قاردان جاسالعان گۇل
— اناشىم، ەرتەگى ايتىپ بەرىڭىزشى؟!
— جارايدى، ايتىپ بەرەمىن. تەك كەش باتسىن.
— نە ءۇشىن كەشتىڭ باتقانىن كۇتۋىمىز كەرەك؟
— بىلمەيمىن...ەرتەگىنى كەشكە تىڭداعان جاقسى سياقتى.
— جاقسى. وندا كەلىستىك.
قىزىم كۇن باتقانشا ارەڭ شىدادى. قىستىڭ كەلتە كۇنى اپ-ساتتە كەشكە ۇلاستى. پەشكە جاعىلعان وتتىڭ قىزۋى ءۇيدى جىلىتىپ جىبەردى. جارىقتىڭ سوندىرسەڭ، وتتىڭ ويناعان الاۋىنىڭ كولەڭكەسى كەرەگەدە وينايدى. وسىنداي كەزدە بالا كەزدەگى اتا-انامنىڭ ورتاسىندا ەش الاڭسىز وتىراتىن كەزدەرىم ەسىمە تۇسەدى.
— اناشىم، ال، ەرتەگىڭىزدى باستاڭىز.
قىزىمنىڭ قىزىعۋشىلىققا تولى كوزىنە قاراپ، جىميدىم. ەسىمە ادەمى ەرتەگى ءتۇستى.
— ەرتەگىنى جالعىز ءوزىڭ عانا تىڭدايسىڭ با؟ بارىپ، باۋىرلارىڭدى شاقىرىپ كەل.
قىزىم cءۇيىنشى سۇراعانداي جۇگىرىپ كەتتى. بالالارىم «ەرتەگى، ەرتەگى!» دەپ قۋانا ايقايلاپ جۇگىرىسىپ كەلدى. اينالا وتىرا قالىپ، مەنىڭ اۋزىمدى باقتى.
— ەرتەدە ءبىر قىز بولىپتى. ول وتە ارمانشىل بولعان. ءوز قيالىندا جاساپ العان ۇيدە مەكەن ەتىپ، قيالىنداعى كەيىپكەرلەرمەن تىلدەسەدى ەكەن. جەر بەتىندەگى بارلىق نارسەنى اپپاق ءتۇس سياقتى قابىلدايتىن-دى. اپپاق اقشا بۇلتتار، اپپاق قار سياقتى بارلىق ادامزات، جەر بەتى تاپ-تازا دەپ ويلايدى.ءبىر كۇنى قىز اكەسى مەن اناسىنىڭ بىر-بىرىمەن سويلەسپەي جۇرگەنىن بايقاپ قالىپتى. ءسىرا، رەنجىسىپ قالعان-اۋ.
— ولار نەگە رەنجىسكەن ەكەن؟
— ۇلكەندەر كەيدە سولاي بىر-بىرىنە وكپەلەپ قالادى.
— بىر-بىرىنەن كەشىرىم سۇراي سالماي ما؟! ءبىز سويتەمىز عوي... سودان كەيىن ويناپ كەتەمىز.
— سودان، ولار تاتۋلاسىپ پا؟
— كىشكەنتاي ارمانشىل قىز اتا-اناسىن قالاي تاتۋلاستىرسام ەكەن دەپ، تۇنىمەن تەرەزەدەن جاپالاقتاپ جاۋعان قارعا قاراپ ويلانىپتى. ءسويتىپ جاتىپ ۇيىقتاپ كەتىپتى. تاڭەرتەڭ تۇرا سالىپ، كيىمدەرىن كيىپ، دالاعا جۇگىرىپ شىعىپتى. دالا اپپاق قارعا ورانىپتى. تۋرا ءوز قيالىنداعى ەرتەگى پاتشالىعى سياقتى. قىز قاردى ءبىراز تاماشالاپ تۇرىپتى دا، دەرەۋ جالاڭ قولدارىمەن قاردى كوسىپ الىپ، جەنتەكتەي جونەلىپتى. اناسى قىزىنىڭ بۇل قىلىعىنا تاڭ قالىپ، «قىزىم-اۋ، جاۋرادىڭ عوي. ۇيگە كىرسەڭشى. كۇن جىلىنعان سوڭ ءبىراق شىعىپ وينا» دەپ بايەك بولادى. قىزى اناسىن ەستىمەگەن سياقتى قاردى جەنتەكتەي بەرەدى. ءبىر كەزدە قولىنداعى قاردى الا سالا اكەسىنە جۇگىرىپ بارادى.
— اكە، اكە، قاراڭىزشى، مەن قاردان گۇل جاسادىم. وتىنەم، وسى گۇلدى اناما سىيلاڭىزشى. ءقازىر قىس، ەش جەردە گۇل وسپەيدى.
— قىزىم-اۋ، مىناۋ قار عوي...
— بۇل قار ەمەس، قاردان جاسالعان گۇل...ءجۇرىڭىزشى، اناما سىيلاڭىزشى. بۇلعاجايىپ گۇل...
— قىزى تابانداپ تۇرىپ العان سوڭ، اكەسى كوڭىلىن قيماي جەنتەكتەلىپ گۇل بەينەسىنە كەلتىرگەن قاردى الىپ ۇيگە كىرەدى.
— ال، اناما سىيلاڭىز، - دەپ سىبىرلايدى قىزى.
— مىناۋ ساعان...قاردان جاسالاعان گۇل...قىزىمىز جاساپتى...
— ادەمى ەكەن...
اناسى پەشتىڭ جانىندا تۇرعان. قولىن سوزىپ اپپاق قار گۇلدى الدى. جۇزىنە جىلۋ جۇگىردى. ادامنىڭ قولىنىڭ تابىمەن ۇيدەگى جىلۋ قار گۇلدى ەرىتە باستادى. سۋ تامشىلاي باستايدى.
— اكە، اكە، گۇلدى ۇستاڭىز. ايتپەسە ول ءقازىر ەرىپ قۇلاپ قالادى. مىنە مەن دە ۇستايمىن.
ءۇش الاقانعا قونعان اپپاق قار گ ۇلى تەز ەري باستادى. ەرىپ-ەرىپ جەرگە تامشىلاپ جاتتى. سۋىققا قىزارعان الاقاندار قالدى. قاردىڭ سۋىق سۋى قىزدىڭ اكەسى مەن اناسىنىڭ رەنىشىن جۋىپ كەتكەن سياقتى. قىز قاتتى قۋانىپ كەتتى.
— ايتتىم عوي، ول عاجايىپ گۇل دەپ...ەرتەگى وسىمەن ءبىتتى.
— ءبىتتى مە؟
— اتا-اناسى تاتۋلاسىپ پا؟
— ءيا.
— جاقسى بولدى عوي.
— مەن تاتەممەن رەنجىسىپ قالسام، سونداي گۇل سىيلاسام بولا ما؟
مەن كۇلدىم. ەرتەگىنى كىشكەنتايلار جاعى تۇسىنبەگەنى انىق. ويتكەنى ولار ويىنعا اينالىپ وتىردى. ال ەس كىرىپ قالعان قىزدارىم ءبىر ساتكە قيالداپ كەتكەندەي.
You Might Also Like
-
ماڭعىستاۋ وبلىسى، جاڭاوزەن قالاسى №25 "تولاعاي" بالاباقشاسى مكقك-نىڭ تاربيەلەنۋشىسى: وڭداسىن نۇراينا تاربيەشىسى: تاجيبايەۆا الماس كايسايەۆنا
-
10 ەسە باي ءارى تابىستى بولۋ ءۇشىن 10 ەسە ارتىق جۇمىس ىستەپ، تۇمسىقتان تىرەلۋدىڭ كەرەگى جوق. بار بولعانى 1% ەرەجەسىن قولدانىڭىز، — دەپ كەڭەس بەرەدى ايگىلى بلوگەر دجەيمس كلير.
