ءپينتتىڭ "بەنتى"
سىرت قاراعاندا ءپينتتىڭ "بەنتى" مىقتى - اق سەكىلدى، قالاي ىرعاساڭ دا لىقىلدايتىن ەمەس، قايتا نىعىزدانىپ، شيراي تۇسەتىندەي. ال، ءبىراق، انىعىنا كەلگەندە ءپينتتىڭ "بەنتى" بوس، لىقىلداعىش "بەنت". تەك القىمىنا ءدان، بولماسا اقشا، ياكي بالىق، ءتىپتى "تەنتەك سۋ" تيسە دە لىقىلداپ بوساپ سالا بەرەدى.
مۇمكىن، سىزدەر پينت دەگەندى ماشينانىڭ، بولماسا اربا دوڭگەلەگىنىڭ ءبىر بولشەگى دەپ تە وتىرعان بولارسىزدار. جوق، ولاي ەمەس، بۇل وبلىستىق اۆتوتراكتور جابدىقتاۋ كونتورى باستىعىنىڭ اكەسىنىڭ اتى. بۇل ءپينتتىڭ اتاعىن شىعارىپ وتىرعان دا وسى تولىپ جاتقان "بەنتتەر" مەن زاپاس بولشەكتەر. بۇل پينت وبلىستاعى تراكتور مەن ماشينانىڭ ەڭ كەرەكتى بولشەكتەرىنىڭ اراسىنداعى — كۇندىز تەمىر قاجاپ، تۇنىنە مايعا ورانىپ، استىققا بولەنگەن "سۇر تىشقان". ۇستاتپايدى - اق، جىلت ەتىپ شىعىپ، جىلپ ەتىپ سۇڭگىپ، قولعا تۇسپەيدى - اق. ەگەر زەرتتەي قالساڭ، سكلادقا، ونىڭ باستىعى سامەكەڭە تىعىلىپ ءىزىن تاپتىرمايدى. تەك قانا ءتۇپ تامىرىن قازىپ، كوپ بولشەكتى ساناي باستاساڭ، جۇرگەن ءىزىڭ، كىرگەن ءىنىن تۇپتەيسىڭ. ويتكەنى، بەرىلگەن بولشەكتىڭ ەسەپ-قيسابى جوق. اسىرەسە، ەڭ كەرەكتى، ەڭ باعالى بولشەكتەردى متس ديرەكتورى قولى اشىق، بەرەگەن بولسا عانا الا الادى. قولىۆدا ءدانى، بالىعى مەن مايى، ەتى مەنەن شايى جوق ديرەكتور ونىڭ ماڭايىنان دا ءجۇرىپ كورگەن ەمەس.
كومباين مەن اۆتوماشينا، تراكتوردىڭ وتە قاجەتتى، تاپتىرمايتىن بولشەكتەرى "بارماق باسپاي، كوز قىسپايدى" اراسىندا ءجۇرىپ، جوق بولادى دا، وبلىستىڭ متس - تارى ورنىن سيپاپ قالا بەرەدى. سيپاپ، قارمالاپ جۇرگەندە كوزىنە تۇسەتىنى — 1717 سومنىڭ سيفرى. بۇل ارينە، قۇلقىنعا تۇسكەن كوپ بولشەكتىڭ ورنىنداعى كوز الدار. ءسويتىپ، سكلادقا تۇسكەن بولشەك كەمي باستايدى دا، ورنىندا قالعان سيفر قۇيرىقتانا سەمىرىپ، كولەمى زورايىپ، كەڭي باستايدى. وعان ايعاق سوڭعى 7 ايداعى جەتىسپەي قالعان بولشەكتىڭ ورنىنداعى 14300 سومنىڭ سيفرى.
مۇمكىن، وقۋشىلار ءپينتتىڭ وتكەن-كەتكەنى دەگەن سياقتى جاعدايىن بىلمەك بولىپ، قايدان شىققان، قايدان كەلگەن دەپ تە سۇرايتىن بولار. ونىڭ جاۋابى قىسقا. بۇل پينت دەگەن ءبىر سۋايت، نەشە رەت سوتتالعان، نەشە رەت بوسانعان، شارلاماعان جەرى جوق، الاياق.
تاعى ءبىر "قىزىعى" — ءپينتتىڭ "بەنتى" بوساعان كەزەڭدە ونىڭ دوسى سامەكەڭ دە "بەنتى" بوساپ قالادى. ءتىپتى كەيدە مايلى شاباقپەن "تەنتەك سۋدى" ءىشىپ وتىرىپ-اق اۋىرىپ قالادى، كەيدە 5 كۇن، كەيدە 3 كۇن جىم-جىلاس عايىپ بولىپ تا كەتەدى. ول كۇندەردە كەڭسە بويىندا سامەكەڭ قاتتى ناۋقاس، ال، ءوز ۇيىندە ساپ-ساۋ، كادىمگىدەي تاماق ءىشىپ، اراققا ماس بولىپ جاتادى. ال، ونان ءتاۋىر بولدى دەگەنشە ۇيىنە وتىن تاسىپ جۇرگەنى.
مىنە، ءسويتىپ، ءپينتتىڭ "بەنتىنىڭ" بوساۋ تاريحى وسىلاي باستالىپ، وسىلاي ءبىتىپ جاتىر دا، وزىنە ءتيىستى زاپاس بولشەگىن الا الماي متس-تەر وتىر. بۇعان قاراعاندا، ءپينتتىڭ "بەنتىن" بۇراۋعا ءادىل زاڭ مەن ءادىل سوت كەرەك!
You Might Also Like
-
"اكەمنىڭ اتى باپالاق، جاسىمنان جەپپىن شاپالاق، شاپالاق جەيتىن سەبەبىم، بولىپپىن سونداي سوتاناق."—
