InfoHub Logo

كوپ جاعدايدا ءوزىمىز ۇعىنا بەرمەيتىن قاتەلىكتەرگە بىرەۋلەردى كىنالاپ جاتامىز. وسى ادەتتەن ارىلتۋعا كومەكتەسەتىن وڭاي جول بار.

ۇيىقتاپ قالعاننان نەمەسە ۇزاق جينالعاننان ەمەس، كەيىنگى شەگەرۋگە كەلمەيتىن جاعدايلاردان، ءسىزدىڭ بوگەلە تۇرۋىڭىزدى قاجەت ەتەتىن وقيعالاردان كەزدەسۋگە كەشىككەن ساتتەرىڭىز بولعان شىعار؟ ارينە، ومىردە ءتۇرلى جاعدايلار بولادى. الايدا بۇعان ءسىز ەمەس، سىرتقى فاكتورلار اسەر ەتكەنىن ايتىپ، كوندىرە الدىڭىز با؟

جاۋاپ قانداي بولماسىن، سىزبەن كەزدەسۋگە بىرەۋ كەشىگىپ جاتسا، ونىڭ بوگەلۋىنە سەبەپ بولعان جاعدايلارعا قاراماستان، ونى ۇقىپسىزدىعى ءۇشىن كىنالاۋعا دايىن تۇراتىن بولارسىز؟

وزگەلەردىڭ قاتەلىگى نەگە كەشىرىلمەستەي كورىنەتىنىن، ال ءوز قاتەلىكتەرىمىزدى سىرتقى جاعدايلارمەن نەگە اقتاپ الۋعا دايىن تۇراتىنىمىز جايلى وسى ماقالادا اڭگىمەلەمەكپىز.

اتريبۋسيا قاتەلىگى دەگەنىمىز نە؟

وزگەلەردىڭ قاتەلىگىن اسىرەلەۋ – قالىپتى قۇبىلىس. بۇل تۇرعىدان ۋايىمداۋدىڭ قاجەتى جوق، سەبەبى بۇل پسيحولوگيالىق مەحانيزم بارىندە بار. ول اتريبۋسيا قاتەلىگى دەپ اتالادى جانە بىلاي تۇسىندىرىلەدى:

ءبىز وزگە ادامداردىڭ ارەكەتىن تۇلعالىق ەرەكشەلىگى تۇرعىسىنان، ال وزىمىزدىكىن – سىرتقى جاعدايلاردىڭ اسەرى تۇرعىسىنان تۇسىندىرۋگە بەيىمبىز.

بۇل قۇبىلىستى ءبىز كۇندەلىكتى بايقايمىز.

الايدا اتريبۋسيا قاتەلىگىنىڭ ەڭ قورقىنىشتىسى ءوز ارەكەتتەرىڭدى ءاردايىم اقتاپ الۋ ەمەس. ەڭ قيىنى – مۇنىڭ ادامدارمەن قارىم-قاتىناسىمىزعا كوشۋى. ءبىر ادام باسقا بىرەۋدىڭ جامان مىنەزىن ايتىپ، كىنالاپ، ال وزىنە كەلگەندە بۇعان سىرتقى اسەرلەردى كىنالايتىن كوپتەگەن مىسالداردى بىلەمىز.

دورەكى ادامدى كەزدەستىرگەندە، ول ادام نەگە ونداي بولدى دەپ اركىم ويلانا بەرمەيدى. ءبىرىنشى كەزەكتە ءبىز ونىڭ تۇلعاسىنا كوزقاراسىمىزدى كورسەتەمىز. ءبىراق ءبىز بۇلاي سالداردى سەبەپپەن شاتاستىرىپ، ادامداردىڭ جانە ءوزىمىزدىڭ ارەكەتتەرىمىزدى ساۋاتتى باعالاي الماي جاتامىز.

اتريبۋسيا قاتەلىكتەرىن ءتۇيسىنۋدىڭ ءوزى قارىم-قاتىناستاعى كوپتەگەن ماسەلەلەرگە جاڭاشا قاراۋعا مۇمكىندىك بەرەدى. الايدا ول تۋرالى ءبىلۋ «نە ىستەۋ كەرەك؟» دەگەن سۇراققا جاۋاپ بەرمەيدى. سوندىقتان مەن وسى پسيحولوگيالىق قاقپانعا ءتۇسىپ قالماۋدىڭ بىرنەشە قاراپايىم ەرەجەسىن ۇسىنامىن.

وزگەلەردى كىنالاۋدى قالاي دوعارۋعا بولادى؟

1. سىرتقى سەبەپتى ىزدەڭىز

بوگدە ادامنىڭ كەسىرىنەن قولايسىز جاعدايعا ءتۇسىپ قالعان بولساڭىز، وزىڭىزگە مىنا سۇراقتى قويىڭىز: «ونىڭ بۇل ارەكەتىنە وعان تاۋەلدى ەمەس قانداي دا ءبىر سەبەپ بولۋى مۇمكىن بە؟» جاعدايلارعا عانا سۇيەنىپ، ادامنىڭ جەكە قاسيەتتەرىن ەكىنشى پلانعا ىسىرىپ تاستاڭىز. سەبەبى جالپى ءبىزدىڭ مىنەزىمىز كوپتەگەن جاعدايلاردىڭ اسەرىنەن قالىپتاستى عوي.

جاۋاپ تابىلعان ساتتە ەموسيالارىڭىز بىرتىندەپ باسەڭدەيدى. ونىڭ ورنىنا ادامنىڭ ولاي ەمەس، نەگە بۇلاي ىستەگەنىن تۇسىنە باستايسىز جانە جاقىن دوسىڭىزدى، سۇيىكتىڭىزدى نەمەسە بيزنەس-سەرىكتەسىڭىزدى كىناراتتامايسىز.

2. نيەتتەس بولىڭىز

سەبەبىن تاپقان ۋاقىتتا، اشۋ مەن كوڭىل قالۋدىڭ ورنىنا جاناشىرلىق كەلەدى. سەبەبى ءسىز قيىن جاعدايعا ءتۇسىپ قالا جازداعان ادام ءۇشىن ۋايىمداي باستايسىز.

ەگەر بۇل سەزىم بىردەن كەلمەسە، وندا ءوزىڭىزدى سول ادامنىڭ ورنىنا قويىپ كورىڭىز. ءيا، ول كەشىگىپ جاتىر، ءبىراق وعان دەرەۋ تۋىستارىنا كومەكتەسۋ كەرەك بولعان شىعار نەمەسە جۇمىستان كۇتپەگەن تاپسىرما جۇكتەلگەن شىعار؟ ءسىز ونىڭ ورنىندا نە ىستەر ەدىڭىز؟

ادامنىڭ بويىنان كەمشىلىك ىزدەگەنشە سول ادامعا نيەتتەس بولىڭىز. سوندا ءسىز ءوزىڭىزدى تەرىس ويدان ارىلتىپ قانا قويماي، ادامدى بەكەرگە ايىپتامايتىن بولاسىز.

3. وتكەنمەن ءومىر سۇرمەڭىز

بۇل پسيحولوگيالىق قاقپان جايلى بىلگەندە، بۇرىنىراقتا وعان تۇسكەن جاعدايلاردى ەسكە تۇسىرە باستادىم. ەڭ الدىمەن سەزىنگەنىم — بۇل ءوز-وزىمدى ايىپتاۋ بولدى. سەبەبى وسىنداي ساتتەردە بىرەۋلەردى كىنالاپ، ءوزىمدى اقتاپ العان كەزدەرىم ەسىمە ءتۇستى. سونىمەن قاتار وزگەلەردىڭ سىرتقى جاعدايلاردىڭ سالدارىنان وزدەرىن اقتاپ العان كەزدەرىنە اشۋىم كەلدى.

ءبىراق بۇل سەزىمدەر مەنى ارتقا تارتپاس ءۇشىن مەن بۇگىندە ءار ويىم مەن ارەكەتىمدى باقىلاپ، وتكەنمەن ءومىر ءسۇرۋدى دوعاردىم.

ءوز قاتەلىكتەرىڭىزدى تۇسىنگەن ۋاقىتتا، وزگەلەردىڭ ارەكەتىنىڭ سەبەبىن ىزدەپ جانە ولارعا نيەتتەس بولۋدى ۇيرەنگەن كەزىڭىزدە، وزگەلەر مەن ءوزىڭىزدى كىنالاۋدان ارىلاسىز.

ءسوز سوڭىندا

اتريبۋسيا قاتەلىگىنەن ارىلۋ قيىن. سەبەبى بارلىق جەتىستىكتەرگە ءوزىمىز جەتكەنىمىزگە، ال ساتسىزدىكتەر سىرتتان بولاتىنىنا سەنىمدى بولىپ جۇرگىمىز كەلەدى.

الايدا ءومىر الۋان ءتۇرلى. جانە كەيدە ءبىزدىڭ سوزدەرىمىز بەن شەشىمدەرىمىزدىڭ سالدارى وڭ ناتيجە بەرمەيتىن جاعدايلار تۋىنداپ جاتادى. مۇنى تىم قۇرىعاندا ءوزىمىز مويىنداۋىمىز كەرەك. نە ءۇشىن؟ سەبەبى باسقاشا ارەكەت ەتە الاتىنىمىزدى ءبىلۋ ءۇشىن.

وزگەلەردىڭ تابىسى اسپاننان جاۋعان، ال ءوزىنىڭ ساتسىزدىكتەرى — تاعدىردىڭ تالكەگى دەپ ۇعاتىندار تابىسقا جەتە المايدى نەمەسە باقىتتى قارىم-قاتىناس قۇرا المايدى.

ساتتىلىك!

---