قاباقتاعى اڭگىمە
— سالەمەتسىز بە، اپەندى؟
— ..؟
— اپەندى، سالەمەتسىز بە؟
— قايىرلى كەش!
— مازاڭىزدى المايمىن با؟
— جو-عا... تەك... سىزبەن قايدا جولىققانىم ەسىمە تۇسپەي تۇر.
— ءبىز جولىققان ەمەسپىز... حا-حا! بۇگىنگە دەيىن...
— ءا، سولاي دە...
— قاراسام: ءبىر كىسى شوشايىپ جالعىز ءىشىپ وتىر، قوي، سەرىك بولايىن، تانىسايىن دەپ ويلادىم.
— ءا-ا-ا...
— قالاي، تانىسقانىمىز ءۇشىن ىشەمىز عوي؟!
— ىشپەگەندە شە؟..
— مەن جالعىز وتىرىپ ىشكەندى ۇناتپايمىن. جولداس-جورالارىڭمەن نەمەسە دوسىڭمەن بىرگە ءىشۋ كەرەك.
— ال مەن ىردۋ-دىردۋدى ۇناتپايمىن، جالعىز وتىرعاندى قالايمىن...
— جالعىزدىڭ قۇدايعا عانا جاراسادى دەيدى...
— ماعان دا جاراسادى. تەك: ونىڭ جالعىزدىعى — بارىمىزگە كەرەك، ال مەنىڭ جالعىزدىعىم — وزىمە عانا كەرەك...
— ادەمى ايتتىڭىز! كەلىڭىز، ءسىزدىڭ وزىڭىزگە عانا كەرەك جالعىزدىعىڭىز ءۇشىن ىشەلىك!
— راقمەت سىزگە!
— مەنىڭ جانىما كەلىپ وتىرمايسىز با؟
— راقمەت، ءسىزدى مازالاعىم كەلمەيدى...
— وندا مەن ءسىزدىڭ جانىڭىزعا بارسام شە؟
— مەيلىڭىز!
— قۋانا-قۋانا بارامىن. ال، ءحالىڭىز قالاي، اپەندىم؟
— ءحالىم بە؟ ونىڭ نەسىن سۇرايسىڭ؟! ءبۇيتىپ جۇرگەنشە ولگەن ارتىق.
— و نە دەگەنىڭىز... سارىۋايىمعا سالىنباڭىز! قانە، ءسىزدىڭ دەنساۋلىعىڭىز ءۇشىن!
— ءسىزدىڭ دە!.. ال ءوزىڭىزدىڭ ءحالىڭىز قالاي؟
— مەنىڭ بە؟ تاماشا! وتە جاقسى!
— باقىتتى ەكەنسىز... ءارقاشان وسىلاي شات-شادىمان جۇرۋىڭىزگە تىلەكتەسپىن!
— ەندى وسى ءۇشىن الىپ قويالىق! مەن وسى قاباقتى ۇناتامىن.
— ال ماعان مۇلدە ۇنامايدى...
— سىزگە كازينو، ۇلكەن رەستوران كەرەك قوي؟
— جو-عا.
— سۋ جاعاسىنداعى كافەلەر كەرەك پە؟
— قاجەتى بەش-اق تيىن.
— ەندەشە نەگە وتىرسىز؟
— بىلمەيمىن... ءىشىپ قانا شىعايىن دەدىم... كەلىڭىز، ەندى ءبىر-بىر ريۋمكادان!
— ءسىزدىڭ كوڭىل-كۇيىڭىز كوتەرىلۋى ءۇشىن! ءسىزدىڭ ءوڭىڭىز قاشىپ وتىر... قايعىلى ەشتەڭە بولعان جوق پا؟
— بولعاندا قانداي! ءومىرىم تولعان قايعى-قاسىرەت!.. مەن شەشەمنەن ايىرىلدىم...
— قايعىڭىزعا ورتاقپىن. بەرىك بولىڭىز... سول كىسىنىڭ يماندى بولۋى ءۇشىن!.. قاشان قايتىس بولدى؟
— قىرىق بەس جىل تولدى... مەن وندا ون ۇشتە ەدىم...
— سابىرلى بولىڭىز' جازىلمايتىن جارا جوق...
— ماعان ءالى دە كەشە عانا بولعانداي...
— ءيا، قولىمىزدان كەلەر جوق... كونبەگەندە قايتەمىز! مەنىڭ شەشەم ولگەلى دە قىرىق بەس جىل بولدى، مەن دە ون ءۇش جاسىمدا قالدىم. كەل، ءىشىپ قويايىق!
— شەشەڭنىڭ ولگەنىنە قايعىرمايتىن سياقتىسىڭ عوي؟
— قويىڭىزشى!.. مەن دە زارلاپ قالدىم... ءبىراق، امال نە؟ اجال مەيىرىمسىز. قايعىمدى ۇمىتۋعا تىرىسامىن... ءتىرى تىرلىگىن ىستەۋگە ءتيىس!
— ال مەن ۇمىتپاۋعا تىرىسامىن!..
— ءومىر ءسۇرۋ كەرەك قوي!
— ومىردە نە قىزىق بار؟
— ال ولىمدە نە قىزىق بار؟ ارينە، ءبارىمىز دە كەتەمىز! ءبىراق اسىعۋدىڭ قاجەتى نە؟!
— ءسىز وپتيميست ەكەنسىز!
— ارينە! ءومىر قىمبات!.. ال ءسىز پەسسيميست ەكەنسىز!
— ارينە... توڭىرەگىڭ تولى قوقىس...
— ءسىز قوقىسقا قاراماڭىز، بايقاماي جۇرە بەرىڭىز.
— مەن كەرەڭ دە، سوقىر دا ەمەسپىن عوي... كەلىڭىز، ەندى بىردەن...
— وتە جاقسى! ءسىزدىڭ ۋايىم-قايعىدان ارىلۋىڭىز ءۇشىن!
— سىزگە وتە ريزامىن... كەلىڭىزشى، «سەن» دەپ سويلەسەيىكشى، «سەن» دەگەن الدەقايدا جاقسى!
— قۋانا قۇپتايمىن!
— ەكەۋىمىزدىڭ دوستىعىمىز ءۇشىن!
— كەل!.. تۇنجىراعاندى قوي، باۋىرىم! كوڭىلدەنىپ وتىر!
— بولمايدى... كورگەنىم قايعى-قاسىرەت قانا... اكەم دە ءولدى...
— نەتكەن باقىتسىزدىق... ول قاشان كەتتى؟
— وسى جاقىندا عانا، ەكى-اي بولدى... راكتان كەتتى.
— جىلاما، باۋىرىم... مەنىڭ دە اكەم ءولدى، وعان دا ەكى-اق اي بولدى، ول دا راكتان كەتتى.
— ەندەشە نەگە قايعىرمايسىڭ؟
— قايعىرعانمەن نە تابام؟ اكەمدى ءبارىبىر تىرىلتە المايمىن.
— ساعان قارايمىن دا، قايران قالامىن...
— نەمەنەگە تاڭداناسىڭ؟ ول قىرشىن كەتكەن جوق، ەكەۋمىزدىڭ جاسىمىزدى جاساپ، سەكسەن بەسكە كەلىپ كەتتى...
— نە دەيدى-اۋ! مەنىڭ اكەم دە سەكسەن بەسكە كەلگەن...
— اكەمدە ارمان جوق دەپ ويلايمىن، ول بارلىق تاۋقىمەتتەن قۇتىلىپ تىنىش تاپتى... سول كىسىنىڭ يماندى بولۋى ءۇشىن!
— كەل ... قالاي دەسەڭ دە، ءولىم قورقىنىشتى... ءولىمدى ويلاعاندا دۇنيە تارىلىپ كەتكەندەي بولادى...
— ال مەن ءولىمدى ويلاسام، ءومىر قىمباتتاي تۇسەدى!
— مەنىڭ ايەلىم كەتىپ قالدى... ايەلىم... ول قورلىققا قالاي شىداماقپىن؟
— ءىشىپ قويالىق، ءبارى دە ۇمىتىلادى... كەتسە، بارسىن، مەنىڭ دە ايەلىم كەتىپ قالدى...
— ونىڭ نەسىنە قۋاناسىڭ؟ سەن ونى سۇيمەگەنسىڭ عوي، ال مەن ونسىز ءومىر سۇرە المايمىن...
— ە، نەگە؟.. مەن دە جانىمداي سۇيگەنمىن، ءبىراق كۇشتەپ سۇيىكتى بولا الاسىڭ با؟ قاشىپ كەتتى،— جولى بولسىن!
— ال مەن ءقايتۋىم كەرەك؟
— ءتايىر-اي! ونىمەن ايىرىلىس تا، تاعى ۇيلەن! ءبىتتى! كەل، سول ءۇشىن الىپ قويالىق... ماحاببات ءۇشىن!
— تۇرا تۇرشى... مەنىڭ تاعى ءبىر قاسىرەتىم بار: اشىنام ەكى اپتاعا جول ءجۇرىپ كەتتى...
— قاسىرەتتى تاپقان ەكەنسىڭ! مەنىكى دە جول ءجۇرىپ كەتتى. مەن دە ساعىنىپ ءجۇرمىن، تاعاتسىز توسىپ ءجۇرمىن... كەل، سەنىڭ اشىناڭ ءۇشىن!
— ساعان قاراپ وتىرىپ جىندانىپ كەتەتىن شىعارمىن... مەن سىرقاتپىن! ۇقتىڭ با؟ سىرقاتپىن مەن...
— شىنىمدى ايتسام، ساعان جانىم اشيدى. كەل، سەنىڭ دەنساۋلىعىڭ ءۇشىن! تارتىپ جىبەرسەڭ، اۋرۋىڭدى دا ۇمىتىپ كەتەسىڭ...
— ۇمىتىلا قويسا...
— سەنىكى اسقازان جاراسى ما؟
— ونى قايدان ءبىلدىڭ؟
— مەنىڭ دە اۋرۋىم سول.
— ويىڭدا دانەڭە جوق قوي؟
— وتقا ءتۇسىپ ولەيىن بە؟ راك بولسا، قايتەر ەدىڭ؟ بۇعان دا شۇكىرشىلىك... كەل، راكپەن اۋىرماعانىمىز ءۇشىن الىپ قويالىق!
— و، قۇداي، مەنىڭ قىر سوڭىمنان نەگە قالمايسىڭ سەن؟!
— تاعى نە بوپ قالدى؟
— جۇمىستا كوزتۇرتكى ەتە بەرەدى، جارتى جىل بولدى جوعارىلاتپاي ءجۇر... باستىقتاردىڭ ىشىندە جاقىن-جاقپايىم جوق، مەنى ەشكىم سۇيەمەيدى...
— حا-حا-حا! كۇلەيىن-اي، باۋىرىم، كۇلەيىن-اي! كەلشى، تارتىپ جىبەرەيىك!
— سەن كۇلەتىندەي نە ايتتىم؟
— جو-عا... حا-حا-حا!.. تۋرا مەنىڭ جاعدايىم! مەنىڭ دە قىزمەتىم وڭىپ تۇرعان جوق...
— ەندەشە نەمەنەگە ءماز بولاسىڭ؟
— ال جىلاعاندا نە تابام؟ قىزمەتىمدى دۇرىس ىستەپ ءجۇرمىن، ەشقانداي سۇيەۋ-قولداۋسىز-اق جان ساقتايمىن! كەل، ازداپ الىپ قويايىق!
— توقتاي تۇر، بالەم، پاتەراقىڭدى تولەي الماي ءبىر كۇنى ۇيشىگىڭنەن قۋىلارسىڭ، سوندا كورەرمىن قالاي جۇرگەنىڭدى.
— اح-حا-حا-حا!.. ءتۇھ، وڭەشىمە كەتىپ قالدى-اۋ!.. ىشەگىم تۇيىلەتىن بولدى-اۋ!..
— سولاي دە؟!
— مەنى ۇيدەن قۋىپ شىعىپ، دۇنيە مۇلكىمدى قاتتاپ جازىپ تاستاعالى قاشان!..
— راس پا؟ مەنى دە ءسويتتى: راديوقابىلداعىشىمنان، كىلەمىمنەن ايرىلدىم...
— مەنىڭ ەسكى-قۇسقىمدى دا ەسەپكە الىپ قارىق بولدى...
— سوعان ريزا ەكەنسىڭ عوي؟
— قابىلداعىشىم قاراڭ قالعان بىردەڭە بولاتىن، ال كىلەمىمنىڭ قىزىعىن قاندالا مەن قاراكۇيە كورىپ جۇرگەن... ە، مەيلى، اقشا تاپقان سوڭ جاڭالارىن الامىن!
— سەنىڭ ءۇمىتىڭ بار ەكەن، مەندە ەشتەڭە جوق...
— سەندە نەگە جوق؟
— ءاي، قويشى ەندى... وسى ايتقانىم دا جەتىپ جاتىر...
— سوعان سونشاما كۇيرەپ... قۇي، قانە!
— كۇيرەمەگەندە شە... سايلاۋدىڭ قورىتىندىسى دا ماسقارا بولدى! ءبىزدىڭ اياۋلى پارتيامىز قانشاما داۋىستان ايىرىلدى...
— وعان سەن دە مۇشەسىڭ بە؟ سول كەرەك بالەمگە!
— نەمەنە دەپ كوكىپ وتىرسىڭ؟!
— سەزبەيسىڭ، ءا؟ وماقاسىپ ءبىر قۇلاعان سوڭ ەكىنشىدە دۇرىستاپ ويلانىپ-تولعاناتىن بولادى... قازىرگى قالپىندا وكىمەت باسىنا كەلسە، ماسقارانىڭ كوكەسى سوندا بولاتىن ەدى.
— قويشى، كەل، ءىشىپ جىبەرەلىك...
— ىشپەگەندە شە!
— ءبىر اينالدىرعاندى شىر اينالدىرادى عوي...
— تاعى دا جىلاۋعا كىرىستىڭ بە؟
— ەندى قايتەيىن... كەشە «قورىلداقتار» تاعى ۇتىلىپ قالدى... ءبىز بيىل چەمپيون بولا المايمىز...
— ءاي، ونىڭ نەسىنە كۇيەسىڭ؟ ءبىزدىڭ «قورىلداقتار» ۇيقىسىنان ەندى وياناتىن بولادى، ونىڭ جاتتىقتىرۋشىسىن سويىلداپ قۋىپ تاستايتىن ۋاقىت جەتتى! توقتاي تۇر، ولار كەلەسى جىلى قاتىرادى ءالى!
— كەل، دوستىم، كەل!
— ەگەر موينىمدا قارىز بولماسا...
— تاعى باستادىڭ با؟ سوندا قارىزىڭ قانشا؟
— تۋرا ءتورت مىڭ لير...
— سول-اق پا؟ مەندە دە سونشاسى سىرەسىپ تۇر...
— وعان نەسىنە قۋاناسىڭ؟
— اسىلىپ ولەيىن بە؟! اتتى قامشى ورگە ۇمتىلدىرادى، جىگىتتى قارىز جۇمىسقا قۇلشىندىرادى...
— الدىمىزدا اپات تۇر!
— تاعى نە دەپ كەتتىڭ؟ ول نە اپات؟
— سەن گازەت وقيسىڭ با؟
— وقىماعاندا شە!
— ءبىزدىڭ پلانەتاعا ءقاۋىپ ءتونىپ تۇر! كومەتا مەن جەر سوعىلىسادى...
— زاماناقىر عوي؟ قىزىق بولادى دەسەڭشى! حا-حا-حا!
— ءبارىمىز دە قۇريمىز!
— سول كەرەك! حا-حا-حا! بۇيىرسا راقاتتانىپ ءبىر كۇلەتىن بولدىق-اۋ! ال قاعىپ سالايىق!
— ءومىر ابدەن تويدىردى.
— ءاي، سەن نەگە وسىنشا مىلجىڭداي بەرەسىڭ؟
— جاي...
— جاي بولسا،— مىلجىڭداما!
— ە، مەن ىشۋگە سىلتاۋ تابۋ ءۇشىن مىلجىڭدايمىن عوي...
— ءا، باسە! جارايسىڭ!.. حا-حا-حا!
— نەمەنەگە كۇلەسىڭ؟
— كوڭىلدى بولسىن دەيمىن... كوڭىلسىز كۇيدە ىشۋگە بولمايدى!
— وح-حو-حو!..
— حا-حا-حا!..
شاعىن كاباكتا ينە شانشار جەر جوق ەدى. ساتۋشىعا قارسى قابىرعادا ۇلكەن اينا ءىلۋلى تۇرعان. اينا الدىنداعى شاعىن ستول باسىندا كەش بويى ءبىر كىسى وتىرعان. ول ءوزى مەن ءوزى سويلەسىپ، بىرەسە جىلادى، بىرەسە كۇلدى...
كەنەت شالدىر-گۇلدىر ەتتى! الگى كىسى اينانى اۋەلى ريۋمكامەن، سونسوڭ گرافينمەن پەرىپ جىبەرگەن-دى. اينانىڭ كۇلپارشاسى شىقتى، الگى كىسىنىڭ سويلەسىپ وتىرعان سەرىگى قازاعا ۇشىرادى.
سوندا قازاعا ۇشىراعان قايسىسى: وپتيميست پە، پەسسيميست پە؟
ورىسشادان اۋدارعان عابباس قابىشيەۆ
You Might Also Like
-
استانا قالاسىنا جولىمنىڭ تۇسكەنى بيىل عانا. قازاقستان رەسپۋبليكاسىنىڭ ۇلتتىق مەديسينالىق عىلىمي ورتالىعىنا وبلىستىق دەنساۋلىق ساقتاۋ باسقارماسىنىڭ كۆوتاسىمەن باراتىن بولعانداعى قۋانىش شەكسىز ەدى.
