35 جىل.
ۋاقىت قوي كوپ-كورىم.
35 جىل قۋارىپ،
35 جىل كوكتەدىم.
35 كۇز، 35 قىس، 35 جاس،
وسال ءومىر ەمەس قوي وتىز بەس جاس...
35 جىل.
ءومىردى كەزىپ كەلەم.
جانە 35 بولا ما؟
سەزىكتەنەم...
اكەم مەنىڭ ەسىمدە، شام تۇبىندە
ۆكپ (ب) تاريحىن ەجىكتەگەن.
جانە ءبىر ءسات ەسىمدە اقپانداعى،
اكەم وتىر مايدانعا اتتانعالى.
ءبارى ەسىمدە
دالا، ەگىس، اۋىل، مەكتەپ،
ۇستازدار، ينتەرناتتىڭ قاتقان نانى...
ءبارى ەسىمدە - دالام دا، تۇراعىم دا،
تەك ەستە جوق، كۇلدىم بە، جىلادىم با...
بالالىق شاق جاربيىپ جۇرەتۇعىن
وگىز جەككەن سوقانىڭ قۇلاعىندا.
شارۋانىڭ بالاسى بولعاسىن با،
شارۋامەن اينالدىم ون جاسىمدا.
مايدانداعى اكەمە وق جىبەردىم،
ايىرباستاپ كۇلشەمدى قورعاسىنعا.
اجەم ەسىمدە.
ارنەگە قوزبايتۇعىن،
ارىدەن كوپ اڭگىمە قوزعايتۇعىن.
تەمىر كەرنەي ەسىمدە...
بوران ۇرسە،
ازالى ءۇنىن اڭىراتىپ بوزدايتۇعىن.
ەسىمدە جوق.
بالا بوپ ءوسىپ پە ەدىم؟!
بولسام نەگە جىلى ءسوز ەسىتپەدىم؟!
ەسىمدە تەك،
بىلەمىن جەڭىس-قۇستىڭ
ءبىزدىڭ جاققا ءبىر اپتا كەشىككەنىن.
وسىلاي وسكەمىن.
مەن - سولداتتىس جاندىرىپ كەتكەن جالىنى
سونبەدىم دە وشگىەدىم،
مەن وتىز بەستەمىن.
مەنى جۇرت:
«جاقسىدان قالعان كوز» دەيدى،
«جاقسىدان قالعان ءسوز» دەيدى،
اقىماق بولسام توزبەيدى:
حايۋان دەيدى، ەز دەيدى،
حاقىم جوق جامان بولۋعا،
مەنى جاقسىدان قالعان كوز دەيدى.
35 جىل.
بىتپەگەن ىستەرىم كوپ.
(وتكەن ءومىر ءتاتتى ءبىر ءتۇس كورىنبەك)
ارىم اپپاق.
ايتا المان، ەكىنبەن دە،
وزگەلەرگە قيانات ىستەدىم دەپ.
بيىك بولسا بولعانى بولاشاعىم،
مەن الاسامىن.
ءومىر ساحناسىنا العان زاڭدى بيلەتىم بار.
زاڭدى ورنىما تالاسامىن!!!
35 جىل.
وتىز بەسىنشى شۋاعىم
35 جىل كۇلدىم،
35 جىل جىلادىم.
كىم بىلەدى،
35 كوكتەم،
ەندى قانشا تۇرامىن؟...
35 كۇز، 35 قىس، 35 جاز
وسال ءومىر ەمەس-اۋ وتىز بەس جاس...

---