InfoHub Logo

جاقىندا ت. جۇرگەنوۆ اتىنداعى ونەر اكادەمياسىندا «كەسكىندەمە جانە ءمۇسىن»، «بەينەلەۋ ونەرىنىڭ تاريحى مەن تەورياسى» كافەدراسىنىڭ ۇيىمداستىرۋىمەن جازۋشى، عالىم جۇماباي قايرامبايدىڭ «ونەرمەن ورىلگەن ءومىر» اتتى كىتابىنىڭ تۇساۋكەسەرى ءوتتى. جيىنعا بايتۇرسىن ەسجان ۇلى، تۇرداقىن جەكسەنباي، كەرىمباي قىستاۋبايەۆ، امان قۇلبايەۆ، باۋىرجان ءبايدىلدا سىندى زيالى قاۋىم وكىلدەرى قاتىستى. 
 

جيىن بارىسىندا اۆتور اتالعان ەڭبەكتى جازۋداعى باستى ماقساتىنا توقتالدى. كىتاپتىڭ جارىق كورۋىنە بەلگىلى سۋرەتشى، كەسكىندەمەشى، قازاقستان رەسپۋبليكاسىنا ەڭبەگى سىڭگەن قايراتكەر، «ەرەن ەڭبەگى ءۇشىن» مەدالىنىڭ يەگەرى، پروفەسسور، قىرعىز ۇلتتىق كوركەمسۋرەت اكادەمياسىنىڭ اكادەميگى جۇماقىن قايرامبايەۆتىڭ ءومىرى مەن ونەرى ارقاۋ بولعان. كىتاپتىڭ باس كەيىپكەرى يتالياداعى ءىرى سۋرەت كورمەسىندە ءوز تۋىندىسىن تانىستىرعاندا، شەتەلدىك سۋرەتشىلەر قازاق حالقىندا مۇنداي ونەر مۇلدە بولماعان دەپ تاڭدانىسىن ءبىلدىرىپتى. سوندا سۋرەتشى مۇدىرمەستەن اتا-بابالارىمىزدىڭ ەرتە عاسىردان-اق تاسقا قاشاپ سۋرەت سالعاندىعىن ايتقان. وسى وقيعانى تىلگە تيەك ەتكەن جۇماباي قايرامباي: «قازاق ەرتەدەن ونەرلى حالىق. كىتاپتا كەسكىندەمە، سۋرەت ونەرىنىڭ قىر-سىرىنا ءۇڭىلدىم. وقىرماندار، جاستار وسى ونەرگە قىزىعىپ، دامىتامىز دەسە، قۇبا-قۇپ»، – دەدى.  كەسكىندەمە ونەرىنىڭ كەڭىنەن تانىلۋىنا ۇلەس قوسقان سۋرەتشىنىڭ كوركەم شىعارمالارى ەلىمىزدىڭ مۇراجايلارىمەن قاتار، شەتەل قورلارىندا دا ساقتاۋلى. 
 

ءىس-شارانىڭ ەكىنشى بولىمىندە «الاش» سىيلىعىنىڭ لاۋرەاتى، جازۋشى تۇرداقىن جەكسەنباي: «جۇماقىننىڭ ءتىلى جەڭىل، ءسوز بايلىعى مول. ءاربىر جاستىڭ ءوي-ورىسىن كوركەم ادەبيەت جەتىلدىرەدى. ال قولىمىزداعى كىتاپ قازاقتىڭ كەسىندەمە ونەرىن ناسيحاتتاپ قانا قويمايدى. سونداي-اق، ورەلى ونەردى ونەگەلى سوزبەن جەتكىزەتىندىگىن» ايتىپ، جيناقتىڭ تۇساۋىن كەستى. 
  جيىن سوڭىندا اقىن مارالتاي رايىمبەك جىر وقىپ، ءانشى رامازان ستامعازييەۆ «ەكى جيرەندى» ناقىشىنا كەلتىرە ورىنداپ، كورەرمەن ىقىلاسىنا بولەندى.

---