InfoHub Logo

بيىل العاش رەت مۇعالىمدەر كۇنى مەرەكەسى 5 قازاندا مەرەكەلەنەدى. ءتيىستى قاۋلىنى ق ر ۇكىمەتى بيىل 10 ناۋرىزدا قابىلداعان بولاتىن.

مەملەكەتتىك مەرەكەلەر تىزىمىنە سايكەس، وسى ۋاقىتقا دەيىن رەسپۋبليكادا مۇعالىمدەر كۇنى قازان ايىنىڭ ءبىرىنشى جەكسەنبىسىندە تويلانىپ كەلدى. ەندى بۇل مەرەكە 5 قازاندا الەمنىڭ 100-دەن استام ەلى اتاپ وتەتىن دۇنيەجۇزىلىك مۇعالىمدەر كۇنىمەن سايكەستەندىرىلدى.

مۇعالىمدەر كۇنىنە ارنالعان ۇزدىك قۇتتىقتاۋلار

دۇنيەجۇزىلىك مۇعالىمدەر كۇنىن بەكىتۋگە 1966 جىلى 5 قازاندا پاريجدە وتكەن مۇعالىمدەردىڭ مارتەبەسى تۋرالى ارنايى ۇكىمەتارالىق كونفەرەنسيا ۇيتقى بولدى. ناتيجەسىندە يۋنەسكو مەن حالىقارالىق ەڭبەك ۇيىمىنىڭ وكىلدەرى «مۇعالىمدەردىڭ مارتەبەسىنە قاتىستى ۇسىنىستار» قۇجاتىنا قول قويدى. دۇنيەجۇزىلىك مۇعالىمدەر كۇنى العاش رەت 1994 جىلى 5 قازاندا اتاپ ءوتىلدى.

«ءقادىرلى ۇستازدار! سىزدەردى ءتول مەرەكەمىز – مۇعالىمدەر كۇنىمەن شىن جۇرەكتەن قۇتتىقتايمىن! ەلىمىزدەگى ميلليونداعان جاس ورەن وزدەرىڭىزدەن تاعىلىمدى تاربيە، ونەگەلى ءبىلىم الىپ، ۇلكەن ءومىر جولىنا قادام باسادى. سىزدەردىڭ قاجىرلى ەڭبەكتەرىڭىزدىڭ، شىدامدىلىقتارىڭىز بەن ادالدىقتارىڭىزدىڭ ارقاسىندا كەلەشەك ۇرپاقتىڭ نەگىزى قالىپتاسادى. تۇلعا دامۋىنىڭ باستاۋىندا تۇرعان، بويىنداعى ءبىلىمىن بالالارعا بەرىپ، ولاردى ەڭبەكسۇيگىشتىككە، ادامگەرشىلىككە، ەلجاندىلىققا، ءوز وتانىنا دەگەن سۇيىسپەنشىلىككە باۋليتىن – سىزدەرسىزدەر. قۇرمەتتى ارىپتەستەر، بۇل ماڭىزدى دا كۇرمەۋى قيىن جولداعى شەشۋشى ءرول سىزدەرگە عانا تيەسىلى»، - دەپ قۇتتىقتادى ق ر وقۋ-اعارتۋ ءمينيسترى عاني بەيسەمبايەۆ.

ءمينيستردىڭ ايتۋىنشا، ەلىمىزدىڭ ۇزدىك مۇعالىمدەرى «ءبىلىم بەرۋدەگى وزگەرىستىڭ 1000 كوشباسشىسى» رەسپۋبليكالىق كادر رەزەرۆىنە قابىلدانا الادى. ال ەڭ مىقتىلارى «بولاشاق» باعدارلاماسى بويىنشا شەتەلدىك تاعىلىمدامادان وتۋگە جىبەرىلەدى.

مينيسترلىك ءبىلىم سالاسىندا 30 جانە ودان دا كوپ جىل ەڭبەك ەتكەن مۇعالىمدەردى «ەڭبەك ارداگەرى» مەدالىمەن ماراپاتتاۋ تۋرالى شەشىم قابىلدادى. العاش رەت رەسپۋبليكالىق پەداگوگيكا قىزمەتكەرلەردىڭ ارداگەرلەر كەڭەسى قۇرىلدى. مۇنداي كەڭەستەر ەلدىڭ ءار ايماعىندا قۇرىلادى.

ايتا كەتەيىك، بۇگىندە قازاقستاننىڭ ءبىلىم بەرۋ سالاسىندا 500 مىڭعا جۋىق مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ پەداگوگى جۇمىس ىستەيدى.

مەملەكەت باسشىسىنىڭ قولداۋىمەن 2019 جىلى ماڭىزدى ماسەلەنىڭ ءبىرى – پەداگوگ ماماندىعىنا ەرەكشە مارتەبە بەرۋ جونىندە شەشىم قابىلداندى.

ءتورت جىل ىشىندە مەكتەپ مۇعالىمدەرىنىڭ جالاقىسى ەكى ەسە ءوستى. 2023 جىلدىڭ 1 قاڭتارىنان باستاپ مۇعالىمدەردىڭ جالاقىسى تاعى 25 پايىزعا كوتەرىلدى. بۇگىندە 220 مىڭداي مۇعالىمگە تاعايىندالعان ساناتتارىنا قاراي 50 پايىزعا دەيىن ۇستەماقى تولەنىپ وتىر.

بيىلعى قىركۇيەك ايىنان باستاپ مەكتەپكە دەيىنگى ۇيىمداردا ەڭبەك ەتەتىن 97 مىڭ پەداگوگتىڭ جالاقىسى تاعى 30 پايىزعا ءوستى. سونىمەن قاتار، بيىل العاش رەت 90 مىڭنان استام پەداگوگ بىلىكتىلىكتى ارتتىرۋ كۋرستارىنان ءوتتى.

سونداي-اق، بۇگىن استانادا رەسپۋبليكالىق پەداگوگتەر سەزى وتەدى. مۇنداي شارا 2005 جىلدان بەرى وتكىزىلمەگەن. وعان ەلىمىزدىڭ بارلىق وڭىرىنەن 700-گە جۋىق ءمۇعالىم قاتىسادى. پەداگوگتەر ارنايى ۇيىمداستىرىلعان الاڭدارادا وزىق ەڭبەكتەرىمەن جانە حالىقارالىق تاجىريبەلەرمەن بولىسەدى.

رەسپۋبليكالىق پەداگوگتەر سەزىندە ورتا ءبىلىم بەرۋ ساپاسىن ارتتىرۋعا ەرەكشە كوڭىل بولىنبەك. ءبىلىم بەرۋ ساپاسىن ارتتىرۋدىڭ تۇجىرىمدامالىق اسپەكتىلەرى پلەنارلىق وتىرىستا ق ر وقۋ-اعارتۋ ءمينيسترىنىڭ «ءبىلىم ساپاسى: جاي-كۇيى جانە جەتىلدىرۋ جولدارى» بايانداماسىندا جاريالانادى. بۇل كۇنى ەلىمىزدىڭ ۇزدىك پەداگوگتەرىن ماراپاتتاۋ ءراسىمى دە وتكىزىلەدى.