InfoHub Logo

قازاقستاننىڭ ءبىلىم بەرۋ سالاسىندا – مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىندا 500 مىڭعا جۋىق پەداگوگ جۇمىس ىستەيدى. قاراعاندى، اتىراۋ، اقمولا، الماتى، اقتوبە وبلىستارىندا مۇعالىمدەردىڭ تاپشىلىعى بايقالادى.

ق ر وقۋ-اعارتۋ مينيسترلىگىنىڭ حابارلاۋىنشا، بۇگىندە قازاقستان مەكتەپتەرىندە 340 958 ءمۇعالىم جۇمىس ىستەيدى. ونىڭ 274 مىڭى ايەلدەر، 66 مىڭى – ەر ادامدار. ەڭبەك ءوتىلى 10 جىلعا دەيىنگى مۇعالىمدەر – 139 مىڭ، 10 جىلدان 20 جىلعا دەيىن – 98 مىڭ، 20 جىلدان 30 جىلعا دەيىن – 64 مىڭ، 30 جىلدان جوعارى – 39 مىڭ ءمۇعالىم بار.

سونداي-اق، تەحنيكالىق جانە كاسىپتىك ءبىلىم بەرۋ نىساندارىندا 36 315 وقىتۋشى قىزمەت ەتەدى. ونىڭ 24 مىڭى ايەلدەر بولسا، 11 860-ى ەرلەر. ەڭبەك ءوتىلى 10 جىلعا دەيىنگى مۇعالىمدەر – 19 مىڭ، 10 جىلدان 20 جىلعا دەيىن – 8 مىڭ، 20 جىلدان 30 جىلعا دەيىن – 5 مىڭ، 30 جىلدان جوعارى – 3521 وقىتۋشى بار.

مەكتەپكە دەيىنگى ۇيىمداردا پەداگوگتەر سانى – 97 188. ونىڭ اراسىندا 94 648 ايەل، 2 540 ەر ادام بار. ەڭبەك ءوتىلى 10 جىلعا دەيىنگى پەداگوگ – 64 مىڭ، 10 جىلدان 20 جىلعا دەيىن – 20 مىڭ، 8 جىلدان 30 جىلعا دەيىن – 5 مىڭ، 30 جىلدان جوعارى – 4 مىڭ تاربيەشى بار.

سونىمەن بىرگە، وقۋ-اعارتۋ مينيسترلىگىنىڭ حابارلاۋىنشا، قاراعاندى، اتىراۋ، اقمولا، الماتى، اقتوبە وبلىستارىندا مۇعالىمدەردىڭ تاپشىلىعى بايقالادى. پاندەر بويىنشا – ەلىمىزدە ماتەماتيكا، باستاۋىش سىنىپ، ورىس ءتىلى جانە ادەبيەتى، فيزيكا، حيميا جانە اعىلشىن پاندەرىنەن مۇعالىمدەر جەتىسپەيدى.

ايتا كەتەيىك، بيىل العاش رەت مۇعالىمدەر كۇنى مەرەكەسى 5 قازاندا مەرەكەلەنەدى. وسى ۋاقىتقا دەيىن رەسپۋبليكادا مۇعالىمدەر كۇنى قازان ايىنىڭ ءبىرىنشى جەكسەنبىسىندە تويلانىپ كەلدى. ەندى بۇل مەرەكە 5 قازاندا الەمنىڭ 100-دەن استام ەلى اتاپ وتەتىن دۇنيەجۇزىلىك مۇعالىمدەر كۇنىمەن سايكەستەندىرىلدى.

مەملەكەت باسشىسىنىڭ باستاماسىمەن 2019 جىلى پەداگوگتەردىڭ مارتەبەسى جەكە زاڭمەن بەكىتىلدى.

ءتورت جىل ىشىندە مەكتەپ مۇعالىمدەرىنىڭ جالاقىسى ەكى ەسە ءوستى. 220 مىڭعا جۋىق ۇستاز تاعايىندالعان ساناتى ءۇشىن 50%-عا دەيىن ۇستەمەاقى الادى. وندىرىستەن تارتىلعان تەحنيكالىق جانە كاسىپتىك ءبىلىم بەرۋ پەداگوگتەرى جالاقىسىنا 35%-عا دەيىن قوسىمشا اقى الادى. بيىلعى قىركۇيەك ايىنان باستاپ 97 مىڭ تاربيەشىنىڭ جالاقىسى تاعى 30%-عا كوتەرىلگەن.

سونداي-اق، كەشە استانالىق مۇعالىمدەرگە كاسىبي مەرەكەسىندە سىيلىق جاساۋعا تىيىم سالىندى. قالالىق ءبىلىم باسقارماسى ءبىلىم بەرۋ ۇيىمدارىنىڭ اتا-انالاردان سىي-سياپات الۋىنا تىيىم سالاتىن بۇيرىق شىعاردى.

---