قازاقستاندا ورتا ءبىلىمدى جاڭعىرتۋ بويىنشا ەكى جۇمىس كوميسسياسى قۇرىلدى
قازاقستاندا مەكتەپ وقۋشىلارىنىڭ دەمالىس مەرزىمىن قىسقارتۋ جانە ءۇشتىلدى ءبىلىم جۇيەسىن ەنگىزۋ بويىنشا جۇمىس كوميسسيالارى قۇرىلدى. بۇل تۋرالى بۇگىن ورتالىق كوممۋنيكالىق قىزمەتىندە وتكەن باسپا ءسوز ءماسليحاتىندا ق ر بعم مەكتەپكە دەيىنگى، ورتا ءبىلىم جانە اقپاراتتىق تەحنولوگيا دەپارتامەنتىنىڭ ديرەكتورى جاڭىل جونتايەۆا ءمالىم ەتتى.
«ءمينيستردىڭ تاپسىرماسى بويىنشا جۇمىس توپتارى قۇرىلدى، وندا ءبىز كانيكۋل مەن ءۇشتىلدى ءبىلىم بەرۋ ماسەلەلەرىن تالقىلاۋدامىز. كوميسسيالاردا ءبىز قوعامنىڭ، اتا-انالاردىڭ، ۇكىمەتتىك ەمەس ۇيىمداردىڭ ۇسىنىستارىن تىڭدايمىز. ءتۇرلى پىكىرلەر بار جانە ءبىز ولاردى نازاردان تىس قالدىرمايمىز»، - دەدى ج.جونتايەۆا.
ونىڭ ايتۋىنشا، جۇمىس كوميسسيالارىنىڭ وتىرىسى ءبىلىم جانە عىلىم ءمينيسترىنىڭ، اتا-انالاردىڭ، مۇعالىمدەردىڭ، مەكتەپ ديرەكتورلارىنىڭ، ءبىلىم ۇيىمدارى باسشىلارىنىڭ قاتىسۋىمەن ءار اپتا سايىن وتەدى.
«ءبىز اپتا سايىن وتىرىس وتكىزەمىز، ول ءوز كەزەگىندە، «ءبىلىم» ارناسى ارقىلى ترانسلياسيالانادى. قوعامنىڭ بارلىق ۇسىنىستارى ەسكەرىلەدى جانە ول بويىنشا ناقتى شارالار اتقارىلادى. بىزدە ويلاناتىن ۋاقىت بار، 2015-2016 وقۋ جىلىن ەندى عانا اياقتاپ كەلەمىز. ءبىلىم بەرۋدىڭ جاڭا جۇيەسى تەك 1 قىركۇيەكتە 1 سىنىپتارعا عانا ەنگىزىلەدى. ءبىز ءاربىر جاڭاشىلدىققا عىلىمي تۇرعىدا نەگىزدەمە بەرۋىمىز كەرەك. ەرتەڭ وقۋشىلار ءۇشىن وقىتۋ ۇدەرىسىن جەڭىلدەتۋ ءۇشىن، كاسىبي مامانداردىڭ پىكىرىنە جۇگىنۋىمىز قاجەت»، - دەپ اتاپ ءوتتى ج. جونتايەۆا.
You Might Also Like
-
2017 جىلى ۇلتتىق ءبىرىڭعاي تەستىلەۋ تولىعىمەن وزگەرەدى.
-
ماڭگىلىك ەل – 2050 ادامنىڭ ءوز وتانى، ءتىلى، سالت – ءداستۇرى، ادەت – عۇرپى، وتكەنى مەن بولاشاعى بار. مەنىڭ ەلىم – تاۋەلسىز قازاقستان. مەن ءوز ەلىمدى ماقتان تۇتامىن. ەلىمنىڭ...
