قازاقستاندا ۇزدىك عالىمدارعا 5،8 ملن تەڭگە سىياقى بەرىلەدى
قازاقستاندا «ۇزدىك عىلىمي قىزمەتكەر» اتاعىمەن قوسا، 2 مىڭ اەك كولەمىندە ىنتالاندىرۋ سىياقىسى بەرىلەدى.
ايتا كەتسەك، عىلىم جونىندەگى ءتيىستى زاڭ جوباسى پارلامەنت سەناتىنىڭ ءبىرىنشى وتىرىسىندا ماقۇلدانعان بولاتىن. «زاڭ جوباسىندا بىرنەشە جاڭالىق قارالعان. سولاردىڭ ىشىندەگى ەڭ ماڭىزدىسىنىڭ ءبىرى – ۇزدىك عالىمدارعا «ۇزدىك عىلىمي قىزمەتكەر» اتاعىمەن 2 مىڭ اەك كولەمىندە ولاردى ىنتالاندىرۋ كوزدەلىپ وتىر.
زاڭ جوباسىنا قولداۋ كورسەتكەن ۇكىمەتكە العىس ايتامىز. اتالعان سىياقىنىڭ كولەمى 5 ملن 834 مىڭ تەڭگەنى قۇرايدى. بۇل دەگەنىمىز عىلىم سالاسىنا جاستاردىڭ قىزىعۋشىلىعىن ارتتىرىپ، ول سالاداعى ىزدەنىستە جۇرگەن عىلىمي قىزمەتكەرلەردىڭ باسەكەلەستىگىن ارتتىرارى ءسوزسىز. زاڭ جوباسىنا سايكەس، سىياقىنى بەرۋ ەرەجەسىن جۇزەگە اسىرۋ – ۋاكىلەتتى ورگانعا جۇكتەلگەن»، - دەدى بۇگىنگى سەنات وتىرىسىندا دەپۋتات ءالىمجان قۇرتايەۆ.
ال ءبىلىم جانە عىلىم ۆيسە-مينيسترى شولپان قارينوۆا سىياقىنى بەرۋ ماسەلەسىنە توقتالدى.
««ۇزدىك عىلىمي قىزمەتكەر» - عىلىمي ورتاداعى كوپتەن كۇتكەن جاڭالىق. بۇل سىياقى جىلىنا 50 عىلىمي قىزمەتكەرگە بەرۋ قاراستىرىلعان. ەلىمىزدە بۇگىنگى تاڭدا 20 مىڭعا جۋىق عىلىمي قىزمەتكەر جۇمىس ىستەيدى. بۇل سىياقى جاس مامانداردى ىنتالاندىرادى دەپ كۇتىلۋدە. بۇگىنگى كۇنى وسى سىياقى بويىنشا عالىمدارعا قويىلاتىن ناقتى تالاپتاردى ايقىنداۋ جۇمىستارى باستالدى. بىرنەشە ۇسىنىس كەلدى. بۇل رەتتە اشىقتىقتى قامتاماسىز ەتۋ ماسەلەسى ءبىرىنشى ورىندا تۇر. ونى ايقىندايتىن كوميسسيا قۇرامىنا بەلگىلى قوعام قايراتكەرلەرى، قوعامدىق ۇيىمداردىڭ مۇشەلەرى، تاۋەلسىز باقىلاۋشىلار دا كىرەدى»، - دەدى ول.
You Might Also Like
-
ءجاي عانا قۇران باعىشتاپ، اس بەرۋدىڭ سوڭى كىشىگىرىم داۋ-دامايعا ۇلاسىپ كەتەدى دەپ كىم ويلاعان... ءجاميلا كەمپىر بۇگىن ۇيقىسىنان ەرتەرەك ويانىپ، قاپتاعى ۇننان مولىراق سالىپ، جەتى كۇلشە پىسىرۋگە اپىل-عۇ...
