InfoHub Logo

- ءوز ۇيىمە قايتامىن! - دەدى بالا.

اينالا تۇرعاندار بالانىڭ سوزىنە جامىراي كۇلىستى.

- ءاي، ءوز ۇيىڭدە نە بار؟! - دەدى كۇلىپ وسى جەردە تۇرعان ۇلكەن اپايلاردىڭ ءبىرى بالاعا. - نە بار ءوز ۇيىڭدە؟!

- ءوز ۇيىمدە اتام بار! - دەدى بالا.

- اتاڭ دەگەن وتىرعان جوق پا مۇندا؟!

جاڭاعى اپاي ساكىنىڭ ۇستىندە وتىرعان بالانىڭ ناعاشى اتاسىن كورسەتتى.

بالا باسىن شايقادى:

- جوق! ول مەنىڭ اتام ەمەس. ءوز ۇيىمدە ءوزىمنىڭ اتام بار!

اينالا تۇرعان ادامدار بالانىڭ سوزىنە تاعى دا دۋىلداي كۇلدى.

جيەنىنىڭ سوزىنە ساكىنىڭ ۇستىندە وتىرعان كىسى دە كۇلدى:

- "جيەن ەل بولمايدى" دەپ وسىدان ايتىلعان عوي. ءوزىمنىڭ دە ۇلدارىم ۇيلەنەر. ءوزىمنىڭ دە "اتالاپ" جۇرەتىن نەمەرەلەرىم بولار.

- ءاي، مۇندا توي بولعالى جاتقان جوق پا؟! - دەدى تاعى دا جاڭاعى اپاي بالاعا. - ناعاشى اپكەڭدى ۇزاتقالى جاتقان جوقپىز با؟ تاتتى-پاتتىلەردىڭ ءبارى دە وسىندا، كامپيتتىڭ دە نەبىر ءتۇرى وسى جەردە. كوڭىلدى مۋزىكا وينالىپ جاتىر. قىزىقتىڭ ءبارى وسى جەردە ەمەس پە؟! ءقازىر قۇدالار كەلەدى اپكەڭدى ۇزاتىپ الىپ كەتۋگە. قالمايسىڭ با؟!

بالا تاعى دا باسىن شايقادى:

- جوق! ءوز ۇيىمە قايتام!

بالانىڭ اتاسى سىرقاتتانىپ قالىپ، قۇداسىنىڭ تويىنا كەلە الماي قالعان ەدى. بالا اۋىلىنان كىسى اكەلىپ تاستاۋعا كەلگەن كولىكتىڭ جۇرگىزۋشىسىن تانىپ، "مەنى دە الا كەت" دەپ، كولىكتى توقتاتىپ قويعان بولاتىن.

- ماما! - دەدى بالا ەندى ءوزىنىڭ اناسىنا قاراپ. - ماعان كيىمدەرىمدى پاكەتكە جيناپ، سالىپ بەرشى! مەن ءوز ۇيىمە قايتا بەرەيىن! ال سەن تويدى وتكىزىپ بارىپ ءبىر-اق كەلەرسىڭ.

ۇلكەندەر بالانىڭ سوزىنە تاعى دا كۇلدى.

- وسىنىڭ ءبارى اكە-شەشەمنىڭ ءوزىنىڭ تاربيەسى، - دەيدى كۇلىپ وسى ءۇيدىڭ تاعى ءبىر بويجەتكەنى. - اكە-شەشەم ءوز تاربيەسىنىڭ جەمىسىن كورىپ جاتىر.

ۇلكەن اپكەم تۇرمىسقا شىققاننان كەيىن، ءبىر كۇنى ۇيگە قىدىرىپ كەلدى. داستارقاننىڭ باسىندا وتىرىپ، ءبىر اڭگىمەنى باستاي بەرىپ ەدى، اكە-شەشەم تىيدى دا تاستادى:

"ءوز ءۇيىڭنىڭ اڭگىمەسىن وسىندا اكەلىپ جەتكىزگەنىڭنىڭ الدى-ارتى وسى بولسىن! سەن ەندى تۇرمىسقا شىققان، ءوز ءۇيىڭ بار قىزسىڭ! تۇرمىسقا شىققان قىزدىڭ ءوز ءۇيىنىڭ اڭگىمەسى ءوز ءۇيىنىڭ ىشىندە قالۋى ءتيىس! ول سىرتقا شىقپاۋى كەرەك!"

اپكەم تىمىرايىپ ۇندەمەي قالدى.

وسىنى ەستىپ وتىرعان ەكىنشى اپكەم ۇزاتىلعاننان كەيىن ءوز ۇيىنە ءسىڭدى دە كەتتى. بارعان جەرىندە ءقادىرلى. ءتىپتى ءوزىنىڭ ءۇيىن بىزدەن ارتىق كورەتىندىگى سونداي، بىزگە ايىندا-جىلىندا ءبىر كەلەدى. مىنا "ءوز ءۇيىم، ءوز ءۇيىم" دەپ تاقىلداپ تۇرعان بالا - سول ەكىنشى اپكەمنىڭ ۇلى.

بالا كيىمدەرى سالىنعان قالتانى باۋىرىنا قىسىپ، قۇشاقتاپ العان كۇيى ءوزىن كۇتىپ تۇرعان كولىكتىڭ ارتقى ورىندىعىنا بارىپ وتىردى دا، جينالعان جۇرتقا قاراپ جىميىپ كۇلدى.

كولىك اقىرىن ورنىنان قوزعالدى. ول ءوز ۇيىنە بارا جاتتى.

- وسىنداي بالالاردان بولاشاقتا جاقسى ازامات شىعادى! - دەدى وسى جەردە تۇرعان مەكتەپتىڭ ديرەكتورى. - انىعىندا، وتان دەگەن قاسيەتتى ۇعىمنىڭ ءاۋ باستاعى العاشقى باسپالداعىنىڭ ءوزى بالانىڭ ءوز ۇيىنەن، ءوزىنىڭ تامىرىنان باستاۋ الىپ جاتادى. ول ءوزىنىڭ كىشكەنە وتانىن كوڭىلدى مۋزىكاعا دا، كامپيتكە دە ايىرباستاماي كەتتى.

---