وقىپ-ۇيرەنۋدى ءتيىمدى ەتەتىن 6 قۋلىق
وقىپ-ۇيرەنۋ پروسەسى اركىمدە ەرەكشە جۇرەدى، الايدا بارلىق ادامنىڭ ميى جاڭا اقپاراتتى بىركەلكى قابىلدايدى. ول قالاي جۇمىس ىستەيتىنىن بىلسەك، بۇرىن بىلمەگەن دۇنيەلەردى زەرتتەپ-بىلۋ ءۇشىن ەڭ ءتيىمدى ادىستەمە تاڭداپ الا الامىز. امەريكا عالىمدارى ادامنىڭ جادىن جاقسارتۋدىڭ جانە وقىپ-ۇيرەنۋ پروسەسىن ءتيىمدى ەتۋدىڭ قۇپياسى نەدە ەكەنىن انىقتاپتى.
ءسىز جاڭا ءتىلدى وقىپ، مۋزىكا اسپابىندا ويناۋدى ۇيرەنىپ نەمەسە وقىپ جاتقان كىتابىڭىزدىڭ ماعىناسىن تۇسىنۋگە تىرىسىپ جۇرگەنىڭىزدە ادام ميىندا بولاتىن پروسەستەردى جاقسىراق قاداعالاۋعا بولادى. وي ارەكەتىنىڭ پرينسيپتەرىن ءتۇسىنۋ ءۇشىن مىنا التى فاكتىنى ءبىلۋ قاجەت.
ءبىز كوزبەن كورەتىن اقپاراتتى جاقسىراق قابىلدايمىز
مي ءوز قورىنىڭ 50% كورۋگە جانە كورگەن نارسەنى اقپاراتقا اينالدىرۋ پروسەسىنە جۇمسايدى.
جاڭا مالىمەتتەردى كوزبەن كورىپ قابىلداۋ وقىپ-ۇيرەنۋ كەزىندە ماڭىزدى رول اتقارادى. وعان جارقىن مىسال – شاراپتى جاقسى كورەتىن 54 ادامعا وسى سۋسىننىڭ بىرنەشە نۇسقاسىن كوزىن جۇمىپ تۇرىپ ءدامىن تاتىپ كورۋدى ۇسىنعان ەكسپەريمەنت. قاتىسۋشىلار تاپسىرمانى ورىنداي المادى. كورۋ – ءبىز الەمدى قالاي قابىلدايتىنىمىزدىڭ ماڭىزدى بولشەگى، ونىڭ بۇزىلۋى ادامنىڭ وزگە سەزىم مۇشەلەرىنىڭ جۇمىسىن بۇزادى.
تاعى ءبىر ماڭىزدى ەرەكشەلىك – ءبىز ءماتىندى سۋرەت رەتىندە قابىلدايمىز. ءتىپتى ءقازىر وسى ماقالانى وقىپ وتىرعانىڭىزدا، ميىڭىز ءار ءارىپتى جەكە سۋرەت رەتىندە قابىلداپ تۇسىنەدى. ادام سۋرەتتەگى اقپاراتتى قالاي قابىلدايتىنىن ءتۇسىنۋ وقىپ-ۇيرەنۋ پروسەسىن نەداۋىر تيىمدىرەك ەتە تۇسەدى.
ءبىزدىڭ اعزامىزدىڭ تابيعاتىنىڭ مىناداي ەرەكشەلىگى بار: ءبىز توقتاپ تۇرعان (ستاتيكالىق) كۇيدەگى (سۋرەت سياقتى) زاتتارعا ەمەس، قوزعالىستاعى زاتتارعا كوبىرەك نازار اۋدارامىز. سوندىقتان، اڭگىمە وقۋ، ءبىلىم الۋ تۋرالى بولعاندا انيماسيا – ەڭ ءتيىمدى ءتاسىل.
قورىتىندى: ءوزىمىز وقىپ-ۇيرەنىپ جۇرگەن زاتتاردىڭ سۋرەتى سالىنعان فلەش-كارتالار جاساپ، ولارعا سوزدەر ءتۇرلى شريفتپەن جازىلعان گازەت-جۋرنال قيىندىلارىن قوسىپ، قانداي دا ءبىر فاكتىلەرگە كورنەكى قۇرال رەتىندە سىزبالار مەن دياگراممالاردى قولدانۋ كەرەك.
مايدا دەتالداردان كورى، ۇلكەن «سۋرەتتەر» ەستە جاقسىراق ساقتالادى
جاڭا تۇسىنىككە جولىققان كەزدە، ءوزىڭىز ءدال ءقازىر قابىلداپ وتىرعان اقپارات اعىنىندا اداسىپ قالۋ وڭاي. تىم كوپ اقپارات جۇگىنەن ارىلۋدىڭ ءبىر ءتاسىلى – ۇلكەن كولەمدى «سۋرەتتەرگە» قايتا ورالۋ، بىلەتىنىڭىزگە جاڭا، بۇرىن بىلمەگەن فاكتىلەر ۇستەۋ.
ادامنىڭ ميى جاڭا اقپاراتتى قابىلداعان كەزدە ول بۇرىن الىنعان اقپاراتقا اۆتوماتتى تۇردە قاتىستىرىلادى. ادامنىڭ ميى – سورەسى كوپ شكاف دەپ ەلەستەتىپ كورىڭىز. وندا نەعۇرلىم كيىم كوپ بولسا، ونى سوعۇرلىم ءجيى جيىستىرىپ، رەتتەپ، ءبولىپ ورنالاستىرىپ وتىراسىز. مىسالى، بىرەۋ ءسىزدىڭ سورەڭىزگە قارا جەمپىر (جاڭا اقپارات) سالعىسى كەلەدى. ول نە جەمپىرلەر تۇرعان سورەگە، نە قارا ءتۇستى كيىمدەردىڭ قاسىنا، نە بولماسا قىستىق، جىلى كيىمدەردىڭ قاسىنا بارادى. شىن مانىندە جاڭا جەمپىر تەك ءبىر سورەگە عانا تۇراقتايدى، الايدا ميدا جاڭا اقپارات وندا بۇرىننان بار اقپاراتپەن قاتىستىرىلا باستايدى. ادامعا جاڭا الدەنەنى كەيىن، ول بۇرىننان بەلگىلى فاكتىلەرمەن بايلانىس ورناتقاننان كەيىن ەسىنە ساقتاۋ وڭايىراق.
قورىتىندى: وقىپ-ۇيرەنۋ بارىسىندا جالپى كونتەنتتى ءبىر بەتتە نە ءبىر دياگراممادا كەسكىندەپ الىپ، سودان كەيىن مەزگىلىمەن ونى جاڭا اقپاراتپەن جانە تولىعىراق فاكتىلەرمەن ۇستەپ وتىرعان ءتيىمدى بولادى.
وقىپ-ۇيرەنۋگە جانە ەستە ساقتاۋعا ۇيقىنىڭ ىقپالى بار
زەرتتەۋلەر كورسەتكەندەي، الدەنەنى قايتالاۋ مەن جاڭا دۇنيە ۇيرەنۋ اراسىنداعى تۇنگى ۇيقى اسا پايدالى، ول ونىمدىلىكتى ارتتىرادى. قالعىپ الۋدىڭ دا اسەرى سونداي، سونىمەن قاتار ول وقۋ ساپاسىن دا جاقسارتادى.
بۇعان دالەل – كاليفورنيا ۋنيۆەرسيتەتىنىڭ عالىمدارى جۇرگىزگەن ەكسپەريمەنت. الدەقانداي تەستتەردى ورىنداۋ اراسىندا قالعىپ العان قاتىسۋشىلار سول ارالىقتا وياۋ وتىرعاندارعا قاراعاندا تاپسىرمانى جاقسىراق ورىنداعان. عالىمداردىڭ ايتۋىنشا، مي جاڭا دۇنيەنىڭ ءبارىن ءسىڭىرىپ الۋعا دايىن قۇرعاق گۋبكا سياقتى.
قورىتىندى: جاڭا اقپاراتتى ۇيىقتار الدىندا (كۇندىز نە تۇندە) قايتالاپ كورىڭىز، ال ويانعان كەزدە – ەسىڭىزدە قالعاننىن ءبارىن جازىپ الىپ وتىرىڭىز.
از ۇيىقتاۋ جاڭا اقپاراتتى ءسىڭىرۋ قابىلەتىن تومەندەتەدى
از ۇيىقتاۋ دۇرىس ەمەس، ويتكەنى ءبىز ۇيىقىنىڭ قانشالىقتى ماڭىزدى ەكەنىن تولىق ۇعىنباي جاتامىز. ۇيقى – اقپاراتتى ساقتاۋ كەپىلى. ۇيقى دۇرىس بولسا، ءبىز ايتەۋىر بىردەمەنى ۇيرەنىپ، جاتتاپ الاتىنىمىزعا سەنىمدى بولا الامىز. ۇيقىنىڭ جەتىسپەۋى جاڭا اقپاراتتى قابىلداۋداعى ميدىڭ تيىمدىلىگىن 40% تومەندەتەتىنىن بىلە ءجۇرۋ كەرەك.
گارۆارد مەديسينا مەكتەبىنىڭ زەرتتەۋلەرى مىنا جاعدايدى دالەلدەدى: جاڭا اقپاراتتى بەلسەندى وقىپ-ۇيرەنگەننەن كەيىن العاشقى 30 ساعاتتا ۇيقى جەتىسپەۋى ەڭبەگىڭىزدى ەش ەتەدى.
قورىتىندى: تاۋلىك بويى وقۋ دەگەندى ۇمىتىڭىز! بىلىمدەردى جادىڭىزدا ساقتاپ قالۋ ءۇشىن وقۋعا ۇيقىڭىزدى قاندىرىپ الىپ وتىرۋ كەرەك، بەلسەندى وي ارەكەتىنەن كەيىن دە ۇيىقتاپ الۋدى ۇمىتپاڭىز.
ءبىز بىرەۋلەرگە ۇيرەتكەندە ءوزىمىز دە جاقسى ەستە ساقتايمىز
ءبىز جاڭا الدەنەنى ءوزىمىز ۇيرەنىپ، ونى باسقالارعا دا ۇيرەتىپ جۇرگەن كەزدە اقپاراتتى مەڭگەرۋ تيىمدىلىگى بىرنەشە ەسە ارتادى. ءبىز باسقا ادامعا ەڭ ماڭىزدىسىن جەتكىزگىمىز كەلگەندىكتەن، ءوزىمىزدىڭ دە جادىمىزدا سول قالادى. بۇل پروسەسس بەيسانا تۇردە جۇرەدى: مالىمەتتەر ءبىزدىڭ سانامىزدا ىرىكتەلىپ، ءبىر جۇيەگە ۇيىمداسادى.
قورىتىندى: بىلگەنىڭىزدىڭ ءبارىن جازىپ وتىراتىن قويىن داپتەرىڭىز بولسىن نەمەسە بلوگ جۇرگىزىڭىز. ءتۇرلى يدەيالار مەن كونسەپسيالار تۋرالى ءسىز ونى وزگەلەرگە ۇيرەتۋىڭىز ءتيىس ساباق سياقتى ەتىپ جازىڭىز.
اقپارات كەزەكتەسىپ وتىرسا، وقىپ-ۇيرەنۋ دە ءتيىمدى
عالىم ديك شميدت وقىپ-ۇيرەنۋگە دەگەن جالپى تۇرعىنى «blockpractice» دەپ اتايدى: ءسىز ءبىر نارسەنى وقىپ-ۇيرەنۋگە بار كۇشىڭىزدى سالعاندا ول پراكتيكاعا شەكتەۋ قويادۆ. وسى عالىم وقىپ-ۇيرەنۋگە دەگەن «كەزەكتەستىرۋ» دەپ اتالاتىن، اقپاراتتى جانە ءسىز مەڭگەرىپ جۇرگەن داعدىلار مەن ماشىقتاردى ارالاستىرۋ تۇرعىسىنىڭ اۆتورى.
بۇل تۇرعىنى ءوزىنىڭ پسيحولوگيالىق زەرتحاناسىندا بوب بورك تا زەرتتەگەن. ەكسپەريمەنت بارىسىندا قاتىسۋشىلار تانىمال سۋرەتشىلەردىڭ كوركەمدىك ستيلدەرىن زەرتتەگەن. ءبىر توپقا ءبىر سۋرەتشىنىڭ 6 كارتيناسىن، سودان كەيىن باسقا سۋرەتشىنىڭ 6 كارتيناسىن قاراپ كورۋ ۇسىنىلدى. باسقا توپتا فوتوسۋرەتتەر كەزەكتەسىپ بەرىلدى. ەكسپەريمەنت اياقتالعاننان كەيىن قاتىسۋشىلار سۋرەتشىلەردىڭ دارا ءستيلىن قانشالىقتى جاقسى بىلەتىنى تەكسەرىلدى. سۋرەتتەر كەزەكپەن بەرىلگەن توپتىڭ تابىستىلىعى 60%، ال ەكىنشى توپتا –30% بولدى.
كەزەكتەستىرۋگە مىسال – سويلەۋ، تىڭداۋ جانە جازۋ بويىنشا تاپسىرىلاتىن شەت تىلدەرى بويىنشا ەمتيحان.
قورىتىندى: جاڭا تەحنيكانى ۇيرەنىپ، نە تاجىريبە جۇزىندە ەندى قولدانىپ جۇرگەنىڭىزدە، ونى باسقا بىرەۋىمەن؛ جاڭا اقپاراتتى مەڭگەرىپ جۇرسەڭىز – ونى وزىڭىزگە بۇرىننان بەلگىلى مالىمەتتەرمەن (مىسالى، شەت ءتىلىن ۇيرەنۋدە جاڭا جانە ەسكى سوزدەردى ارالاستىرۋ سياقتى) كەزەكتەستىرىپ وتىرىڭىز.
You Might Also Like
-
پەداگوگتىڭ ءوزىن-وزى كاسىبي كەمەلدەندىرۋى – پەداگوگتىق قاسيەتتەردى ءمۇعالىم ءوز الدىنا قوياتىن شارتتار مەن تالاپتارعا سايكەس جەتىلدىرىپ، دامىتۋعا باعىتتالعان پروسەسس.
