InfoHub Logo

باياعىدا ءبىر اش قاسقىر جورتىپ كەلە جاتىپ، كوك شولاق سيىرعا كەز بولىپتى. قاسقىر ارىق كوك شولاق سيىرعا الدىمەن سالەم بەرىپ، ءوزىنىڭ دۇنيەنى ارالاپ، دوس ىزدەپ جۇرگەنىن ايتىپتى.

باستابىندا سيىر بۇعان سەنبەپتى.

قاسقىر تاعى دا ءسوزىن ساباقتاي كەلىپ: «مەن جاسىمنان ەل ارالاپ، قولىمنان كەلگەن قىلمىستىڭ ءبارىن وتكىزدىم، وزىڭدەي مومىن دوس تاۋىپ الىپ، ەندىگى ءومىرىمدى قامسىز وتكىزسەم بە دەيمىن»، — دەپتى تىلىنەن ماي تامىزىپ.

قاسقىردىڭ سوزىنە سەنگەن كوك شولاق سيىر قاسقىر مەن ارالارىنان قىل وتپەيتىن دوس بولىپتى. كوك شولاق سيىر ءشوپتىڭ شۇيگىنىن جەپ، سۋدىڭ تۇنىعىن ءىشىپ، قاسقىر كىشكەنە اڭداردى اۋلاپ جەپ، جازدى وتكىزىپتى.

سەمىرگەن كوك شولاق سيىرعا اندا-ساندا سۇعىن قاداعان قاسقىر: «كوك شولاعىم، قالاي دا بيىلعى سوعىمسىڭ عوي»،-دەپ ىشىنەن ويلاپ جۇرەدى ەكەن.

كۇن سۋىتىپ، قار ءتۇسىپ، قارا سۋىق باستالىپ، قىلىشىن سۇيرەتە قىس جەتىپتى. ءبىر كۇنى قاسقىر كوك شولاق سيىردىڭ جانىنا جەتىپ بارىپ:

— ەي، كوك شولاق دوسىم، قىس بولسا مىناۋ، قارىن اشتى، ەندى سەنى قىسقى سوعىمعا سويامىن، — دەپتى. سيىر بۇل ءسوزدى ەستىپ قاتتى ابىرجىپتى دا، «مەنىڭ ءبىر شارتىم بار، سونى ايتايىن، ونان كەيىن سوعىمعا سويساڭ سوي» — دەپتى. قاسقىر مۇنى ماقۇل كورىپتى دە «شارتىڭدى ايت» دەپتى.
مەنىڭ ۇلى اكەم ولەر كەزىندە ماعان ءبىر اۋىز وسيەت ايتىپ كەتكەن ەدى، ەگەر اقشادان قىسىلىپ كەدەيلىك تارتساڭ، وسىدان كۇندىك جەردە شىڭىراۋ تاس دەگەن تاس بار. ول جەردە پەرىلەر كوشىپ بارا جاتىپ، ديۋلارمەن سوعىسىپ قاشقان كەزدە ات باسىنداي التىن قالىپ قالعان ەكەن، سونى ال دەپ ەدى. مەن سونى العان سوڭ سوعىم ەتسەڭ، — دەپتى سيىر.

سيىردىڭ سوزىنە سەنگەن قاسقىر بۇل شارتقا ماقۇل بولىپ، سيىردىڭ اقىلى بويىنشا شيدەن ارقان ەسىپ، شىڭىراۋ تاسقا بارىپتى. سيىر قاسقىرعا:

ال، شي ارقاندى مەنىڭ قۇيرىعىما مىقتاپ بايلاپ، شىڭىراۋعا ءتۇسىپ، التىندى الىپ شىق!-دەپتى. قاسقىر شي ارقاندى سيىردىڭ قۇيرىعىنا مىقتاپ بايلاپ، شىڭىراۋدىڭ تۇبىنە تۇسە بەرىپتى.

ءبىر ۋاقىتتا سيىر جەتتىڭ بە دەپ ايقايلاپتى.

قاسقىر: «ورتاسىنا كەلدىم» دەگەندە سيىر شەگىنىپ بارىپ ارقاندى بار كۇشىمەن قاتتى تارتىپ قالعاندا شي ارقان ءۇزىلىپ، اشكوز قاسقىر شىڭىراۋعا ءتۇسىپ جان ۇزگەن ەكەن.

---