InfoHub Logo

قاشاننان بەرى جاتقانى بەلگىسىز، بالاۋىزدىڭ سورەدە جاتقانىنا كوپ بولدى. ەشكىم ونى كەرەك ەتپەيدى. جارقىراعان ەلەكتر جارىعى بار. ءبىراق، بالاۋىز ەشقاشان دا ءۇمىتىن ۇزگەن ەمەس. وسى ۇيدەگى ادامداردىڭ تىرشىلىگىن سىرتتاي باقىلاپ، كادەگە جارار كۇنىن سابىرمەن كۇتىپ جاتا بەردى.

بۇل ءۇيدىڭ دە جاندارى وزگە وتباسىلار سەكىلدى، كۇندىز اتا-اناسى جۇمىستا، بالالارى ساباقتا بولاتىن. كەشكە ءبارىنىڭ باسى جينالعاندا، كەشكى استارىن ىشە سالىپ، بالالارى كومپيۋتەر الدىنا، ۇلكەندەر جاعى دەمالاتىن بولمەدەگى ۇلكەن تەلەديدار الدىنا جينالاتىن. وسىلايشا ءبىرقالىپتى كۇندەر ءوتىپ جاتتى. داڭعاراداي ۇيدەگى ادامدار بىر-بىرىمەن سىرلاسىپ، سويلەسۋدەن قالدى. اركىم وزىمەن-وزى اۋرە. وتباسىلىق جىلۋ جوعالىپ بارا جاتقانداي. وسىنىڭ ءبارىن كورىپ جۇرگەن بالاۋىزدىڭ ادامدارعا جانى اشىپ، ءسونىپ بارا جاتقان جىلۋدى قالاي جاندىرۋ كەرەكتىگىن ويلايتىن. ولارعا شىنىمەن دە كومەكتەسكىسى كەلدى.

ءبىر كۇنى، قاتتى بوران سوقتى. قاتتىلىعى سونشا، ەلەكتر جەلىلەرى ءۇزىلىپ، بۇكىل قالا جارىقسىز قالدى. ەلەكتر قۋاتىن تۇتىناتىن قۇرىلعىنىڭ ءبارىنىڭ باسىنا ۇنسىزدىك تۋدى. ءدال سول ساتتە سورەدە جاتقان بالاۋىزدىڭ ارمانى ورىندالدى. انالارى:

— وسى سورەلەردىڭ بىرىندە ءبىر بالاۋىز بولعان. قانە، ىزدەيىكشى، - دەپ ۇيالى تەلەفوندارىنىڭ جارىعىمەن بارلىعى جابىلىپ، ۇمىت قالعان بالاۋىزدى ىزدەي باستادى. اقىرى تاپتى-اۋ. بالاۋىزدىڭ تابىلۋىن كۇتكەندەي، ۇيالى تەلەفونداردىڭ دا قۋات كوزى تاۋسىلىپ قالدى. ونىڭ استىنا كىشكەنە ىدىس قويىپ، تۇتاتقانى سول ەدى، تاس قاراڭعى ۇيگە نۇر سەبىلگەندەي بولدى. ۇيدەگى جالعىز جارىق - ۇمىت قالعان بالاۋىزدىڭ ساۋلەسى. وتباسىنىڭ بارلىق جاندارى بالاۋىز تۇرعان ۇستەلدىڭ باسىنا جينالدى. ولار ءبىر-بىرىن تانىمايتىن، ورتاق اڭگىمەلەرى جوق ادامدارداي ءبىراز ءۇنسىز وتىرىسىپ قالدى. كەنەت وتاعاسى:

— بالالار، وسىلاي ءۇنسىز وتىرامىز با؟ مەن سەندەرگە بالالىق شاعىمداعى قىزىقتى ءبىر وقيعانى ايتىپ بەرەيىن، — دەپ، ەڭ العاش اتقا ءمىنىپ ۇيرەنگەندەگى قىزىقتارى جايلى مايىن تامىزىپ تۇرىپ اڭگىمەلەپ بەردى. سودان كەيىن انالارى دا، وزىنە كويلەك تىگەمىن دەپ، ۇلكەن ماتانى قالاي كەسكىلەپ تاستاعانىن ايتىپ، ءبارىن ءبىر كۇلدىرىپ الدى. بالالار دا مەكتەپتەگى قىزىقتارىن ايتىپ، اتا-انالارىن ءبىراز تاڭ-تاماشا قىلدى. ال بالاۋىز بولسا، ءوزىنىڭ ارمانىنىڭ ورىندالعانىنا توبەسى كوككە جەتكەندەي بولىپ، مازداپ جانا بەردى، جانا بەردى. قۋانىشى قوينىنا سىيماي، وسى ءبىر مەيىرىم، جاقىندىق ۇشقىنى قايتا ورناعان وتباسىنىڭ جىلۋىن ءسوندىرىپ الماس ءۇشىن، نۇرىن اياماي توكتى. شاتتانعاننان سوڭعى رەت لاپ-لاپ جاندى دا، باياۋلاپ سونە باستادى. سول ساتتە ەلەكتر جارىعى دا سامالداي جارقىراپ كەتتى. ءبىراق، بۇعان ەشكىم دە قۋانا قويمادى. ولار ءالى دە بولسا ءبىراز وتىرا تۇرعىلارى كەلگەن ەدى.

وسىلايشا، ۇمىت قالعان بالاۋىز ءوز ارمانىنا جەتىپ، ءبىر وتباسىنىڭ ادامدارىنىڭ جۇرەگىنە بىر-بىرىنە دەگەن شىنايى انالىق، اكەلىك جانە بالالىق ماحابباتتى وياتىپتى. سول كەشتەن كەيىن ۇلكەن اسەر العان وتباسى، كەي كۇندەرى بۇكىل جارىقتى ءسوندىرىپ، بالاۋىز جاعىپ قويىپ، قىزىقتى اڭگىمەلەرىن ايتىپ، بىر-بىرىمەن سىرلاساتىن بولىپتى.

---