InfoHub Logo

ءبىز قالام تەربەگەلى وتىرعان تۇلعا سابيتبەك ەلەۋوۆ تۋراسىندا «قالامىنا ءقادىر دارىعان قالامگەر» دەگەن تىركەستى اۋىز تولتىرىپ ايتۋعا بولادى. كەڭەستىك كەر زاماننىڭ كەگەجۋ تارتقان تۇسىندا شەندى مەن شەكپەندىنى شىمشىما سوزدەرىمەن شەنەپ، ادىلەتسىزدىكتى اشكەرەلەپ، ءتىپتى كەي سوزدەرى پەريفرازاعا اينالىپ كەتكەن بەلگىلى جۋرناليست، «ەڭبەكشى قازاق» («ەگەمەن قازاقستان») گازەتىنىڭ مەنشىكتى ءتىلشىسى بولعان سابيتبەك ەلەۋوۆتىڭ ەل ءۇشىن ەتكەن ەڭبەگى ەلەۋسىز قالماسى انىق.

ەڭبەك جولىن وتىزىنشى جىلداردىڭ ورتا شەنىندە «ەڭبەكشى قازاق» گازەتىنەن باستاپ، قازاق جۋرناليستيكاسىنىڭ دامۋىنا ايرىقشا ۇلەسىن قوسقان كورنەكتى وكىلى جانعان جۇلدىزداي جارق ەتىپ وتە شىققان جالعان عۇمىرىندا سوڭىنا ۇلگىسى مەن ءىزىن قالدىرا ءبىلدى. ماقالانىڭ مايىن تامىزىپ جازاتىن ۋىتتى تىلىنەن بولەك، وتكىر فەلەتوندارى ماڭىزدى ماتەريالدارىندا ۇجىمداستىرۋ كەسەلى اشىق سىنالعان.

سول جىلدارى سابيتبەك جازعان «باتپاقارانىڭ بەتپاققارالارى» دەگەن فەلەتونى حالىقتى كۇيزەلتىپ، اشتىقتان كەيىن ەل باسقارعان اتقامىنەرلەردى سىناپ مىنەپ، ولاردىڭ ادىلەتسىزدىگىن اشكەرە ەتە بىلگەن. وسى ماقالاعا بايلانىستى «ەڭبەكشى قازاق» گازەتىنىڭ رەداكسياسى جانىنان كوميسسيا قۇرىلىپ، ەل اراسىندا تەكسەرۋ جۇرگىزىپ، فاكتىلەر راستالىپ، كىنالىلەر قىزمەتتەرىنەن قۋىلعان ەكەن. وسىدان-اق ەل جايىنا ەڭبەگىن ساتپاعان ەلەۋوۆتىڭ ەرەكشەلىگىن، ءتىلىنىڭ جاتىقتىعىن، ايتار ويىنىڭ وزەكتىلىگىن انىق اڭعارۋعا بولادى. شىندىقتىڭ اۋزىن بۋعان، اقيقاتتىڭ اتاسىن كورگە كومگەن سول كەزەڭدە دە ايتارىن اشىق جەتكىزىپ، الاشتىڭ يگىلىگى ءۇشىن، حالىقتىڭ قامى ءۇشىن قالام تەربەگەن قالامگەردىڭ ادامي بولمىسى مەن بيىك پاراساتى ەل اۋزىندا.

ونىڭ الگىندە ايتقانىمىزداي «باتپاققارانىڭ بەتپاققارالارى»، «اسىرا سىلتەۋ بولماسىن، اشا تۇياق قالماسىن»، «الاپايەۆ ازدىردى، تورتايەۆ توزدىردى، يبراگيموۆ ەڭىرەتتى»، «بەلسەندى، بەلسەندى، بەلسەندىگە ەل سەندى، اقىرىندا ەل كۇڭىرەنىپ تەڭسەلدى» دەگەن سوزدەرى حالىق اراسىندا پەريفرازاعا اينالىپ كەتكەلى قاشان. سونداي الماس قىلىشتاي قيىپ تۇسەر وتكىر تىلىمەن قازاق بالاسىنىڭ ساناسىنىڭ ويانۋىنا سەپتىگىن تيگىزە وتىرىپ، كوپتەگەن قاتەرلەردەن ساقتاندىرا دا ءبىلدى. تالانتتى قالامگەردىڭ تالاي جازعان ەڭبەگى كەشەگى «ەڭبەكشى قازاقتىڭ» اشىق الاڭىندا ايتىلعان اقيقات ەدى. «گازەت حالىقتىڭ كوزى، قۇلاعى، ءھام تىلىنە اينالعان» سول كەزەڭدە ەل ىشىندەگى بۇلىكتى بۇكپەسىز ايتىپ، شەنىن ەمەس ەلىن ويلاعان، قالامىمەن قازاقتىڭ مۇڭىنا تەرەڭ بويلاعان ازامات ءجۋرناليستىڭ ارقالاعان جۇگى دە اۋىر بولدى.

تامىرىندا قازاقتىقتىڭ قانى تامعان تەكتى ازامات قاي سالادا بولماسا دا الاش ءۇشىن ابىرويلى ىسىمەن كورىنە ءبىلدى. ونىڭ ماقالا جازۋدان بولەك اتا-انا قامقورلىعىنسىز قالعان بالالارعا ارناپ ينتەرنات ءۇيىن اشىپ، ءوزى باسقارىپ ۇلىق ىسكە ۇيىتقى بولعانى ءبىر بولەك اڭگىمە. «جەتىم كورسەڭ جەبەي ءجۇر» دەگەن ءسوزدى اتام قازاق اتاق ءۇشىن ايتپاسا كەرەك. سول حالىق دانالىعىنىڭ ايقىن كورىنىسىندەي ەلەۋوۆتىڭ ەلەنبەي قالعان جەتىمدەرگە قول كومەگىن دە، اسارىن دا اياماعان ۇلكەن جۇرەگى ءاردايىم قارا حالىققا بۇرىپ تۇرۋشى ەدى.

ءدامدى ءسوزىمىزدىڭ دالەلى دە سول، تورعاي، اقتوبە وڭىرلەرىندە جەتىمدەرگە ارنالعان ينتەرنات اشىپ، ونى باسقارىپ، سونداعى جەتىمدەردىڭ جەتىلۋىنە، ومىردەن ءوز جولدارىن تابۋعا سەپتىگىن تيگىزگەن تۇلعانىڭ تۇلا بويى تۇنعان ەلجاندىلىق سەزىم بولاتىن. ەڭبەكتەرىنىڭ كوپشىلىگى ساقتالماي قالسا دا، باس اياعى 33 جىل عۇمىر كەشىپ، سالالى تىرلىكتەگى سانالى عۇمىرىن ەل يگىلىگى ءۇشىن ەڭبەككە ارناعان ازامات ءجۋرناليستىڭ بەينەسى وسىنداي ەدى.

جاستارعا ەتكەن ەڭبەگى ەلەۋسىز قالماي، جاستار دا ىزگى جۇرەكتى جانداردى ىزدەپ، ومىردەرەگىمەن تانىسىپ، ونەگەسىن ەلگە تانىتۋدا ەڭبەكتەنىپ ءجۇر. بۇگىنگى تاڭدا امانتوعاي ورتا مەكتەبىنىڭ وقۋشىسى د.ءساتوۆا قازاق ءتىلى مەن ادەبيەتى ءپانىنىڭ ءمۇعالىمى ا.مادەنوۆانىڭ جەتەكشىلىگىمەن س.ەلەۋوۆتىڭ ءومىرى مەن شىعارماشىلىعى اياسىندا «قالامگەرلىك پەن مەيىرىمدىلىكتى توعىستىرعان تۇلعا» تاقىرىبىندا عىلىمي جوبا قورعاپ، اۋداندىق «جارقىن بولاشاق» قازاق ءتىلى وليمپياداسىندا ءى ورىن، وبلىستىق قازاق ءتىلى وليمپياداسىندا ءىى ورىن يەلەندى. ەلەۋلى جاننىڭ ەڭبەگى ەلەۋسىز قالماسى انىق. سوندىقتان تالانتتى قالامگەردى زەرتتەپ، عىلىمي جوبا قورعاپ جۇرگەن جاستارعا ساتتىلىك!

مۇرات نارجان داۋلەت ۇلى
قوستاناي وبلىسى، امانكەلدى اۋدانى
امانتوعاي جالپى ءبىلىم بەرەتىن ورتا مەكتەبى 11-سىنىپ وقۋشىسى

---