InfoHub Logo

الماتىداعى SmaArt.Point عيماراتىندا «ديناستيا» جوباسىنىڭ قاتىسۋشىلارىن ماراپاتتاۋ شاراسى ءوتتى. قازاقستان وتباسىلىق بيزنەس اسسوسياسياسى سەرىكتەستەرىمەن بىرلەسە وتىرىپ،  «ديناستيا» جوباسى وتباسىلىق كاسىپكەرلىك پەن قارجىلاي ساۋاتتىلىقتى دامىتۋ جانە قولداۋدى جۇزەگە اسىردى. ناتيجەسىندە، قازاقستاندا جاڭادان 4 كومپانيا اشىلىپ، 4 سەرىكتەستىك جوبا قۇرىلدى. وعان قوسا باس دەمەۋشى «حوۋم كرەديت بانك» جەڭىمپازدارعا ءۇش قارجىلاي گرانت بەردى. جالپى، جوباعا قاتىسۋشىلار كاسىپكەر رەتىندە زاڭدى مارتەبەسىن الدى.

جوباعا قازاقستاننىڭ 12 اۋدانى مەن 8 قالاسى بويىنشا 300-دەن اسا ادام قاتىستى. ونىڭ باسىم كوپشىلىگى 25-55 جاس ارالىعىنداعى قىز-كەلىنشەكتەر. ءۇش ايلىق وقۋ باعدارلاماسىندا ءبىلىم بەرۋگە ارنالعان 8 ماستەر-كلاسس جانە قوسىمشا 4 ەكسپەرت ماماندارمەن كەزدەسۋ وتكىزىلدى.

بۇل جوبانىڭ باستى ماقساتى — قازاقستاننىڭ بارلىق ايماعى بويىنشا كاسىپكەرلىكپەن اينالىسا باستاعاندار مەن قاندايدا ءبىر كاسىپپەن اينالىسقىسى كەلەتىندەرگە وتباسىلىق رەسۋرستى قولدانا وتىرىپ، ءوز ءىسىن اشۋعا، جاڭا مۇمكىندىكتەر تابۋعا ۇيرەتۋ. وقۋ كۋرسىن تولىعىمەن وتكەندەر ءوز كومپانياسىنىڭ قارجىلاي نەگىزىمەن تانىسىپ، كۇندەلىكتى تىرشىلىكتە ماركەتينگتىك قۇرالداردى پايدالانۋدى، جاڭا سەرىكتەستەر مەن تۇتىنۋشىلار تابۋعا مۇمكىندىك الدى.

— جالپى، ستاتيستيكا بويىنشا وتباسىلىق بيزنەس – تابىستى بيزنەستىڭ ءبىرى. بۇل مەنىڭ اشقان جاڭالىعىم ەمەس، ول الەم بويىنشا زەرتتەلىپ، انىقتالىپ، دالەلدەنگەن نارسە. «وتباسىلىق بيزنەس اشۋ مۇمكىن ەمەس» دەگەن ستەرەوتيپتى مۇلدەم جويۋ كەرەك. اسىرەسە ءبىزدىڭ ەلدە ۇلتتىق، وتباسىلىق قۇندىلىقتاردى جوعارى قويامىز. سوندىقتان دا بۇل وتباسىلىق ءىس باستاۋعا جاقسى نەگىز. ەكىنشىدەن، قاندايدا ءبىر يدەيا بولسا، ونى ءبىرىنشى كىمگە ايتاسىز، كىمنەن كومەك سۇرايسىز جانە ءسىزدى كىم قولدايدى. ارينە، جاقىندارىڭىز. ءبىز سولاردى ءبىر بىرىمەن جۇمىس ىستەۋدى، ءوزارا بەرىك سەرىكتەستىك ورناتۋدى، ءىسىنىڭ دامۋىنا، العا جىلجۋىنا كومەكتەسەمىز»، – دەيدى قازاقستان وتباسىلىق بيزنەس اسسوسياسيانىڭ ءتورايىمى يانا يساكوۆا.

ونىڭ ايتۋىنشا، جوباعا كەز كەلگەن ادام قاتىسا الادى، تەك تىركەلسە بولعانى. ءبىر عانا تالاپ – جوباعا قاتىسۋشى تۋىس ادامىمەن كەلۋى كەرەك. قاتىسۋشىلاردىڭ كوپشىلىگى جوباعا كەلگەن سوڭ وتباسىنىڭ قولداۋىن الىپ، ءوز ىستەرىن اشقان. وسى ارقىلى ءار قاتىسۋشى ءوزىنىڭ عانا ەمەس، جاقىندارىنىڭ دا ءومىرىن جاقسارتۋعا تىرىسۋدا. ءتىپتى، جوبا ناتيجەسىندە وتباسىلىق كاسىپكەرلىكتى دامىتاتىن ورتالىق اشىلماق.

«شىنى كەرەك، ەڭ باسىندا بۇل جوبا جايىندا بىلگەنىمىز ايتارلىقتاي از بولاتىن. بىردە قازاقستان وتباسىلىق بيزنەس اسسوسياسياسىنىڭ ءتورايىمى يانا يساكوۆا حابارلاستى. ول الماتى عانا ەمەس، جالپى قازاقستان بويىنشا «كاسىپكەر بولامىن» دەگەن ادامداردى جيناپ، بيزنەس اشۋدىڭ جولدارىن كورسەتكىسى كەلەتىنىن جەتكىزدى. سول كەزدە ەڭ الدىمەن بىزدەن قارجىلاي ەمەس، جاڭادان بيزنەس اشامىن دەگەن ادامداردىڭ قارجىلىق ساۋاتتىلىعىن اشۋعا كومەك بەرۋىمىزدى سۇرادى. ءبىزدىڭ بانك بەس جىل بويى قارجىلىق ساۋات اشۋ جاعىنان كوپتەگەن جوبالار ۇيىمداستىرعان بولاتىن. سوندىقتان يانانىڭ باستاماسى ويىمىزدان شىقتى. 3 اي بويى ءبىز وتباسىلىق كاسىپكەرلەرمەن تاجىريبەمىزبەن بولىسۋگە تىرىستىق» دەيدى «بانك حوۋم كرەديتتىڭ» قوعاممەن بايلانىس مەنەدجەرى ەلۆيرا نۇربايەۆا.

جوباعا قاتىسۋشى الماتىداعى 80-گە جۋىق وتباسىلىق جۇپ ءۇش اي بويى ءار اپتا سايىن ماستەر-كلاسقا قاتىستى. سوندا بانك قىزمەتكەرلەرى بولاشاق كاسىپكەرگە قاجەتتى نەگىزگى قارجىلىق قۇرالداردى ايتىپ، ەكونوميكا مەن قارجى جاعىن باستان اياق وقىتىپ شىقتى. ونىڭ ۇستىنە قانداي دا ءبىر كاسىپتى باستاماس بۇرىن قانداي نارسەلەرگە باسا نازار اۋدارۋ كەرەكتىگىن كورسەتىپ، اقىل-كەڭەستەرىن بەرگەن ەكەن.

— جالپى، بارلىق كەزدەسۋلەر وتە قىزىقتى ءوتتى. ونىڭ ىشىندە رەسمي عانا ەمەس، بەيرەسمي كەزدەسۋلەر دە بولدى. سول ارالىقتا بارلىق قاتىسۋشى ءوزارا دوستاسىپ، بىر-بىرىنە باۋىر باسىپ كەتكەندەرىنە كۋا بولدىق. وعان قوسا وسى جوبا بانكىمىزدىڭ «عاجايىپ ءومىر ءۇشىن» دەگەن ۇرانىمىزدى قولداعان بولدى، – دەدى ەلۆيرا نۇربايەۆا.

بۇل جوباعا دەمەۋشىلىك كورسەتكەن «اتامەكەن» قازاقستان رەسپۋبليكاسىنىڭ ۇلتتىق كاسىپكەرلەر پالاتاسى، ىسكەر ايەلدەر كەڭەسى مەن الماتى مەنەدجمەنت ۋنيۆەرسيتەتى بولاتىن. سونىمەن بىرگە، باس دەمەۋشى «بانك حوۋم كرەديت» ءۇش قاتىسۋشىعا گرانت بەردى. ءوز كاسىبىن تاۋىپ، ءىسىن ەندى جۇرگىزگەلى تۇرعان وتباسىلىق كاسىپكەرلەر ءۇشىن ول ارينە قوماقى كومەك. وتباسىنىڭ بۇكىل مۇشەلەرىمەن جوباعا بىرگە قاتىسىپ، ءوز ءىسىن اشقان ارحاروۆتار اۋلەتىنە 250 مىڭ تەڭگە بەرىلدى. 150 مىڭ تەڭگە گرانتى ەكى بالانىڭ اناسى، دەكرەتتىك دەمالىستا وتىرعان جانار بايبولوۆاعا بۇيىردى. كاسىبىن ودان ارى دامىتۋعا مۇمكىندىك العان جاس سين وتباسىنا 100 مىڭ تەڭگە بەرىلدى.

ساۋلە ارحاروۆا:

جوبا ارقاسىندا شىعارماشىلىق شەبەرحانامىز اشىلدى

— وسىندا كەلگەنىمدە ءتىپتى بيزنەس-جوبانى قالاي جازۋ كەرەكتىگىن دە بىلگەن جوقپىن. ءوزىمىز ونەر ادامدارى بولعان سوڭ، نەگىزگى تابىستى تويدان تابامىز. سول تويدى اتقارىپ شىعىپ، اقشانى الامىز دا شىعىندارىمىزدى جاۋىپ، ەكىنشى ءبىر تاپسىرىسقا كەتەمىز. مىنە، كۇنىمىز وسىلاي وتەتىن. ال مىنا جەردە ءار ساباق سايىن ءۇي تاپسىرماسىن ورىنداي وتىرىپ، ءبىراز نارسەنى بىلدىك. ءۇش اي بويى ءار اپتا سايىن كەزدەسىپ تۇرعاننىڭ ءوزى ءبىر-بىرىمىزدى قولداۋعا، كومەكتەسۋگە ۇيرەتتى. ماسەلەن، كاسىپكەرلەر پالاتاسى بيزنەس جۇرگىزۋ بويىنشا ترەنينگ وتكىزەدى. ءبىراق ودان گورى، وسى جوبادان كوپ سۇراعىما جاۋاپ الدىم. مۇندا 80-گە جۋىق وتباسى قاتىسىپ، ءوزارا جارىسىپ قانا قويماي، دوستاسىپ، بىر-بىرىمىزگە جاقىن بولىپ كەتتىك.

بۇرىن مەرەكەلىك كەشتەردى ۇيىمداستىرۋمەن اينالىساتىنمىن. باسىندا بۇل جوبانىڭ پايداسى بولاتىنىن وتباسىم سەنبەدى. ساباققا قاتىسقان سوڭ، ولاردىڭ ويلارى وزگەردى. بۇگىندە ۇلىم، قىزىم، جولداسىممەن بىرگە «ارحاروۆتار شىعارماشىلىق شەبەرحاناسىن» قۇردىق. ونى اشۋ يدەياسى دا، اتى دا وسى جەردە تۋدى. ەندىگى ماقسات – اقشا تابۋ ەمەس، ادامدارعا جاقسى كوڭىل-كۇي سىيلاۋ.

جانار بايبولوۆا:

پايداما جارايتىن ءبىلىم الدىم

— جوبا جايىندا دوستارىمنان ءبىلىپ، تىركەۋدەن ءوتتىم. نەگىزى قاندايدا ءبىر ۇتىس ءۇشىن كەلگەنىم جوق. باستىسى — پايداما جارايتىن ءبىلىم الۋ. جالپى، جوبانىڭ ۇيىمداستىرۋشىسى يانا يساكوۆانى بۇرىن سىرتتاي بىلەتىنمىن. بۇرىن استانادا اكىمدىكتە زاڭگەر بولىپ ىستەگەنمىن. بۇگىندە ەكى بالانىڭ اناسىمىن. كيىم-كەشەك ديزاينەرى كوپتىگىن بايقاپ، ايەلدەرگە ارنالعان سۋمكانى جاساۋ جولىن تاڭدادىم. اپام دا، انام دا قول ونەرگە جاقىن ادامدار. مىنە سولارمەن بىرگە ەندى وتباسىلىق بيزنەس اشتىق.

ديانا سين:

بالامنىڭ ارقاسىندا ءىسىمدى اشتىم

— بۇل جوباعا مەنى كۇيەۋىم شاقىردى. ارينە، باسىندا كۇمانمەن قارادىم. قاندايدا دا ءبىر نارسە تەگىن بولادى دەسە «نەگە؟»، «نە ءۇشىن؟» دەگەن سۇراقتار تۋىندايتىنى بەلگىلى عوي. ءبىراق ءقازىر كەلگەنىمە وكىنبەيمىن. ويتكەنى وسى جەردە كوپ نارسە ۇيرەندىم. باستىسى، بۇل ءبىز ءۇشىن جاقسى باستاما بولدى. سەبەبى، بۇعان دەيىن «نەمەن اينالىسسام بولادى» دەپ ويلانىپ، ۇيدە وتىراتىنمىن. ءبىزدىڭ اينالىسپاعان نارسەمىز قالمادى. قىتايدان اشەكەي-بۇيىمدار الدىرىپ، ساتىپ تا كوردىك. ءبىراق ودان ەشتەڭە تاپپادىم. بالامەن ۇيدە وتىرعان سوڭ ارتىق ەش جەرگە شىعا دا المايسىڭ. بۇعان قوسا بالامىزدىڭ قانتقا دا، كونسەرۆىگە دە اللەرگياسى بولدى. وعان نە بەرەتىنىمىزدى بىلمەدىك. سودان جەمىس-جيدەكتەردى قوسپاسىز كەپتىرۋ ويعا كەلدى. بۇگىندە جەمىس-جيدەك چيپسى مەن ءۇي پاستيلاسىن شىعارامىز. بۇل ءونىمنىڭ بالاعا زيانى جوق. ونى ءوز بالامىزعا دا بەرىپ ءجۇرمىز. اللەگريامەن اۋىراتىن بالالار ءۇشىن تاپتىرماس ونىمگە اينالدى. ءارى دەنساۋلىققا دا پايدالى.

فوتو Kursiv.kz

---