قازاقستان جوو-لارىنىڭ رەكتورلارى پىكىرتالاس ارقىلى تاڭدالادى
قازاقستاندا جوعارى وقۋ ورىندارىنىڭ رەكتورى لاۋازىمىنا الەۋەتتى ۇمىتكەرلەر اراسىندا پىكىرتالاستار ۇيىمداستىرىلادى.
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاسيالار قىزمەتىندەگى بريفينگتە ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى دارحان احمەت-زاكي ءمالىم ەتتى.
«كانديداتتار قالاي بولعاندا دا ءوزىنىڭ دامۋ باعدارلاماسىن تىڭعىلىقتى دايىنداۋدا بارىنشا شىعارماشىلىققا بەيىم بولۋى ءتيىس. ءتىپتى ءبىز الەۋەتتى ۇمىتكەرلەر اراسىندا پىكىرتالاستار ۇيىمداستىرۋ نۇسقاسىن دا بولجاپ وتىرمىز. وندا ۇشەۋى اقتىق سىنعا قالادى»، - دەدى ول تىلشىلەردىڭ ساۋالىنا وراي.
ونىڭ تۇسىندىرۋىنشە، قازىرگى ۋاقىتتا سايكەسىنشە نورماتيۆتىك-قۇقىقتىق اكتى ق ر ۇەم-نىڭ 70ء-شى بۇيرىعى قابىلداندى. ول رەسپۋبليكالىق مەملەكەتتىك كاسىپورىنداردا (جوعارى وقۋ ورىندارىندا) رەكتورلاردىڭ سايلانبالىلىعىن رەگلامەنتتەيدى.
«اتالعان قۇجاتقا سايكەس، بىزدە رەسپۋبليكالىق كوميسسيا قۇرىلىپ، ونىڭ جۇمىسى كەلەسى تۇردە تۇزىلەدى. بوس لاۋازىمعا كونكۋرس باق-تا، سونىمەن قاتار ق ر بعم سايتىندا ورنالاستىرىلادى. مۇنان ارى، ۇمىتكەرلەر ءوز قۇجاتتارىن ق ر بعم-عا تاپسىرادى. ءبىز بارلىق ۇمىتكەرلەرگە وزدەرىنىڭ دامۋ باعدارلامالارىن جەرگىلىكتى باق-تا جاريالاۋعا، سونىمەن بىرگە ولاردى اقپاراتتىق ستەندتەرگە ورنالاستىرۋعا كەڭەس بەرەمىز»، - دەدى د.احمەت-زاكي.
كەلەسى كەزەڭدە ق ر بعم بارلىق قۇجاتتاردى بايقاۋشىلار كەڭەسىنە تابىس ەتەدى. دامۋ باعدارلاماسىن قاراعان كەڭەس جاسىرىن داۋىس بەرۋ جولى ارقىلى بارىنشا لايىقتى ءۇش الەۋەتتى ۇمىتكەردى تاڭداۋ تۋرالى شەشىم قابىلدايدى.
ال ۇمىتكەرلەردىڭ قايسىسى باسىم ەكەندىگىن ق ر پرەمەر-مينيسترى باسشىلىق جاسايتىن رەسپۋبليكالىق كوميسسيا شەشەتىن بولادى.
You Might Also Like
-
اس – اتى ايگىلى ادامدارعا، مىسالى، باتىر، بي، بولىس، بايلارعا، بەلگىلى ونەر يەلەرىنىڭ قايتىس بولعانىنا ءبىر جىل تولعاندا ونىڭ ارۋاعىنا باعىشتاپ بەرىلەتىن اس ءارى توي. مۇندا جۇزدەگەن مال سويىلىپ...
