قازاق جىگىتى ايگىلى Booking.com كومپانياسىنىڭ باس كەڭسەسىنە جۇمىسقا ورنالاستى
پاۆلودار قالاسىنىڭ تۋماسى، باعدارلاما جاساۋشى الىبەك داتبايەۆ Booking.com كومپانياسىنىڭ باس كەڭسەسىنە جۇمىسقا ورنالاستى. قوناقۇيلەردەن ورىن برونداۋعا ارنالعان الەمدەگى ەڭ ءىرى سايتتاردىڭ ءبىرى الىبەكتى ءۇش رەت سۇحباتتاسۋدان كەيىن جۇمىسقا قابىلداعان. الىبەك ايگىلى كومپانياعا جۇمىسقا ورنالاسۋ ءۇشىن قانداي قيىندىقتارعا تاپ بولعانىن Tengrinews.kz تىلشىسىنە ايتىپ بەردى.
الىبەك داتبايەۆ 2015 جىلدىڭ قاراشاسىندا تەحقىزمەتكەرلەرگە ارنالعان الەمدىك سايىسقا قاتىسادى. "Booking.com كومپانياسى Hackerrank.com ارقىلى سايىس ۇيىمداستىردى. سايىس كەزىندە ءتۇرلى دەڭگەيدەگى تاپسىرمالاردى شەشۋ ءۇشىن بەلگىلى ۋاقىت بەرىلەدى. شاراعا الەم بويىنشا 500 ادام قاتىستى. تاپسىرمالاردى ءساتتى ورىنداپ شىقتىم، ءۇش كۇننەن كەيىن ماعان Booking.com كومپانياسىنان حات كەلدى، ولار مەنى Skype ارقىلى سۇحباتتاسۋعا شاقىردى. ماعان ءتورت تاپسىرمادان تۇراتىن ءۇي جۇمىسىن ورىنداۋعا 75 مينۋت ۋاقىت بەرىلدى. ول تاپسىرمالاردى دا ءساتتى ورىندادىم. كەيىن ماعان امستەردامداعى Booking.com كەڭسەسىنە شاقىرتۋ كەلىپ ءتۇستى"، - دەدى الىبەك.
پروگرامميستكە كومپانيا ۇشۋ بيلەتىن، تاماقتانۋ جانە تۇراتىن جەردىڭ قۇنىن تولەپ بەرگەن. سوڭعى سۇحباتتاسۋدان كەيىن الىبەككە كومپانيا جۇمىس ۇسىنىپتى. العاشقى ايدا الىبەككە كومپانيا تۇراتىن جەرىنىڭ اقشاسىن تولەپ بەرگەن. بۇدان كەيىن ول پاتەراقىنى ءوز قالتاسىنان تولەيدى. داتبايەۆ قانشا جالاقى الاتىنىن ايتپاسا دا، بۇل جەردە اقش-تاعىدان ەكى ەسە كەم تولەنەتىنىن جەتكىزدى. ايتا كەتەيىك، جاس پروگرامميست شامامەن ەكى جىل بويى اقش-تا جۇمىس ىستەدى. 2015 جىلدىڭ جازىندا ول قازاقستانعا ورالىپ، Booking.com كومپانياسى جۇمىسقا شاقىرعانعا دەيىن الماتىدا تۇرادى. ونىڭ ايتۋىنشا، ءقازىر كومپانيا ايەلىنە دە جۇمىس ىزدەپ جاتىر. سونىمەن قاتار، گوللاند ءتىلىن ۇيرەتەتىن تەگىن ۇيىرمەلەرگە قاتىستىرادى ەكەن.
"ماعان امستەردام ۇنادى. مۇندا العاش رەت كەلۋىم. بۇل جەردە ارنايى جۇمىس كەستەسى جوق. باسشىلىق جۇمىسقا قاي ۋاقىتتا كەلىپ، قاشان كەتكەنىڭدى اڭدىمايدى. ساعان بەرىلگەن تاپسىرمانى بەلگىلەنگەن ۋاقىتتا ورىنداپ شىقساڭ بولعانى. Booking.com كومپانياسىندا الەم بويىنشا 800-گە جۋىق پروگرامميست جۇمىس ىستەيدى. ايتپاقشى، ماعان مۇندا باسقا دا قازاقستاندىقتاردىڭ قىزمەت ەتەتىنىن ايتتى. دەگەنمەن مەن ولارمەن تانىسىپ ۇلگەرمەدىم"، - دەدى داتبايەۆ.
الىبەك داتبايەۆ - پاۆلودار قالاسىنىڭ تۋماسى. ول الماتىداعى ءقبتۋ-دى بىتىرگەن. جاقىندا ول 28 جاسقا تولادى.
You Might Also Like
-
ادامدار ىقىلىم زاماننان بەرى سۋ بەتىندە ساياحاتتاي باستادى. قازىرگى زەرتتەۋشىلەر تاريحتا ەجەلگى مىسىرلىقتاردىڭ سۋ بەتىندە ءجۇزىپ، كەمە قۇرىلىسىمەن تۇڭعىش بولىپ اينالىسا باستاعانىن ايتىپ وتىر.
-
"وقۋ ءۇردىسىن تەحنولوگيالاندىرۋ ماسەلەلەرى"(ەسسە)
