەلمەيدى دەپ تە ويلارسىز. الايدا وسى زاڭدىلىقتارمەن تانىسقاننان كەيىن كلەيسون ونى ومىرىمىندە سىناپ كورگىسى كەلگەن. سەبەبى ءوزى سول ۋاقىتتا قارىزعا بەلشەسىنەن باتىپ قينالىپ جۇرگەن كەزى ەكەن. زاڭدىلىقتاردى بۇلجىتپاي ورىنداعان كەزدە ول وسىلاردى جۇمىس ىستەيتىندىگىن ايتا وتىرىپ، وسى زاڭدىلىقتاردى جازعان ۆاۆيلوندىق دانا بايلارعا العىسىن جەتكىزىپتى.

قانيا تابىس

---