InfoHub Logo

بۇقارالىق اقپارات قۇرالدارىنىڭ باسىن قوسىپ، قوعامدى تولعاندىرعان ساۋالدارعا جۋرناليستەر ارقىلى جاۋاپ بەرۋ ەلباسى نۇرسۇلتان نازاربايەۆتىڭ پرەزيدەنتتىك قىزمەتىنىڭ ءبىر قىرى. بۇنداي ءداستۇر بۇگىن دە جالعاستى، اقورداعا وتاندىق جانە شەتەلدىك ب ا ق وكىلدەرى جيىلىپ، ولاردىڭ قوعام ومىرىندەگى ماڭىزدى سان-سالالى سۇراقتارىنا ەلباسى جاۋاپ بەردى.

ايتا كەتەرلىگى، الداعى كۇندەرى قازاقستان پرەزيدەنتىنىڭ مەملەكەتتىك ساپارمەن وزبەكستانعا، سوسىن جۇمىس ساپارىمەن تۇركىمەنستانعا بارۋى جوسپارلانعان. الەمدىك اۋقىمدى شارانىڭ ءبىرى - ەكسپو-نىڭ اياقتالعانى كەشە عانا. ونىڭ سىرتىندا قانشاما كەزدەسۋلەر، فورۋمدار مەن القالى جيىندار ۇزدىكسىز ءجۇرىپ جاتتى. وسىنداي قاۋىرت كەستەلەر اراسىنان باق-پەن جۇزدەسۋگە ۋاقىت تاۋىپ، جۋرناليستەر تاراپىنان كوتەرىلگەن سان-سالالى ساۋالدارعا ساليقالى جاۋاپ قايتارۋ - بۇل دا پرەزيدەنت جۇمىسىنىڭ ءبىر ەرەكشەلىگى. ايتپاقشى، ءدال وسى ماسەلەنى جۋرناليستەر دە بۇگىنگى باسپا ءسوز ءماسليحاتىندا كوتەرىپتى. وعان ەلباسى: «پرەزيدەنتتىڭ جۇمىسى - قول قويۋمەن نەمەسە بۇيرىقپەن، زاڭمەن نەمەسە كەزدەسۋلەرمەن شەكتەلمەيدى. جۇمىستىڭ 90 پروسەنتى بۇقارالىق اقپارات قۇرالدارىنا كورىنەتىن اقپاراتتان تىس جاتىر. سىزدەرگە ايتارىم - بۇل اۋىر جۇمىس. ءوز تاجىريبەڭمەن بىرگە، دەنساۋلىقتىڭ مىعىمدىعى مەن ەنەرگيانى، پسيحولوگيالىق جانە ەموسيالىق ەنەرگيانى تالاپ ەتەدى. ارينە، ءوز قالاۋىڭداعى جۇمىس بولعاندىقتان، بۇل دا كومەك بولا الادى» دەپ جاۋاپ بەرگەن ەكەن.

سونىمەن اقوردادا وتاندىق جانە شەتەلدىك جۋرناليستەرمەن كەزدەسۋىندە قانداي ماسەلەلەر كوتەرىلدى؟ ەلباسى قوعامنىڭ وزەكتى ماسەلەلەرى بويىنشا نە ايتتى؟ وسىعان ءبىر شولساق...

ەكسپو ءوزىن ءوزى تولىقتاي اقتادى

جاقىندا عانا اياقتالعان حالىقارالىق كورمەنىڭ بۋى ءالى باسىلماعانى بەلگىلى. سوندىقتان بولسا كەرەك باسپا ءسوز ءماسليحاتىندا العاشقى ساۋالداردىڭ ءبىرى وسىعان قاتىستى بولعان-تىن. «شىعىندالعان اقشا وسى جەرگە كەلۋشىلەردىڭ، ساياحاتشىلاردىڭ ەسەبىنەن قازىرگى ۋاقىتتا قايتارىلدى. وسىعان دەيىن اتاپ وتكەنىمدەي، استانانىڭ بارلىق قوناق ۇيلەرى، مەيرامحانالارى، كونسەرت زالدارى مەن دۇكەندەرى تولىپ، وتە جاقسى سەرپىن الدى. استانا بيۋدجەتىنىڭ ءتۇسىمى وسى جىلدىڭ ىشىندە بىرنەشە ەسەگە ارتتى. بيزنەسمەندەر دە ءوز اقشالارىن تاپتى. مۇنىڭ بارلىعى دا ەلدىڭ قورجىنىن تولىقتىردى»، - دەدى قازاقستان پرەزيدەنتى. بۇل رەتتە پرەزيدەنت ەكسپو-نىڭ ەڭ باستى جەتىستىگى رەتىندە وسى كورمەنى جەڭىپ الىپ، وتكىزۋدىڭ ءوزى ەكەنىنە نازار بۇردى. «162 مەملەكەت وتكىزگىسى كەلدى. كورمەلەردىڭ تاريحى 100 جىلدى قۇرايدى. ءار تاقىرىپتا، ءار باعىتتا دۇنيەجۇزىندە كورمەلەر وتكىزىلەدى. وسىنىڭ الدىندا ميلانداعى كورمەنى بارىپ كوردىم. ول ۋاقىتشا جاسالعان عيماراتتاردىڭ ىشىندە ءوتتى. بىتكەننەن كەيىن بارلىعىن تاراتىپ الىپ كەتتى. سوندىقتان ەڭ ماڭىزدىسى، ءبىز جاس ەل بولعاننان كەيىن قازاقستاندى دۇنيەجۇزىنە كورسەتە ءبىلۋىمىز كەرەك. مۇنىڭ توڭىرەگىندە ءالى كوپ جۇمىس جاساۋ قاجەت»، - دەدى ەلباسى. پرەزيدەنتتىڭ اتاپ وتۋىنشە، كورمە بىتكەنىمەن عيماراتتاردىڭ بارلىعى بەكەر قالمايدى. «ءبىزدىڭ پاۆيلونىمىز قازاقستاننىڭ مۋزەيى رەتىندە قالادى. ەكى پاۆيلوندا قارجى ورتالىعى بولادى. ءبىر پاۆيلوندا قازاقستاننىڭ كورمەسى بولادى. مۇنان بولەك، ءبىر پاۆيلوندا ءىت-ستارتاپتار پاركى اشىلادى. وندا جاستارعا، عالىمدارعا جاڭالىقتار اشۋعا بارلىق مۇمكىندىك جاسالادى. سونىمەن قاتار تاعى ءبىر پاۆيلوندا مەكتەپ وقۋشىلارىن بىلىمگە، ماماندىققا باۋليتىن ورتالىق بولادى. ونى كورەيلەرمەن بىرگە جاساپ جاتىرمىز. ول دا جاستارعا پايدالى»، - دەدى ەلباسى.

ايتا كەتەرلىگى، كورمەگە 4 ميلليونعا جاقىن ادام كەلگەن. جالپى كىرىپ شىققان ادامداردىڭ سانى 25 ميلليوننان اسقان. 1400 قازاقستاندىق كومپانيا قۇرىلىس جانە باسقا دا جۇمىستارىنا قاتىستى، ولار 640 ملرد تەڭگەنىڭ قاراجاتى يگەردى.

اقش سانكسيالارىنىڭ قازاقستانعا قاتىسى جوق

ءماسليحات بارىسىندا ەلباسى نۇرسۇلتان نازاربايەۆ تاياۋداعى اقش پرەزيدەنتى دونالد ترامپپەن تەلەفون ارقىلى سويلەسۋىن تارقاتا ايتىپ بەردى. «مەملەكەت باسشىسىنىڭ تەلەفونمەن سويلەسۋلەرى - بۇل ادەتتەگى ءىس. قوڭىراۋ شالامىز. ول پرەزيدەنت بولىپ سايلانعان كەزدە، قاراشادا تەلەفون شالدىم. ول ۋاقىتتا ۇزاق اڭگىمەلەستىك. ول ءبىزدىڭ وڭىردەگى، رەسەيدەگى، قىتايداعى احۋالعا قىزىعۋشىلىق تانىتتى. ودان كەيىن ءبىز اقش پەن اراب ەلدەرىنىڭ كەزدەسۋى وتكەن ەر-ريادتا كەزدەستىك. كەيىن ول ماعان قوڭىراۋ شالدى. ونىڭ الدىندا اقش ەنەرگەتيكا مينيسترلىگىنىڭ باسشىسى ەكسپو-2017-گە كەلىپ، مەن قابىلداعان ەدىم. ول ريزا بولىپ، ەكسپوناتتارعا، كورمە ۇيىمداستىرۋ دەڭگەيىنە تاڭ قالدى. بارعاننان كەيىن ول باستىعىنا بايانداپ، ول ماعان قوڭىراۋ شالۋعا شەشىم قابىلداعان سياقتى»، - دەدى ەلباسى.

مەملەكەت باسشىسىنىڭ ايتۋىنشا، امەريكالىق ارىپتەسىمەن ەڭ الدىمەن قازاقستاندىق-امەريكالىق قارىم-قاتىناس جايىندا سويلەسكەن. سوسىن نۇرسۇلتان نازاربايەۆ اقش-تىڭ كومپانيالارى قازاقستانعا 40 ملرد دوللاردان استام ينۆەستيسيا سالعانىن، امەريكالىق بيزنەستىڭ قاتىسۋىمەن ەلىمىزدە 500 كومپانيا جۇمىس ىستەيتىنىن ايتقان. «مەن قازىرگى ۋاقىتتا بولىپ جاتقان سانكسيالاردىڭ اتالعان كومپانيالاردىڭ جۇمىسىنا ىقپال ەتپەۋىن سۇرادىم. ول مۇنىڭ قازاقستانعا قاتىسى جوقتىعىن راستادى جانە اقش قازاقستانمەن بۇل قارىم-قاتىناستاردى ودان ارى دامىتۋعا مۇددەلى ەكەندىگىن قۋاتتادى»، - دەدى نۇرسۇلتان نازاربايەۆ.

ايتا كەتەرلىگى، پرەزيدەنت نۇرسۇلتان نازاربايەۆ رەسەي مەن اقش باسشىلارى ۆلاديمير پۋتين مەن دونالد ترامپ جايلى نە ويلايتىنىن جەتكىزدى. «البەتتە، مەن بىزگە جاقىن سانالاتىن رەسەيمەن قارىم-قاتىناس تۋرالى سۇراي المادىم. بۇل تۋرالى العاشقى اڭگىمەمىز وتە ءساتتى بولدى (...) مەن رەسەي مەن رەسەيدىڭ باسشىسىن باتىستىڭ ونشا قابىلدامايتىنىن، شىنىندا، ول مۇلدە بولەك ادام ەكەنىن تىكە ايتتىم. سول كەزدە ول ماعان: «سەن بىلەسىڭ عوي، ءبىز گەرمانيادا پۋتينمەن كەزدەستىك. ەندىگى كەزەكتە ءبارى جاعدايعا بايلانىستى» دەپ جاۋاپ بەردى. ونداعى دا، بىزدەگى دە جاعدايعا بايلانىستى ەكەنى بەلگىلى. ءبىراق، مەنىڭشە، بۇل رەلستەن اۋىتقىپ، قارىم-قاتىناستى تۇزەۋگە بولاتىن سەكىلدى»، - دەدى نۇرسۇلتان نازاربايەۆ. پرەزيدەنت سونداي-اق، ەكى ەلدىڭ قارىم-قاتىناسى رەتتەلەر دەگەن سەنىم ءبىلدىردى. «ول (دونالد ترامپ) رەسەيدىڭ ۇلكەن مەملەكەت ەكەنىن ايتقان ەدى. ايتەۋىر ءبىر كۇنى ءبىز بۇل سۇراقتى شەشەمىز. ءسوزسىز، اقش پەن رەسەي ەڭ ءىرى يادرولىق دەرجاۆا ەكەنى بەلگىلى. الەمدىك ماسەلەلەردى رەسەيسىز دە جانە اقش-سىز دا شەشۋگە بولمايدى. سوندىقتان، اياعىندا بۇل پوزيسيا جاعىمدى جاققا قاراي وزگەرەر دەپ ويلايمىن»، - دەدى مەملەكەت باسشىسى.

جاڭا ءالىپبي جايىندا...

قوعامدا كوپ تالقىلانعان وزەكتى ماسەلەنىڭ ءبىرى - لاتىن ءالىپبيى. ءماسليحاتتا بۇل ماسەلە دە ەلەۋسىز قالماعان. جۋرناليستەر تاراپىنان قويىلعان سۇراققا ەلباسى دا ءوز پىكىرىن ءبىلدىردى. پرەزيدەنت قازاقستاندىق عالىمداردىڭ ۇزاق ۋاقىت جۇمىس ىستەپ، بارلىق تاريحتى قاراپ شىققانىن، وزبەكستان، تۇركيا ەلدەرىنىڭ تاجىريبەسى سارالانعانىن ايتقان. «جالپى ءالىپبي دەگەندە كومپيۋتەرگە بىردەن قويا سالۋ ءۇشىن ىلىك بولماۋ كەرەكتىگىن مەن عالىمدارعا ايتتىم. نوقاتى، ءۇتىرى بار، تەك قازاق دىبىسىنا ءتان 8 ءارىپ بار. مىنە سولاردى ناقتىلاۋ قاجەت. بارلىق ماسەلە وسىندا»، - دەدى ەلباسى. پرەزيدەنت ءالىپبي ماسەلەسى ءالى دە تالقىلاناتىنىن ايتىپ، الىپبيگە كوشۋ جوباسى سوڭىنا دەيىن تىڭعىلىقتى دايىندالۋى تيىستىگىن ەسكەرتتى. «قازاق تىلىندە شش، يۋ، يا ارىپتەرى جوق. «ياپونيانى» قازاقتار «جاپونيا» دەيدى. «چ»، «يۋ»، «يا»، «»، «» بەلگىلەرى جوق. ياعني ءبىز وسى ارىپتەردى قولدانۋ ارقىلى ناعىز قازاق ءتىلىن بۇرمالادىق. سول سەبەپتى ەندى نەگىزى تىلگە كوشپەكپىز. بۇل بۇكىل مەملەكەت ءۇشىن ماڭىزدى شارا جانە وندا اعاتتىققا جول بەرۋگە بولمايدى»،- دەدى نۇرسۇلتان نازاربايەۆ.

مەملەكەت باسشىسى ءسابىز ءسوزىنىڭ تالقىلاۋعا ۇسىنىلعان جاڭا الىپبيمەن جازىلىپ، ايتىلۋىنا قاتىستى قوعامدىق قىزۋ پىكىرتالاسقا وراي ويىن ءبىلدىردى. «كەشە ماعان ءسابىز دەگەن سوزدەگى «ءا» ءارىپىن قالاي ايتۋ قاجەتتىگى ينتەرنەتتە ءجۇر دەپ ايتتى. «ءا-نى» «ا» جانىندا «ە» ەكى ارىپتەن تۇرادى. سوندا «saebiz» دەپ وقىلادى ەكەن» دەپ. نەمىستە «مەكتەپ» دەگەندى ءۇش ارىپپەن ش ءارىپىن S، c، h ارىپتەرىمەن بەرەدى. فرانسۋز سوزىنە ءبىر ءسوزدى ايتۋ ءۇشىن 10 ءارىپ كەرەك. سوندىقتان ولاي دەۋ دۇرىس ەمەس»، - دەدى ەلباسى.

ايتا كەتەرلىگى، 2022 جىلدان باستاپ 1 سىنىپ لاتىن الىپبيىمەن وقيدى. بۇل رەتتە پرەزيدەنت الەمدەگى اقپاراتتاردىڭ 70 پايىزى لاتىن ارىپىمەن تارالاتىنىن، عىلىمي-تەحنيكالىق پروگرەس تە وسى تىلدە باسىم ءجۇرىپ جاتقانىن ەسكە سالدى.

بالانى ءبىلىمدى ەتىپ دۇرىس وقىتۋ ءۇشىن دۇرىس وقۋلىقتار كەرەك

ءماسليحاتتا جۋرناليستەر سوڭعى ۋاقىتتا سىننان كوز اشپاي كەلگەن ءبىلىم سالاسىنا قاتىستى پرەزيدەنت پىكىرىن سۇراعان. جۋرناليست بيىلعى گرانتتار بولۋدەگى بىلىقتان باستاپ، وقۋلىقتارداعى ولقىلىقتارعا دا توقتالىپ، پرەزيدەنتتەن «ءسىز وسىدان حاباردارسىز با؟»، - دەپ سۇراعان ەدى.

«نەگە ولاي بولدى؟ گرانتتار الۋ ءۇشىن ءتيىستى بالل بولۋى كەرەك قوي. ءتيىستى بالل الماعاننان كەيىن اناۋ دەپ، مىناۋ دەپ شىعا كەلەمىز. سولاي ءبىلىمدى بولا ما؟ ءار ادام ءوزىنىڭ بىلىمىنە ساي ءوتۋى كەرەك. مىنا نازاربايەۆ ۋنيۆەرسيتەتىنە تۇسەم دەگەن جىل سايىن 10 مىڭ ادام ارىز بەرەدى. 10 مىڭ ادامنىڭ كوپ دەگەندە 450-500ء-ى عانا تۇسە الادى. ول جەرگە ەشكىم ارالاسا المايدى. باسقارىپ وتىرعان جاپوننىڭ ازاماتى. بىزدە ادامبىز عوي، ماعان دا تۋعان-تۋىستارىم، دوستارىم كەلىپ: «مىنا جەردە وتىرسىڭ عوي ايتا سالساڭشى» دەيدى. مەن ول جەردە كاتسۋ دەگەن كىسى بار، سونىمەن سويلەس»، دەيمىن دە قويامىن»، - دەپ كۇلدى ەلباسى. سونىمەن قاتار قازاقستان پرەزيدەنتى عىلىم مەن بىلىمگە كەلگەندە قاتال، تالاپشىل بولۋىمىز كەرەكتىگىن ايتتى. «بىلىمىمەن تۇسەتىن بولسا سوندا سوڭىندا كەلە جاتقان، مەكتەپتە وتىرعان بالالار «وقۋعا ءتۇسۋ ءۇشىن ناعىز ءبىلىم كەرەك ەكەن عوي»، دەپ ويلانادى. زاڭدى بۇزعان بولسا قارايمىز. زاڭدى تۇرگە كەلتىرەمىز. زاڭدى بۇزباعان بولسا وتكەن بالالار گرانتتى الۋى كەرەك. وتپەگەندەرى المايدى. باسقا دا شارۋا بار عوي. دۇنيەدە ەلدىڭ بارلىعى ۋنيۆەرسيتەت ءبىتىرىپ جۇرگەن جوق. الەم حالقىنىڭ 2 پروسەنتىنىڭ جوعارى ءبىلىمى بار. ءقازىر دۇنيەنىڭ جارتىسى ساۋاتسىز»، - دەدى ق ر پرەزيدەنتى.

سوسىن ەلباسى مازمۇنى جاڭارتىلعان وقۋلىقتارعا قاتىستى قازاقستاندىقتاردىڭ سىنىنا وراي پىكىر ءبىلدىردى. «ءمان-جايدى انىقتايىق. بالالاردى دۇرىس تاربيەلەپ، دۇرىس وقىتۋ ءۇشىن، سۇرانىستى قاناعاتتاندىرۋ ءۇشىن دۇرىس وقۋلىقتار كەرەك. اتا-انالار دا ريزا بولۋى ءتيىس. ءبىلىم جانە عىلىم مينيسترلىگىنە پروبلەمانىڭ نەدەن تۋىنداعاندىعىن انىقتاپ، ءتۇسىندىرۋدى تاپسىرامىن»،- دەدى نۇرسۇلتان نازاربايەۆ.

رەسمي استانا سيرياداعى قاقتىعىسقا نە ىستەي الادى؟

ءماسليحاتتا ەلباسى نۇرسۇلتان نازاربايەۆ سيرياداعى جاعدايدى رەتكە كەلتىرۋ ماقساتىندا استانادا ءوتىپ جاتقان كەلىسسوزدەر تۋراسىندا پىكىر ءبىلدىردى. ايتقانداي، استانا پروسەسىنىڭ كەزەكتى راۋندى بۇگىن باستالعان بولاتىن. راسىندا بۇل الەمدىك اۋقىمداعى ماسەلە ەكەنى داۋسىز. ال رەسمي استانا قاقتىعىستى توقتاتىپ، بەيبىتشىلىك ورناتۋ ءۇشىن بۇل ۇدەرىسكە قالاي قاتىسىپ وتىر؟

«بۇل ماسەلە بويىنشا جەنيەۆا كەلىسسوزدەرى ءجۇرىپ جاتىر. وندا كوپتەگەن ەلدەر قاتىسۋدا. ولاردىڭ تىعىرىققا تىرەلىپ قالعان كەزدەرى دە بولدى. سول ۋاقىتتا يران، رەسەي، تۇركيا مەن وزگە دە ەلدەر قازاقستاننىڭ بارلىق مەملەكەتتەرمەن قارىم-قاتىناسى جاقسى بولعاندىقتان، ماعان كەلدى. كەلىسسوزدەردى جۇرگىزۋ الاڭى كەرەك ەدى. ءبىز كەلىسىمىمىزدى بەردىك، كەلىسسوزدەر ءجۇرىپ جاتىر، كەلەسى راۋندى بۇگىن باستالادى. وسى كەلىسسوزدەردىڭ ارقاسىندا كەيبىر جەرلەردە سوعىستى توقتاتىپ، دەەسكالاسيانىڭ ءۇش وشاعىن قۇرۋعا مۇمكىندىك تۋدى. بەيبىتشىلىك ورناي باستادى»، - دەدى نۇرسۇلتان نازاربايەۆ.

قازاقستان پرەزيدەنتىنىڭ سوزىنە سايكەس، بۇگىن دەەسكالاسيانىڭ كەلەسى الاڭى تالقىلاناتىن بولادى.

«ءبىز بۇعان كوپ ۇلەسىمىزدى قوسىپ جاتىرمىز دەپ ويلايمىن. سوڭعى جىلدارى ول ايماقتاردان 5 ميلليون ادام اۋىپ كەتتى. 186 مىڭ ادام قىرىلدى دەپ ايتىپ جاتىر. «نە ءۇشىن؟» دەگەن سۇراق تۋىندايدى. مىنە، سوندىقتان، ءبىز قازاقستاندا تۇراقتىلىقتى ءقادىر تۇتامىز. الەمدىك تاريحتىڭ ەڭ ايگىلى ەسكەرتكىشتەرى قيراپ قالدى. مادەنيەتى تونالدى. قانداي كۇنالارى ءۇشىن ولار جازالاپ جاتىر؟» - دەدى مەملەكەت باسشىسى.

پرەزيدەنت تاعى دا بۇل سۇراقتاردى شەشۋگە قازاقستان بەيبىت تۇردە شىققانىن ەسكە سالا كەتتى.

«مەنىڭشە، بەيبىتشىلىككە دەيىن ءالى الىس سەكىلدى. ءبىراق، ءار مەملەكەت ءوز قارىم-قابىلەتىنە قاراي ۇلەسىن قوسۋى كەرەك. ءبىز جۇمىستاعى ءوز بولىگىمىزدى اتقارىپ جاتىرمىز. بۇل جۇمىستى جالعاستىرۋ بەرۋىمىز كەرەك دەگەن ويدامىن»، - دەدى مەملەكەت باسشىسى.

بۇدان بولەك، قازاقستان پرەزيدەنتى سيرياداعى دەەسكالاسيا اۋماعىنا بىتىمگەرلەردى باعىتتاۋ مۇمكىندىگى جايىندا پىكىر ءبىلدىردى. «بىزگە دەەسكالاسيا بولىگىنە قاتىستى قويىلعان ماسەلە بار. بىرىنشىدەن، ءبىزدىڭ كونستيتۋسياعا سايكەس، شيەلەنىس وشاعىنا اسكەريلەردى تەك پارلامەنت شەشىمىمەن باعىتتاي الايمىز. ەكىنشىدەن، ۇجىمدىق قاۋىپسىزدىك تۋرالى شارت ۇيىمى جارعىسى بويىنشا وسىنداي كۇشتەردىڭ قاتىسۋى قاراستىرىلماعان. الايدا بۇۇ بۇنداي كۇشتەردىڭ باعىتتاۋى تۋرالى شەشىم قابىلداسا، وندا ءبىز بۇۇ مۇشەسى رەتىندە سول جەرگە ءوزىمىزدىڭ اسكەريلەردى جىبەرە الامىز»،-دەدى پرەزيدەنت.

تەڭگەدە سەكىرىس بولمايدى

جۇرتتى تولعاندىراتىن تاعى ءبىر ساۋال - تەڭگەگە قاتىستى. حالىق اراسىندا «ديەۆالۆاسيا تاعى بولادى» دەگەن اڭگىمە ەسىپ جۇرگەنى دە بەلگىلى. «ونىڭ ءبارى الىپ-قاشپا اڭگىمە. ءدال ءقازىر وعان ەشقانداي العىشارت جوق. تەڭگەنىڭ ەركىن باعامى دۇرىس. ەگەر ونى تىزگىندە ۇستار بولساق، مەملەكەت قارجىسىن جۇمساۋعا تۋرا كەلەدى. ارينە، مۇناي باعاسى 135 دوللاردان 40 دوللارعا قۇلاعان جاعدايدا كۇرت وزگەرىستەر بولادى. ءقازىر ونداي العىشارتتار جوق. مۇناي ءقازىر 52-55 دوللار باعانى ۇستاپ تۇر» - دەدى پرەزيدەنت.

ەلباسى دا گولوۆكيننىڭ بوكسىن تاماشالايدى

باسقوسۋدا نۇرسۇلتان نازاربايەۆ گولوۆكين مەن الۆارەس جەكپە-جەگىنە قاتىستى دا پىكىر ءبىلدىردى. پرەزيدەنتتىڭ پايىمىنشا، مۇنداي وقيعالار قازاقستاندىقتاردىڭ باسىم بولىگىن تەلەديدار الدىنا جينايدى. «بۇل وتە ماڭىزدى كەزدەسۋ. مەكسيكالىق الۆارەس - وتە تانىمال ادام، جوعارى ساناتتاعى بوكسشى»، - دەدى ەلباسى.

مەملەكەت باسشىسى بۇل كەزدەسۋدە وتانداسىمىز گەنناديي گولوۆكيننىڭ جەڭىسكە جەتەتىندىگىنە ءۇمىت ارتاتىندىعىن باسا ايتتى. «ول ورتا سالماقتا كاسىبي بوكستىڭ كورولىنە اينالىپ، مۇحامەد ءالي مەن مايك تايسونمەن ءبىر قاتاردا تۇرادى دەپ سەنەمىن. بۇل ول ءۇشىن وتە ماڭىزدى. وعان ۇلكەن تابىستار تىلەيىك. وسى ۋاقىتتا كورشىلەرىمىزگە ساپارلايتىندىعىما قاراماستان كورەمىن. بارلىعىمىز دا وعان جانكۇيەر بولامىز»، - دەدى نۇرسۇلتان نازاربايەۆ.

پرەزيدەنت سمارتفون ۇستاي ما؟

تاعى ءبىر توتەنشە ساۋال سمارتفوندار مەن موبيلدىك قوسىمشالاردى پايدالانۋعا قاتىستى قويىلعان بولاتىن. «ارينە، پايدالانامىن، SMS-تەر الامىن. تەلەفونىمنىڭ ءنومىرىن سىزدەرگە بەرەيىن بە؟»،-دەپ ازىلدەدى مەملەكەت باسشىسى. سوسىن ازىلدەن شىن سوزگە كوشكەن ەلباسى قازىرگى زامانعى كوممۋنيكاسيالاردى پايدالانۋ قاجەت بولعانىمەن، ولارعا قاتتى اۋەستەنۋدىڭ ءساتى تۇسپەيتىنىن جەتكىزدى. «الايدا بارلىق قاجەتتى اقپارات مەندە بار. قاجەت بولعاندا عالامتوردى ءبىر شولىپ شىعامىن. كەزىندە ءبىز قاراعاننان گورى كوپ وقىعانعا ۇيرەنگەنبىز. ءقازىر جاستار بارلىعىن ينتەرنەتتەن تابادى. ولاردىڭ كەزىندە ءبىز وقىعان كىتاپتارعا قارامايتىنىنا كۇيىنەمىن»،-دەدى پرەزيدەنت.

وسى ورايدا مەملەكەت باسشىسى بۇگىندە ەلىمىز باعىت العان سيفرلىق ەكونوميكادا ەسكەرىلگەن بارلىق قادامدار ساۋاتتى تۇردە ۇيىمداستىرىلۋى كەرەكتىگىن قاداپ ايتتى. ەلباسى ءوز سوزىندە بۇل باعىتتا ءتيىستى پروبلەمالار بار ەكەنىن، سوندىقتان دا بارلىق اۋىلدىق جەرلەردى ينتەرنەتپەن قامتاماسىز ەتۋ جۇمىستارى دەر كەزىندە ىسكە اسىرىلۋى قاجەتتىگىن جەتكىزدى. «بارلىق ادامدارعا ينتەرنەت جەتكىزىلۋى كەرەك. سول كەزدە تۇرعىنداردىڭ جاپپاي ينتەرنەت ساۋاتتىلىعى بىزگە «سيفرلىق قازاقستاندى» العا جىلجىتۋعا كومەكتەسەدى»،- دەپ تۇيىندەدى نۇرسۇلتان نازاربايەۆ.

دەرەككوز: inform.kz

---