قايران ەلىم، قازاعىم!
قاراقان باستىڭ قامىمەن
قورعالاي بەرمە، قانداسىم،
قازاقتىڭ اتقان تانى مەن
ازاتتىق جولىن تاڭدا شىن!..اۆتور
«قازاقستان!» دەگەندە – جانارىمنان جاس پارلاپ، مەنىڭ بۇكىل الەمىم – جۇرەگىمدە ەرەك تولقۋ ويانىپ، اعىل-تەگىل سەزىم كۇيىم باستالماق، قايران، قايران، قازاعىمنىڭ ۇلان-بايتاق كەڭ ولكەسى كوسىلگەن، تۇلەپ ۇشقان توسىڭنەن: نەشە ءبىر اۋليەڭ مەن باتىرىڭ دا، ابىزىڭ مەن اقىنىڭ دا، كوسەمىڭ مەن شەشەنىڭ دە، تاۋ تۇلعالى قىراندارىڭ، ەل قورعانى - ۇلاندارىڭ، شىڭدا وسكەن شىنارلارىڭ، ءدۇيىم جۇرتى - قابىرعالى ەلىمنىڭ، يەسى سەن، يەسى سەن، يەسى سەن(!) - قاراعاندا كوز تالارداي، كورگەن ادام تاڭعالارداي شەكسىز دالا، جەرىڭنىڭ: قويناۋىنان قۇت-بەرەكە تاسىعان، نەشە الۋان قاسىرەت پەن قايعى-مۇڭدى سان وتكەرگەن باسىنان، عۇمىرىندا قانشا ازاپ كورسە-داعى جاسىماي، تەرەڭىندە جاتقان قايناپ بابالاردان قالعان نامىس قاينارلارى باسىلماي، ەگەمەندى ەل بولعاندا ساقتاپ قالعان اماناتىن اقساقالدى قارتتاردىڭ، بۇگىندەرى تويلاپ جاتقان ەڭ مەرەيلى شاقتارىن، تاۋەلسىزدىك كۇنى دەيمىز بايتاق قازاقستاننىڭ، كوك بايراعى جەلبىرەگەن اياسىندا كوك زەڭگىرلى اسپاننىڭ، ساياسىندا سان الۋان ۇلتتار مەنەن ۇلىستاردىڭ جاپىراعى جايىلىپ، قازاعىمنىڭ كورگەن تالاي باۋىرلاستىق كوڭىلى مەن قوناقجايلىق پەيىلىنىڭ دارحاندىعىن اسقان تىم(!)، بابا دالام قانشا عاسىر ازا مۇڭدى ارقالاپ، جارقىراپ ءبىر تۋاتۇعىن ازات كۇندى ارمانداپ، بوگدە ەلدىڭ بودانى بوپ باستان تاعدىر وتكەردى، بۇ قازاعىڭ دۇنيەنىڭ تاۋقىمەتىن باسقالاردان كوپ كوردى: زوبالاڭ مەن ناۋبەتتەردى، رۋحاني سان دەرتتەردى، ءبىراق رۋحىن بيىك ۇستاپ وشىرمەي، ەل ەرتەڭى ءۇشىن نەبىر زيالىلار كوز ىلمەي، دالامىزدىڭ ءوز الدىنا دەربەستىگىن كوزدەدى، زامانا دا وڭنان تۋىپ، ەتەك جيناپ، ەستى جيار كەز كەلدى(!)، جەلتوقساندا جاستارىمىز قارالىقتىڭ تۇرمەك بولسا پەردەسىن، ونىڭ ءبارى ەزدىك پەنەن ەسكى ۇعىمدى ەرلىك پەنەن ەلدىك نامىس جەڭگەسىن(!)، كۇللى ادامزات قۇلاق ءتۇرىپ وقيعاعا وسىناۋ، بابالاردىڭ وشپەس رۋحى بيلەپ العان قازاعىمنىڭ كەۋدەسىن، قاندى وقيعا جۇرەكتەردە قالاتۇعىن ماڭگى ەلەس، XX عاسىرداعى سان الۋان ريەۆوليۋسيالىق دۇمپۋلەردەن كەم دە ەمەس(!)، شارپۋى ونىڭ كەتتى تاراپ بۇكىل كەڭەس ەلىنە، ءبىزدىڭ قازاق تۋى بولدى ازاتتىقتىڭ ورمەلەگەن كوگىنە، بالىعىڭ دا، تاۋلىعىڭ دا، ورتا ازياڭ - بارلىعى دا،ۋكراين، بەلورۋس، ءتىپتى ورىس ەندى العانداي ەگەمەندىك وزىنە، ەركىن قاراپ دەمىن الدى بارشا ادامزات كوزىنە، قازاق ەلى باسقالاردىڭ قاتارىنان قالار ما، وت-نامىسى ويانعانداي جاسىن سىندى جاناردا، ەلباسىنىڭ باستاۋىمەن، دانىشپاننىڭ قوستاۋىمەن، بۇقارانى ەرتىپ الىپ سوڭىنا، تارتتىق بىزدەر تاۋەلسىزدىك، تەڭدىك، ەلدىك جولىنا(!)، ال وسىناۋ جولىمىزدى دانا قۇداي وڭعارسىن، العا باسقان ءىسىمىزدى اۋليەلەر قولداسىن، بارشا قازاق، جيىلىڭدار جەر بەتىندە جاساعان، ارامىزدا الاۋىزدىق، جىككە ءبولۋ بولماسىن، ءبىز بارامىز زاڭعارلارعا اسۋلى، ويان، قازاق، كوتەر قانە باسىڭدى، سەنىڭ بۇگىن شاعىڭ ناعىز شابىتىڭدا شالقيتىن، بويداعى بار ونەرىڭمەن، ەڭبەگىڭمەن، قۇدىرەتىڭمەن، بىلىمىڭمەن، ءوز بەتىڭمەن قيالاردا قىران بولىپ قالقيتىن، و، جاساعان، قاسيەتتى ۇلى ەلىمنىڭ قۇبىلالى وڭ نيەتىن قابىل قىل، جالپاق جاتقان ساحارانى، بايتاعىمدى شۋاعىڭا مالىندىر، ۇلى دالا-كوشپەلىلەر مەكەنىنىڭ بۇگىنى - تاڭنىڭ اراي شاپاعىنداي الاۋلاعان جالىن-نۇر، و، قۇدىرەت، عالاماتقا قالاي عانا سەنبەسسىڭ، بىرلىگىمىز شايقالماسا، ءدۇردارازدىق بايقالماسا، قازاعىمنىڭ كوكبايراعىن جىعا المايدى ەندى ەشكىم(!!!)، العا باسقان قادامدارعا قۇت دارىپ، ەل بولايىق ەل قاتارلى مىقتى، الىپ(!)، بەۋ، ازامات، مويىنىڭا اۋىر زامان جۇگىن ءىل، «مىناۋ قازاق!» دەگەن اتاق-داڭقىڭا جۇگىندىر، ۇلان -ۇرپاق ءون بويىنا توپىراقتىڭ قاسيەتىن ءسىڭىرىپ، سەن ولاردى بابالاردان قالعان تاريح، مۇرالارعا ءۇڭىلدىر، وتانىمنىڭ سولار بولار كۇنى ەرتەڭگى تىرەگى، قازاعىم دەپ سوعۋ كەرەك جاس كۇنىنەن، بەسىگىنەن بالالاردىڭ جۇرەگى، سەن وزىڭە مىقتى بولشى قاي قاشاندا، باۋىرىم، ازاماتتار، وزدەرىڭدە اتالاردىڭ، بابالاردىڭ، انالاردىڭ سەنىمى مەن تىلەگى، سول سەنىمنەن شىعاتىنداي سارا باعىت تۇرلاۋلى، شىڭعا قاراي ۇمتىل، قازاق، شىرقاۋلى، دومبىرانى بەبەۋلەتشى كۇيشى جىگىت، سال جىگىت، ارعىماقتار جۇيتكىسىنشى قايران دالام جاڭعىرىپ، ۇلى تويدا - ءبىز شالقيىق تاۋەلسىزدىك كۇنىندە، بازارىمىز تارقاماسىن، اشىق بولىپ اسپانىمىز ماڭگىلىك!
جەلتوقسان، 1993 جىل
You Might Also Like
