تاۋەلسىزدىككە تارتۋ...
تاۋەلسىزدىكتىڭ شيرەك عاسىرى رەسپۋبليكا كولەمىندە اتالىپ ءوتىلىپ جاتىر. جەر-جەردە بولىپ جاتقان ءىس-شارالار وتە كوپ. وسىنداي ءىس-شارالار امانكەلدى اۋدانىنا قاراستى امانتوعاي اۋىلىندا دا ءوز جالعاسىن تاپتى.
«25 جۇلدىزدى كۇن» دەپ اتالاتىن باعدارلاما بويىنشا بارلىق مەكتەپ ۇجىمى شىعارماشىلىق جۇمىستار جۇرگىزۋدە. بۇل باعدارلامانىڭ نەگىزگى ماقساتى ەلدىڭ تاريحىن، مادەنيەتىن ناسيحاتتاپ، وقۋشىلاردىڭ وتانعا دەگەن سۇيىسپەنشىلىك سەزىمدەرىن ارتتىرۋ بولىپ وتىر. سونىمەن قاتار تاعى ءبىر ماقسات تاۋەلسىزدىك جولىنداعى كۇرەسكەرلەردىڭ ەرلىگىن دارىپتەۋ، ولاردىڭ بويىنداعى اسىل قاسيەتتەردى ۇرپاق بويىنا ءسىڭىرۋ. اتالمىش ءىس-شاراعا ۇستازدار مەن وقۋشىلار، سونىمەن قاتار كىشكەنتاي بۇلدىرشىندەر دە بەلسەنە اتسالىستى. 25 كۇننىڭ ءار كۇنىندە وزەكتى دەگەن تاقىرىپتار قوزعالىپ، وقۋشىلار مەن ۇستازدارعا تانىستىرىلىپ وتىردى. قازاقستان رەسپۋبليكاسىنىڭ 1991 جىلدان باستاپ بۇگىنگى كۇنگە دەيىن اتقارىلعان ىستەرى مەن اتاۋلى وقيعالارى وسى باعدارلامانىڭ ءار شىعارىلىمىندا جان-جاقتى باياندالدى. سونىمەن قاتار ەلباسىنىڭ اتقارعان ەرەن ەڭبەكتەرى دە نازاردان تىس قالعان جوق.
اۋىلدىق مادەنيەت ءۇيى ءار بالانىڭ بويىنان تابىلاتىن دارىندى شىڭداۋ ماقساتىندا كوركەمسۋرەت بايقاۋىن ۇيىمداستىردى. سونىمەن قاتار اقىندار مەن كوركەمسوز وقۋ شەبەرلەرى دە ءوز ونەرلەرىن ورتاعا سالدى. اۋىل قارتتارى دا ەگەمەندىگىمىزدىڭ شيرەك عاسىرىنا ارنالعان كونسەرتتىك باعدارلاماسىن حالىق نازارىنا ۇسىندى.
اۋىلدىڭ اق حالاتتى ابزال جاندارىنان قۇرىلعان ۇجىم دا مەرەكەگە وراي اۋىلدىق اۋرۋحانادا «اشىق ەسىك» كۇندەرىن ۇيىمداستىردى. وسى شارالاردىڭ بارلىعىن دا امانتوعاي اۋىلى تاۋەلسىزدىكتىڭ 25 جىلدىعىنا ارنايدى. ەگەمەندىگىمىز باياندى بولعاي! تاۋەلسىزدىگىمىزدىڭ شيرەك عاسىرى قۇتتى بولسىن!
مۇرات نارجان داۋلەت ۇلى
قوستاناي وبلىسى، امانكەلدى اۋدانى
امانتوعاي جالپى ءبىلىم بەرەتىن ورتا مەكتەبى 11-سىنىپ وقۋشىسى
You Might Also Like
-
ءبىز قالام تەربەگەلى وتىرعان تۇلعا سابيتبەك ەلەۋوۆ تۋراسىندا «قالامىنا ءقادىر دارىعان قالامگەر» دەگەن تىركەستى اۋىز تولتىرىپ ايتۋعا بولادى. كەڭەستىك كەر زاماننىڭ كەگەجۋ تارتقان تۇسىندا شە...
-
(مۇعالىمدەردىڭ «ناۋرىز شاپاعاتى» ونەر فەستيۆالى حاقىندا) مۇعالىمدەر بىلىمگە اسقاق كەنەلگەن، شاكىرت كەۋدە سول ارقىلى ەلەنگەن. بي بيلەسە، ءان سالسا ولار – ونەرپاز، تۇلابويىن كە...
