InfoHub Logo

قارابايىر پىكىر كورىنگەنىمەن، ءبىلىم – ادامزات بالاسى ءۇشىن ماڭىزدى دۇنيە. سونىمەن قاتار ول – كەلەشەگىمىزدىڭ نەگىزى، ىرگەتاسى ءتارىزدى. جالقىنىڭ عانا ەمەس، جالپىنىڭ بولاشاعى. سايكەسىنشە، ءبىلىم بەرۋ جۇيەسى ورتاق مۇددە قالىپتاستىرۋى ءتيىس.

قازاقستاندا، رەسەيدە، ۋكراينادا بولسىن زاماناۋي ءبىلىم بەرۋ جۇيەسى تۇيىققا تىرەلگەندەي. كسرو-دا تاجىريبەگە الىنعان ءبىلىم بەرۋ جۇيەسى قانشالىقتى جوعارى ناتيجە كورسەتكەنىمەن، ۋاقىت وتە كەلە كەڭەستىك مەملەكەتتەردىڭ ءبىلىم بەرۋ جۇيەسىنەن ىعىسىپ قالدى. ونىڭ ورنىن باسقان باتىس ۇستانعان تاجىريبە ەدى. ءوز كەزىندە زيالى قاۋىمنىڭ باس شايقاۋىنا سەپ بولعان باتىستىق ءبىلىم جۇيەسىنىڭ بۇگىنگى ناتيجەسى ماردىمسىز.

ارينە، ماسەلەنىڭ تۇپ-توركىنىنە بويلاپ، دايەكتى شەشىم قابىلداپ، نىق قادام جاساۋ ءۇشىن، ۋاقىت قاجەت. ءبىراق، وعان ۋاقىت جوق. بۇگىندە الەم كوز ىلەسپەس جىلدامدىقپەن وزگەرۋ ۇستىندە. تيىسىنشە، ءبىلىم مەن اقپارات جىلدام ەسكىرۋدە. ياعني بۇگىن العان ءبىلىمىمىز كۇنى ەرتەڭ-اق قاجەتسىز بولىپ قالۋى مۇمكىن.

ماتەماتيكا ساباقتارى ءوزىڭ سول ءپاننىڭ ءمۇعالىمى بولعان جاعدايدا عانا كەرەكتىگى جايلى ەسكى ءازىل بۇگىندە ماڭىزىن جوعالتپاعان. جاستار الىپ جاتقان ءبىلىم مەن ءىس جۇزىندە قاجەت بولاتىن ءبىلىم اراسىندا ەلەۋلى ايىرماشىلىق بار. بۇل رەتتە جۇمىسقا قابىلداۋ جونىندەگى حابارلامالاردا «جۇمىس تاجىريبەسىنىڭ بولۋى مىندەتتى» دەگەن جولداردىڭ ۇشىراسۋى دا سەبەپسىز ەمەس. وقۋ ورنىن جاڭا بىتىرگەن تاجىريبەسىز ماماندار جۇمىس بەرۋشىلەردىڭ قىزىعۋشىلىعىن تۋدىرمايدى.

بۇگىندە كىم دە بولسىن ءبىلىم بەرۋ سالاسىنىڭ از قارجىلاندىرىلاتىنى جونىندە ءسوز ەتۋدە. ال قارجى جەتىسپەۋشىلىگى نەگە اكەلىپ تىرەيدى؟ مەكتەپتەگى قۇرال-جابدىقتار ەسكىرەدى، ءبىراق بۇل ەڭ ماڭىزدىسى ەمەس. اتالعان سالا قىزمەكتەرلەرىنىڭ ماردىمسىز جالاقىسى پەداگوگيكالىق كادردى جاڭارتۋعا توسقاۋىل بولادى. زەينەت جاسىنا جەتكەن مۇعالىمدەر كەتەدى، ال ولاردىڭ ورنىن باسار جاڭا ماماندار ۇستازدىق قىزمەتكە اسىعار ەمەس. سەبەبى بىرەۋ – ماماندىقتىڭ مارتەبەسى (جانە جالاقىسى) كوڭىل تولتىرمايدى.

ودان بولەك، ءتۇرلى دەڭگەيدەگى ءبىلىم بەرۋ ورىندارىنىنىڭ اراسىندا ساباقتاستىق جوقتىعى تاعى بار: بالاباقشا مەكتەپكە بارۋعا دايىندامايدى، ال مەكتەپ جوعارى وقۋ ورنىنا تۇسۋگە قاجەت ءبىلىمدى بەرە المايدى. وسىلايشا، مەكتەپ ءبىتىرۋشى تۇلەكتەر ۇبت الدىندا مامانداردىڭ اقىلى كومەگىنە جۇگىنۋگە ءماجبۇر. سونىمەن قاتار، كوپتەگەن جوعارى وقۋ ورنىندا اقىلى بولىمگە تالاپكەرلەردىڭ بارلىعىن شەكتەۋسىز قابىلداۋدا. وقۋ ورىندارى ءۇشىن ول – وتە ءتيىمدى. ياعني قوسىمشا قاراجات كوزى. الايدا ناتيجەسىندە نەگە قول جەتكىزەمىز؟

انەكدوت: «ءوزىمنىڭ قانداي ينجەنەر ەكەنىمدى ويلاسام بولدى، دارىگەرگە قارالۋعا قورقامىن».

ايتىلعانداردىڭ ءبارىن سارالاي كەلە، مىناداي قورىتىندى جاساۋعا بولادى: زاماناۋي پوستكەڭەستىك ءبىلىم بەرۋ جۇيەسى تۇزەتۋلەرگە ەمەس، جاھاندىق رەفورماعا مۇقتاج.

---