سۇم ءومىر، سۇلۋ دۇنيە، الدادىڭ با؟
ءتان ارىپ، تامىردا قان قالمادىڭ با؟
جالعان ءۇشىن جان قيىپ، جاپا شەكتىم،
ەڭبەگىم، ەكى بولىپ، جانبادىڭ با؟
جايشىلىقتا جان قيعان، جاقىن دۇنيە،
تالىپ تۇرسام، نازارىڭ سالمادىڭ با؟
ورتەكەدەي ورعىتىپ، وققا جىعىپ،
جالماۋىز جاۋىز جالعان، جالمادىڭ با؟
ارسىز ءناسىپ، ارمانسىز الدادىڭ با؟
قايرىمسىز قانجىعاڭدى قاندادىڭ با؟
قوماعاي قورقاۋ اجال، قوينىڭ اشىپ،
قاپا مەن قايعىعا قول جالعادىڭ با؟
الداندىم، الجاستىردىڭ، اڭعىرتتاندىم،
اقىلسىز اڭقاۋ باسىم، اندادىڭ با؟
قيماس دوس، قىسپاقتا بوپ، جىلاتتىڭ با؟
قايعىمەن قان جۇتقىزىپ، سۇلاتتىڭ با؟
قاسىرەتتى قاساپشىنىڭ ەشكىسىندەي
قۇرىم ءىلىپ، قۇدىققا قۇلاتتىڭ با؟
قۇبىلدىڭ، قۇيقىلجىدىڭ، قۇرتقا دۇنيە،
«قىزىقپايمىن» دەسەم دە، شىداتتىڭ با؟
ار-ۇيات، ادامدىقتى ارام قىلىپ،
ءبارىن ساعان جۇمسادىم، قۋانتتىڭ با؟
سەن ءۇشىن جاقىنىمدى جات قىلىپ ەم،
قايىرىلىپ، قام كوڭىلىمدى جۇباتتىڭ با؟
مەلشيگەن، مەيىرىمسىز، مەڭىرەۋ دۇنيە،
الداپ اپ، ايىزىڭدى قاندىردىڭ با؟
قازىنانى ۇرلاعان قاراقشىداي،
باس سالىپ، باسقا بۇعاۋ سالدىردىڭ با؟
جاۋ توناعان ادامداي جاۋدىرەتىپ،
ادامزاتتىق ارىمدى الدىردىڭ با؟
كەتەرىڭە كەلگەندە، كاززاپ دۇنيە،
تۇلكىدەي قۇيرىعىڭدى شالدىرتتىڭ با؟
قاپاستا قان ازايىپ، قاجىر مۇقاپ،
قالاشىنىڭ يتىندەي قاڭعىرتتىڭ با؟
ازەلدە الىسقا ۇشقان ءدام مەن تۇزىم،
تاۋەكەل، تاسقا قوندىم، ءتاڭىرىم ساقتار.
جەرلەرگە توپىراق تارتقان سان اينالدىم،
دەگەن جانمىن: «قۇنىمدى قۇداي جوقتار!»
ادام باسى - اللانىڭ دوبى بولسا،
تاعدىردان تابانداتىپ ءتيدى شوقپار.
جالىندىم، جانتالاستىم، جالبارىندىم،
تيمەدى ەشبىر راحىم ءتاڭىرىم جاقتار.
ماحپۋزدىڭ تاقتايىنا جازعان جۇمىس
بۇيرىقتى جەرلەرىنە بارىپ توقتار.
باسقادان مەنىڭ جانىم باعالى ما،
تالاي جان تاپ جولىندا بولدى كوكپار!
قيادان ءسوز تاباتىن اقىل بار ما،
تىندايتىن بويىم بالقىپ ناقىل بار ما؟
ەسىل ءسوزىم ەسەپسىز بوسقا كەتسە،
وبالى جاۋلىعى جوق قاتىندارعا!

---