InfoHub Logo

بۇگىن قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇيىمداستىرۋىمەن ءبىر مەزەتتە ەلىمىزدىڭ جەتى وبلىسىندا رەسپۋبليكالىق «ى. التىنسارين - 2016» پاندىك وليمپياداسى ءوتتى.

كۇندىزگى ساعات 12.00-دە باستالعان ءبىلىم سايىسى 14.00-دە اياقتالدى، - دەپ حابارلادى اتالمىش جوعارى وقۋ ورنىنىڭ باسپا ءسوز قىزمەتىنەن.

وليمپياداعا ورتا مەكتەپتەردىڭ 11ء-شى سىنىبىندا وقيتىن 4 مىڭنان استام وقۋشى قىز قاتىسىپ، سەگىز ءپان بويىنشا باقتارىن سىنادى. ولار: قازاق ءتىلى مەن ادەبيەتى، ورىس ءتىلى مەن ادەبيەتى، اعىلشىن ءتىلى، فيزيكا، بيولوگيا، گەوگرافيا، دۇنيەجۇزى تاريحى جانە حيميا پاندەرى.

ال الماتى قالاسى بويىنشا قىزدار ۋنيۆەرسيتەتىندە وتكەن وليمپياداعا 500-دەن استام مەكتەپ ءبىتىرۋشى وقۋشىلار قاتىستى.

ءوزىنىڭ العى سوزىندە وسى وقۋ ورنىنىڭ وقۋ ءىسى جونىندەگى پرورەكتورى ادىلەت تويبايەۆ مەكتەپ ءبىتىرۋشى قىزداردى قوس ديپلومدى ءبىلىم بەرۋ باعدارلاماسىمەن تانىستىردى. 

«قازىرگى تاڭدا ۋنيۆەرسيتەت شەتەلدىك 38 جوعارى وقۋ ورنىمەن، ياعني فرانسيا، تۇركيا، جۇڭگو، گەرمانيا، پولشا، سينگاپۋر، رەسەي ەلدەرىنىڭ وزىق تاجىريبەلى ۋنيۆەرسيتەتتەرمەن تىعىز بايلانىس ورناتقان. LAMS ۇلىبريتانيا ۋنيۆەرسيتەتىمەن، نييدە ۋنيۆەرسيتەتى مەن اقش-تاعى ميسسيسيپيي مەملەكەتتىك ۋنيۆەرسيتەتتەرىمەن قوس ديپلومدىق وقۋ باعدارلاماسى ىسكە اسىرىلىپ وتىر. وسى باعدارلاما بويىنشا بىتىرگەن ستۋدەنتتەر ەكى ديپلوم الادى. قوس ديپلومدى ءبىلىم بەرۋ - قازاقستاندىق جوعارى ءبىلىمنىڭ حالىقارالىق ءبىلىم بەرۋ كەڭىستىگىنە بىرىگۋىنىڭ اسا ماڭىزدى كورسەتكىشى»، - دەدى ول.

ەندى، وليمپيادانىڭ جەڭىمپازدارى مەن جۇلدەگەرلەرى الداعى ناۋرىز ايىندا انىقتالىپ، ماراپاتتالاتىن بولادى. ءار پانىنەن 1، 2، 3 ورىندى يەلەنگەن وقۋشى ءوزىنىڭ تاڭداعان ءپانى ماماندىعىنا ساي كەلسە جانە ۇبت-عا قاجەتتى ءوتۋ بالىن العان جاعدايدا شاكىرتاقىسىز ۋنيۆەرسيتەت رەكتورىنىڭ گرانتىنا يە بولادى.

ال، جۇلدەلى ورىن الماعاندارعا، ءبىراق وليمپيادانىڭ دەڭگەيىنەن وتكەندەرگە قازمەمقىزپۋ-عا ءبىرىنشى كەزەكتە قابىلدانۋعا قۇقىق بەرەتىن سەرتيفيكاتتار تابىس ەتىلىپ، وقۋعا تۇسۋگە 10% جەڭىلدىك جاسالادى. وليمپيادا جۇمىسىنىڭ ماكسيمالدى كورسەتكىشى - 100 بالل.

ايتا كەتەلىك، قىزدار ۋنيۆەرسيتەتىنىڭ رەكتورى، دينار نوكەتايەۆانىڭ باستاماسىمەن وسىمەن بەسىنشى جىل قاتارىنان ۇيىمداستىرىلىپ وتىرعان ءبىلىم سايىسىنىڭ باستى ماقساتى - مەكتەپ بىتىرۋشىلەرگە ماماندىق تاڭداۋعا كومەكتەسۋ، دارىندى وقۋشىلاردى ايقىنداۋ، جاستار اراسىندا ىرگەلى عىلىمي ءبىلىمدى دامىتۋ، ءبىلىمدى جاستاردىڭ ءوز قابىلەتتەرىن جۇزەگە اسىرۋىنا كومەكتەسۋ جانە دارىندى تالاپكەر قىزداردى قازاق مەملەكەتتىك قىزدار پەداگوگيكالىق ۋنيۆەرسيتەتىنە شاقىرۋ.

بۇگىنگى وليمپيادا الماتى وبلىسى بويىنشا الماتى، تالدىقورعان، جاركەنت قالالارى مەن رايىمبەك اۋدانىنىڭ كەگەن اۋىلىندا؛ جامبىل وبلىسى بويىنشا تاراز قالاسى مەن قورداي اۋدانىندا؛ وڭتۇستىك قازاقستان وبلىسى بويىنشا شىمكەنت پەن تۇركىستان قالالارىندا؛ قىزىلوردا وبلىسى بويىنشا قازالى، جاڭاقورعان، قارماقشى اۋداندارى مەن قىزىلوردا قالاسىندا؛  شىعىس قازاقستان وبلىسى بويىنشا سەمەي مەن وسكەمەن قالالارىندا؛ قاراعاندى وبلىسى بويىنشا قاراعاندى قالاسىندا جانە باتىس قازاقستان وبلىسى بويىنشا ورال مەن اتىراۋ قالالارىندا وتكىزىلدى.

inform.kz

---