InfoHub Logo

ەرتە زاماندا ءبىر وگىزدى ءۇش ادام باققان ەكەن. بىرەۋى وگىزدىڭ باسىندا جەم، سۋ بەرىپ تۇرادى ەكەن. ەكىنشىسى وگىزدىڭ ورتا ءبۇيىر، قابىرعا تۇسىندا تۇرىپ وگىزدىڭ اش-توقتىعىن بۇيىرىنە قاراپ، ونى سىلاپ-سيپاپ ايالاپ تۇرادى ەكەن. ءۇشىنشىسى — وگىزدىڭ ارت جاعىندا تۇرىپ ءتۇرلى ناجىستەرىن تازالاپ كۇتىپ تۇرادى ەكەن. ءسويتىپ جۇرگەندە ءبىر كۇنى وگىزدەرى سيمەي، تەزەك تاستاماي قالىپتى. سوندا ارتىنداعى ادام، بۇعان نە بولدى ەكەن، بىلەيىن دەپ، ورتاداعى ادامعا كەلۋ ءۇشىن جولدا ءۇش اي ءجۇرىپتى. ودان كەيىپ ەكەۋى كەڭەسىپ، مۇنى تاماققا جاقىن باسىنان بىلەيىك دەپ، باسىنا دەيىن ءۇش اي ءجۇرىپتى. سوندا باسىنداعى ادام: «وگىز اۋىردى، التى ايدان بەرى ءشوپ جەمەيدى، سۋ ىشپەيدى»، — دەپتى. بۇلار ەندى نە قىلامىز دەپ كەڭەسىپ وتىرعاندا، اسپاننان ءبىر قارا قۇس ۇشىپ كەلىپ وگىزدى ءىلىپ الا جونەلىپتى. بۇل قۇس تاۋعا بارىپ قونسا، تاۋ كوتەرە ال ماي ويىلىپ كۇلاي باستاپتى. قۇس وگىزدى قايتادان الىپ ۇشىپ، ءبىر بايتەرەكتىڭ باسىنا قونعان ەكەن، و دا كوتەرە الماي، سىتىرلاپ سىنا باستاپتى. قۇس وگىزىن الىپ ودان دا ۇشىپ، ميداي دالادا جايىلىپ جۇرگەن ءبىر تەكەنىڭ مۇيىزىنە قونعان ەكەن، ونى تەكە شىبىن قونعان قۇرلى كورمەي ماڭقيىپ تۇرا بەرىپتى. قۇس وگىزدى جۇلمالاپ جەي باستاپتى. سول كەزدە وسى تەكەنى اڭدىپ جاتقان ءبىر مەرگەن بار ەكەن، قۇس وگىزدىڭ جاۋىرىنىن بىتىرلاتىپ، كۇتىرلەتىپ تاس-تالقانىن شىعارىپ، ەتىن جەپ جاۋرىنىن سىلكىپ لاقتىرىپ تاستاعاندا اڭدىپ جاتقان مەرگەننىڭ كوزىنە ءتيىپتى. مەرگەن كوزىمە ءشوپ ءتۇستى دەپ جاۋىرىندى لاقتىرىپ جىبەرىپتى. سول كۇنى الىستان جول ءجۇرىپ كەلە جاتقان ءبىر كەرۋەن جولدا جاۋىن جاۋىپ، جەر ساز، جول اۋىر بولىپ، كەش بولىپ كەتكەن سوڭ سول جەرگە قونعان ەكەن. تۇندە جەر سىلكىنگەندەي، نە اينالعانداي بولىپتى. كەرۋەندەر قورقىپ، پىرلەرىنە سيىنىسىپ جاتقان- دا تاڭ اتا باستاپتى، كەرۋەندەردىڭ جەر قوزعالدى دەپ جۇرگەنى، ماناعى مەرگەن لاقتىرعان جاۋىرىندى تۇندە تاماق اڭدىعان ءبىر تۇلكى جەيىن دەپ قوزعاپ اينالدىرعان ەكەن. تاڭ اتقان سوڭ قاراسا، كەرۋەندەردىڭ باسى كۇن شىعىسقا قاراپ قالىپتى. تاڭ اعارىپ اتاردا كەرۋەننىڭ قاستارىنان ءبىر تاۋداي زات جىلجىپ ۇزاي باستاپتى. كەرۋەندەردىڭ ءبىر ءيتى بار ەكەن، ماناعى جىلجىپ بارا جاتقان زاتتى تارپا باس سالىپ، ۇستىنە ءمىنىپ الىپتى، كەرۋەندەر كەلسە، ادام ايتقىسىز زور تۇلكى ەكەن. كەرۋەندەر جيىلىپ، سىبانىپ سويۋعا كىرىسكەندە، ءبىر جاعىن سويىپ، ءبىر جاعىن اۋدارىپ سويۋعا شامالارى كەلمەپتى. كەرۋەندەر تۇلكىنىڭ تەرىسىن ۇلكەندەرىنە بايلاپتى. بۇل كىسىنىڭ جاڭا تۋعان بالاسى بار ەكەن، تۇلكىنىڭ تەرىسىن سول بالاعا كيىم قىلايىن دەسە، تۇماق تۇگىل بورىك تە شىقپاي قالىپتى.

---