InfoHub Logo

مەملەكەت باسشىسىنىڭ بەس ينستيتۋسيونالدىق رەفورمانى جۇزەگە اسىرۋ جونىندەگى 100 ناقتى قادام - ۇلت جوسپارىنىڭ 76-قادامىندا ەىدۇ ەلدەرى ستاندارتتارىنىڭ نەگىزىندە ادام كاپيتالىنىڭ ساپاسىن كوتەرۋ، 12 جىلدىق ءبىلىم بەرۋدى كەزەڭ-كەزەڭىمەن ەنگىزۋ، فۋنكسيالىق ساۋاتتىلىقتى دامىتۋ ءۇشىن مەكتەپتەگى وقىتۋ ستاندارتتارىن جاڭارتۋ قاراستىرىلعان. ءبىزدىڭ تىلشىمىزبەن اڭگىمە بارىسىندا ق ر ءبىلىم جانە عىلىم ۆيسە-مينيسترى ەلميرا سۋحانبەردييەۆا ءبىلىم بەرۋدىڭ 12 جىلدىق مودەلىن ەنگىزۋدىڭ ءمان-جايىن ايتىپ بەردى.

-  ەلميرا امانگەلدى قىزى، قازاقستاندا 12 جىلدىق جالپى ورتا ءبىلىمنىڭ مودەلىنە كوشۋ قاشان جۇزەگە اسىرىلادى جانە وسى مودەلمەن بارلىق ورتا مەكتەپتەر قامتىلا ما؟

- 12 جىلدىق جالپى ورتا ءبىلىم بارلىق مەكتەپتەردە 2019-2020 وقۋ جىلىندا ىسكە اسىرىلادى.

- جاڭا وقۋ باعدارلامالارى ازىرلەندى مە؟ ورتا مەكتەپ وقۋشىلارى الاتىن ءبىلىم كولەمى ايتارلىقتاي ارتا ما؟

- جاڭارتىلعان مازمۇنداعى وقۋ باعدارلامالارى ۇكىمەتتىڭ 2015 جىلعى 25 ساۋىردەگى №327 قاۋلىسىمەن بەكىتىلگەن قازاقستان رەسپۋبليكاسىنىڭ باستاۋىش ءبىلىم بەرۋدىڭ مەملەكەتتىك جالپىعا مىندەتتى ستاندارتىنا جانە 2016 جىلعى 13 مامىرداعى №292 نەگىزى ءبىلىم بەرۋدىڭ مەملەكەتتىك جالپىعا مىندەتتى ستاندارتىنا سايكەس دايارلاندى.

بۇگىندە ءبىلىم بەرۋدىڭ باستاۋىش دەڭگەي پاندەرى بويىنشا 11 وقۋ باعدارلاماسى، سونداي-اق نەگىزگى ورتا مەكتەپ تۇرعىسىندا 17 وقۋ باعدارلاماسى  ازىرلەنىپ، بەكىتىلدى.

جاڭارتىلعان مازمۇنداعى  وقۋ باعدارلامالارى بويىنشا وقىتۋدا نەگىزگى ەكپىن كەڭ شوعىرلى داعدىعا قويىلىپ وتىر.

- 12 جىلدىق جالپى ورتا ءبىلىم بەرۋگە اۋىسۋعا قازاقستاندىق ۇستازدار دايار ما؟

- «ورلەۋ» بىلىكتىلىكتى ارتتىرۋ ۇلتتىق ورتالىعى جانە «نازاربايەۆ زياتكەرلىك مەكتەپتەرى»  پەداگوگيكالىق شەبەرلىك ورتالىعى بازاسىندا پەداگوگيكالىق قىزمەتكەرلەر بىلىكتىلىگىن ارتتىرۋ بويىنشا اۋقىمدى جۇمىس جۇرگىزىلۋدە. 2012-2015 جىلدارى دەڭگەيلى باعدارلامالار بويىنشا 52،5 مىڭ ءمۇعالىم وقۋدان ءوتتى. بۇل رەتتە ولار ءبىلىم بەرۋدىڭ مازمۇنىن جاڭارتۋ مەن 12 جىلدىققا كوشۋدەگى ماقساتتاردى ىسكە اسىرۋعا قولداۋ بولادى.

سونىمەن قاتار، بيىل باعدارلامالاردىڭ جاڭارعان مازمۇنى بويىنشا بىلىكتىلىكتى ارتتىرۋ كۋرستارىنان 69 مىڭ پەداگوگ ءوتتى. مازمۇندى جاڭارتۋ جوعارى وقۋ ورىندارى مەن كوللەدجدەردە مۇعالىمدەردى دايارلاۋ باعدارلاماسىندا دا كورىنىس تابادى.

- ورتا مەكتەپتە 12 جىلدىق ءبىلىم بەرۋگە اۋىسۋدى قارجىلاندىرۋ قانداي قارجى كوزدەرىنەن جۇرگىزىلەدى؟

- وقۋلىقتارمەن قامتاماسىز ەتۋ جەرگىلىكتى اتقارۋ ورگاندارى ەسەبىنەن اتقارىلادى. پەداگوگيكالىق قىزمەتكەرلەردىڭ بىلىكتىلىگىن ارتتىرۋ رەسپۋبليكالىق بيۋدجەت ەسەبىنەن  «ورلەۋ» بىلىكتىلىكتى ارتتىرۋ ۇلتتىق ورتالىعى مەن «نازاربايەۆ زياتكەرلىك مەكتەپتەرى»  پەداگوگيكالىق شەبەرلىك ورتالىعىندا جۇرگىزىلەدى، سونداي-اق بۇل باعىتتا جەرگىلىكتى بيۋدجەتتەر تاراپىنان دا ءتيىستى قادامدار ىسكە اسىرىلادى.

- 12 سىنىپتى ورنالاستىرۋ ءۇشىن قازاقستاندىق مەكتەپتەردە وقۋشىلار ورىندارى جەتكىلىكتى مە؟

- اتاپ وتىلگەندەي، 12 جىلدىق ءبىلىم بەرۋ نولدىك سىنىپ - 11 سىنىپ ۇستانىمى بويىنشا ەنگىزىلەدى، ياعني نولدىك سىنىپ 5-6 جاستاعى بالالار ءۇشىن ەنگىزىلەدى - مەكتەپكە دەيىنگى دايارلىق.

بۇگىندە مەكتەپكە دەيىنگى دايارلىق ءبىزدىڭ ءبىلىم بەرۋ جۇيەمىزدە ىسكە اسىرىلۋدا.

12 جىلدىق وقىتۋعا اۋىسقان كەزدە نولدىك سىنىپتان ءوتۋ مۇمكىندىگى مەكتەپكە دەيىنگى ۇيىمداردا جانە مەكتەپتە ساقتالادى. وسى ارقىلى 12 جىلدىق ءبىلىم بەرۋدى ەنگىزۋمەن وقۋشىلار ورنىنىڭ تاپشىلىعى بولمايدى.

- 12 جىلدىق ورتا بىلىمگە اۋىسۋ قازاقستان حالقىنىڭ جالپى ءبىلىم دەڭگەيىنە قالايشا اسەر ەتەدى دەپ ويلايسىز؟

- ءبىزدىڭ ەلىمىزدە ءبىلىم بەرۋدىڭ ءداستۇرلى جۇيەسىنەن الىستاۋ تالپىنىستارى بىرنەشە مارتە بولعان ەدى، الايدا وزگەرىستەردى فراگمەنتتىك ەنگىزۋ ءبىلىم بەرۋدىڭ ەسكى مازمۇنىنا تاڭىلىپ وتىردى. بۇل ءوز كەزەگىندە وقۋ ۇدەرىسىنىڭ كۇردەلەنۋىنە جانە بەرىلەتىن اقپارات كولەمىنىڭ ارتۋىنا الىپ كەلدى.

ءبىلىم بەرۋ مازمۇنى جاڭارۋىنىڭ جانە 12 جىلدىققا اۋىسۋدىڭ ناتيجەسى رەتىندە ءبىلىم بەرۋ ساپاسىنىڭ ارتۋى بولۋى قاجەت. سەبەبى، ءبىلىمنىڭ جاڭا ستاندارتى ومىرلىك ىس-ارەكەتكە دايىندالعان ادامعا نەگىزدەلىپ وتىر. ياعني، وسى شارالار بەلسەندى ءارى شىعارماشىلىق تۇردە ويلاۋعا قاۋقارلى بولۋعا  جانە ارەكەت ەتۋگە، سونداي-اق زياتكەرلىك، ادامگەرشىلىك تۇرعىدا وزدىگىنەن دامۋعا باعىتتالعان. بۇل رەتتە ناتيجەگە نەگىزدەلگەن ءبىلىم بەرۋدىڭ مودەلىن ەنگىزۋگە ەرەكشە ءمان بەرىلىپ وتىر.

- اڭگىمەڭىزگە راحمەت!

اۆتور: رۋسلان عابباسوۆ

---