پەداگوگتىڭ ءوزىن-وزى كاسىبي كەمەلدەندىرۋى
پەداگوگتىڭ ءوزىن-وزى كاسىبي كەمەلدەندىرۋى – پەداگوگتىق قاسيەتتەردى ءمۇعالىم ءوز الدىنا قوياتىن شارتتار مەن تالاپتارعا سايكەس جەتىلدىرىپ، دامىتۋعا باعىتتالعان پروسەسس.
پەداگوگتىڭ تابىستى ءوزىن-وزى كەمەلدەندىرۋى تالاپ شەگى ونىڭ قازىرگى داعدىلارى مەن ماشىقتارىنان نەداۋىر جوعارى قويىلادى دەگەندى بىلدىرەدى، ولاي بولماعان جاعدايدا قولدا بار مەن قالاناتىننىڭ اراسىندا قايشىلىقتار پايدا بولىپ، ءوزىن جەتىلدىرۋ ءۇشىن اتقارىلاتىن جۇمىستار ەش ناتيجە اكەلمەيدى.
پەداگوگتىڭ ءوزىن-وزى كەمەلدەندىرۋ ىسىندەگى جۇمىس ءورىسى بارىنشا كەڭ. كەز كەلگەن پەداگوگتىق ماشىقتا شەبەرلىكتى شىڭداي بەرۋگە بولادى. ءوزىن-وزى كەمەلدەندىرۋجولىندا الدىنا مىندەت قويۋدا قاتەلەسپەۋ ءۇشىن، پەداگوگتىڭ كاسىبي قىزمەتىنە قويىلاتىن ستاندارت تالاپتاردى انىقتاپ الايىق.
1. ءبىلىمدى بولۋ. ءبىر كىسى پەداگوگتى ايسبەرگكە تەڭەگەن ەكەن. ايسبەرگتىڭ ۇشار باسى عانا جۇرتقا كورىنەدى، ال تەرەڭدە قانداي قۋاتتى كۇش جاتقانىن بىلەتىندەر از. ءار پەداگوگ ەڭ الدىمەن جوعارى ءبىلىمدى، دۇنيەتانىمى كەڭ ادام بولۋى ءتيىس.
2. بالالاردى جاقسى كورۋ جانە ولارمەن ءتىل تابىسا ءبىلۋ – ءمۇعالىمنىڭ كاسىبي قاسيەتتەرىنە قويىلاتىن باستى تالاپتاردىڭ ءبىرى. تەك بالالارعا دەگەن شىنايى قاتىناس، ولاردىڭ باسىنا ءبىلىم سالىپ، ويلانۋدى ۇيرەتۋگە دەگەن شىنايى نيەت قانا مۇعالىمگە كاسىبي قىزمەتىندە بيىك ناتيجەگە قول جەتكىزۋگە مۇمكىندىك بەرەدى.
3. وقىتۋ ادىستەمەلەرىن مەڭگەرۋ دە – پەداگوگتىڭ اجىراماس كاسىبي قاسيەتى. پەداگوگ ونداي ادىستەمەلەردى نەعۇرلىم جاقسىراق مەڭگەرسە، ونىڭ ساباقتارى دا سوعۇرلىم جەمىستى بولماق.
4. ساباقتىڭ قۇرىلىمىنا، ماتەريالدى بايانداۋعا شىعارماشىلىق تۇرعىدان قاراۋ. ءار جاڭا ساباق – باياندالاتىن ماتەريالدى قايتادان «باستان كەشىرۋ». ول نەعۇرلىم قىزىقتىراق ۇسىنىلسا، وقۋشىلار دا ونى وڭايىراق يگەرەدى.
5. بالانىڭ ءار جاسىنا لايىق پسيحولوگيانى ءبىلۋ. بۇل پەداگوگتىڭ نەگىزگى بىلىمدەرىنىڭ ءبىرى، ول وقۋشىلاردىڭ كوپتەگەن قىلىقتارىنىڭ سەبەپتەرىن انىقتاۋعا كومەكتەسەدى.
جوعارىدا اتالعان تالاپتاردىڭ بارلىعى پەداگوگتىڭ كاسىبي قىزمەتى ءۇشىن ايرىقشا ماڭىزدى.
الايدا، ءار ءمۇعالىم تەك ءوز قاسيەتتەرىن ءوز بەتىمەن ساراپتاي كەلە جانە ولاردى تالاپتارعا سايكەستەندىرە وتىرىپ قانا ءوزىنىڭ كاسىبي قاسيەتتەرىنە باعا بەرىپ، قاي تۇسىن الدىمەن جەتىلدىرۋ كەرەك ەكەنىن سەزە الادى. پەداگوگتىڭ ءوزىن-وزى كاسىبي كەمەلدەندىرۋى– پەداگوگتىڭ ءوز قولىمەن ىستەلەتىن شارۋا!
You Might Also Like
-
وقىپ-ۇيرەنۋ پروسەسى اركىمدە ەرەكشە جۇرەدى، الايدا بارلىق ادامنىڭ ميى جاڭا اقپاراتتى بىركەلكى قابىلدايدى. ول قالاي جۇمىس ىستەيتىنىن بىلسەك، بۇرىن بىلمەگەن دۇنيەلەردى زەرتتەپ-بىلۋ ءۇشىن ەڭ ءتيىمدى ءادىس...
