InfoHub Logo

پاۆلودار. قازاقپارات - پاۆلودارلىق جاس عالىم سەرىكبولسىن دۇيسەمباي نازاربايەۆ زياتكەرلىك مەكتەپتەرى مەن قازاق-تۇرىك ليسەيلەرىنە تۇسۋشىلەرگە ارنالعان تەست تاپسىرمالارى مەن لوگيكالىق ەسەپتەر جيناعىن جارىققا شىعاردى.

سەرىكبولسىن دۇيسەمباي بۇگىندە استانا قالاسىنداعى  نازاربايەۆ ۋنيۆەرسيتەتىنىڭ ەلەكترونيكا جانە ەلەكتروتەحنيكالىق ينجەنەريا فاكۋلتەتىنىڭ 4-كۋرس ستۋدەنتى. - بۇل كىتاپ 360 بەتتەن تۇرادى. مۇندا ەكى مىڭعا تارتا ماتىندىك جانە لوگيكالىق ەسەپتەر بار. سونداي-اق وقۋلىقتا كەڭىستىكتە ويلاۋ قابىلەتىن ارتتىراتىن ەسەپتەر دە ورىن العان. ازىرگە ءجۇز داناسى جارىق كوردى. باسپاعا جۇمسالعان قاراجاتتى ءوزىم كوتەردىم. ءبىر داناسى 5000 تەڭگەدەن ساتىلادى. ەلوردادا وقۋلىققا دەگەن سۇرانىس كۇن ساناپ ارتۋدا. سوندىقتان الداعى ۋاقىتتا بۇل كىتاپتى بىرنەشە ەسەگە ارتتىرۋ ويدا بار، - دەيدى س. دۇيسەمباي.

اۆتوردىڭ ايتۋىنشا، قازاق تىلىندە عانا جارىق كورگەن وقۋلىق قازىرگى تاڭدا ورىس تىلىنە اۋدارىلىپ، كوپ ۇزاماي ەكى تىلدەگى نۇسقاسى ۇسىنىلماق. سەرىكبولسىننىڭ ءتورتىنشى جىل قاتارىنان ماتەماتيكا جانە اعىلشىن ءتىلى پاندەرى بويىنشا دايىنداپ جۇرگەن شاكىرتتەرىنىڭ 90 پايىزى قالاعان وقۋ ورىندارىنىڭ ستۋدەنتتەرى اتانۋدا.

ايتا كەتەرلىگى، ى. التىنسارين اتىنداعى دارىندى بالالارعا ارنالعان وبلىستىق قازاق گيمنازيا-ينتەرناتىنىڭ تۇلەگى سەرىكبولسىن دۇيسەمباي  ءۇندىستاندا وتكەن حالىقارالىق جاس عالىمدار كونفەرەنسياسىنىڭ ءبىرىنشى ورىن يەگەرى، رەسپۋبليكالىق وليمپيادالاردىڭ جەڭىمپازى، بولگاريادا وتكەن حالىقارالىق ستۋدەنتتەر وليمپياداسىنىڭ ءبىر كۇمىس، ەكى قولا جۇلدەگەرى.

سونىمەن قاتار جاس بولسا دا ايتىس ونەرىندە دە باعىن سىناپ جۇرگەن اقىن جىگىت ءحى حالىقارالىق «شابىت» شىعارماشىل جاستار فەستيۆالىندە «ۇزدىك ادەبي شىعارما» سىيلىعىنا يە بولعان. تالدىقورعاندا وتكەن «جىر الىبى - جامبىل» اتتى رەسپۋبليكالىق وقۋشىلار ايتىسىنىڭ جانە شاپىق شوكيننىڭ 100 جىلدىعىنا ارنالعان ايماقتىق اقىندار ايتىسىنىڭ باس جۇلدەگەرى. 2010 جىلى سەرىكبولسىننىڭ «تۋعان جەر، بەسىك دۇنيە» اتتى العاشقى ولەڭدەر جيناعى شىققان، دەپ حابارلايدى pavlodarnews.kz. 

---