پاۆلودارلىق وقۋشىلار 3D پرينتەرىندە قول پروتەزىن جاساپ شىعاردى
پاۆلودارلىق وقۋشىلار مۇگەدەك بالاعا قۋانىش سىيلادى. ولاردىڭ قولدان قۇراستىرىپ، 3D پرينتەرىندە باسىپ شىعارعان مەحانيكالىق پروتەزىن سەگىز جاستاعى ساشا سوكولوۆ سىناقتان وتكىزبەك.
ءبىر قىزىعى، جاس ونەرتاپقىشتار جاساندى قولدى قۇراستىرعاندا ەشقانداي ارنايى قۇرالدىڭ كومەگىنە جۇگىنبەگەن، دەپ جازادى 24.kz. تۋا ءبىتتى دەنە كەمىستىگى بار ساشا ءۇشىن بۇل پروتەز اۋاداي قاجەت. ويىن بالاسى سول قولىنداعى ساۋساقتارىنىڭ جوقتىعىنان قيىندىق كورىپ كەلەدى.
«باسىندا قولايسىز بولىپ كورىنگەنى راس. ءقازىر قاراسام، مىنا جەردەگى ىلگەكتەرىن باسقالاي ورناتىپتى. وزىمە ۇناپ تۇر، ۋاقىت وتە كەلە جاڭا پروتەزگە ۇيرەنىپ كەتەتىن سياقتىمىن»، - دەيدى 2-سىنىپ وقۋشىسى الەكساندر سوكولوۆ.
اكەسىنىڭ ايتۋىنشا ساشا بۇرىن دا پروتەز كيگەن. ءبىراق ول ساۋساقتاردىڭ جوقتىعىن بىلدىرتپەۋگە عانا جاراپتى. ال جاڭا ۇلگىنىڭ كادىمگىدەي يكەمگە كەلەتىنى كوڭىلدەرىنەن شىققان.
«بۇرىنعى پروتەزبەن بالا قولىن قىسىپ، ساۋساقتارىن قيمىلداتا المايتىن. ال مىنا پروتەز ساۋساقتىڭ قىزمەتتەرىن تولىق اتقارادى»، - دەيدى الەكساندردىڭ اكەسى ۆياچەسلاۆ سوكولوۆ.
قازاق-تۇرىك ليسەيىندە ينفورماتيكا پانىنەن ساباق بەرەتىن ەرحان مىندەتبايعا قول پروتەزىن جاساۋ يدەياسى كەزدەيسوق كەلمەگەن. جەيدەسىنە قولىن جاسىرعان ساشانى كوشەدە كەزدەستىرىپتى. پروتەز جاساۋىنا وسى وقيعا تۇرتكى بولعان. ال شاكىرتتەرىمەن بىرلەسىپ جاساعان جوباسى ءساتتى شىقتى.
ينفورماتيكا ءپانىنىڭ ءمۇعالىمى ەرحان مىندەتباي: «3D پرينتەرى كەلگەننەن كەيىن ءبىز بىرنەشە مودەلدەردى جاساي باستادىق. سايكەسىنشە، ەڭ ءبىرىنشى قارادىق، ويلادىق. ەڭ جاقسى جۇمىس - ول بىرەۋگە پايدالى بولعان جۇمىس. ساشاعا جاساعانىم، بۇل ەڭ سوڭعى ۇلگىدەگى، قولعا قاتتى جاقىنداعان، يىلگىشتىگى ءبىراز جاقسى كەلگەن ءبىر پروتەز بولىپ وتىر. ەندى بۇل وقۋشىلاردىڭ «پروتەز» دەپ جاساعان العاشقى مودەلى دەۋگە بولادى»، - دەدى.
«پروتەزدى جاساۋعا ەكى اي كەتتى. قۇنى 15 مىڭ تەڭگەگە ءتۇستى. زاماناۋي پروتەزدەردىڭ باعاسى وتە قىمبات، 30 مىڭ دوللاردان باستالادى. بىزدىكى سياقتى مەحانيكالىق ەمەس. باتارەيا، موتورلارمەن جۇمىس ىستەگەن سوڭ تاعى قوسىمشا قاراجات جۇمسالادى»، - دەيدى 11-سىنىپ وقۋشىسى مارات ءابىلقايىروۆ.
جاس ونەرتاپقىشتار پروتەزدىڭ جاڭا ۇلگىلەرىن جەتىلدىرۋ ۇستىندە. كەلەشەكتە سەنسورلى قۇرىلعى ورناتىلعان، يىقتاعى جۇيكە تالشىقتارىنان كۇش الاتىن مودەلدى جاساپ كورمەك.
You Might Also Like
-
5 "ا" سىنىبى مەكتەپىشىلىك فەستيۆالعا ءوز دايىندىعىن كەش باستادى. باسقا سىنىپتىڭ تالىمگەرلەرى ءوز سىنىپتارىمەن دايىندىق جۇمىستارىن جۇرگىزىپ كەتكەن ۋاقىتتا 5 "ا" سىنىبىنىڭ تالىمگەر...
