InfoHub Logo

مەكتەپ بىتىرگەن ءاربىر تۇلەكتىڭ جۇرەگىنىڭ تۇكپىرىندە بولاتىن ۇلكەن ارمانى ەڭ ۇزدىك، جوعارعى ۋنيۆەرسيتەتتىڭ ستۋدەنتى اتانۋ. ءاربىر ءبىتىرۋشى تۇلەك ءوزىنىڭ بولاشاعىن قازاقستانداعى مىقتى، بەدەلدى ۋنيۆەرسيتەتتەن ءبىلىم الىپ دامۋىمەن ەلەستەتەدى. مەندە وسىدان ءبىر جىل بۇرىن جۇرەگىنىڭ تۇكپىرىندە اسقاق ارمانى بار، ۇلكەن قوبالجۋمەن جۇرگەن ءبىتىرۋشى تۇلەك بولدىم. ءدال وسى ساتتە مەنى  كەمەل بولاشاققا جەتەلەگەن، العا قاراي قادام باسۋىما ۇلكەن موتيۆاسيا بولعان، تالاي مىقتى مامانداردى ءبىلىم نارىمەن سۋسىنداتىپ، ولارعا زور مۇمكىندىك سىيلاعان، مۇمكىندىكتەرگە تولى-قازۇۋ ەدى. الەمگە جاڭا كوزقاراسپەن قارايتىن، جانارىندا جالىندى وتى بار، جاڭاشىلدىققا قۇمار جاس ءۇشىن قازۇۋ-دىڭ ستۋدەنتى بولۋ بىردەن-بىر تاپتىرماس مۇمكىندىك پەن جەتىستىك دەپ سانايمىن. سەبەبى اراعا ءبىر جىل سالىپ ءوزىمنىڭ جىلدار بويى ارمانداعان ۋنيۆەرسيتەتىمە گرانت جەڭىپ الىپ، الماتىعا كەلىپ، قازۇۋ-دى كورگەندەگى سەزىمىم تىم بولەك ەدى. قالا ىشىندە «كازگۋگراد» قالاشىعى اتالىپ كەتكەن قۇتتى مەكەندە ستۋدەنتتەر الاڭسىز ءبىلىم الۋى ءۇشىن بارلىق جاعداي جاسالىنعان. قىسى، جازى قالپىن وزگەرتپەيتىن قازۇۋ قالاشىعى كىمدى بولماسىن تاڭقالدىرارى ءسوزسىز. سەبەبى قالاشىققا كىرگەن ۋاقىتتان باستاپ، ءسىز ۋنيۆەرسيتەتتىڭ بيىك-بيىك عيماراتتارىنىڭ، حوش ءيىستى گۇلدەرى مەن جاسىل-جەلەك اعاشتارىنىڭ كەرەمەتىنە كۋا بولاسىز. جاتاحانالارعا قاراي جول تارتا باستاساڭىز الدىڭىزدا اسپانمەن استاسقان بيىك، اسەم تاۋلار ەرەكشە كورىنىپ تۇرادى، وسىنىڭ بارلىعى ستۋدەنتتەرگە ەرەكشە كۇش-قۋات پەن ءبىلىم الۋعا دەگەن قۇشتارلىق سىيلايدى.

قالاشىعىمىزدا ەرەكشە توقتالىپ وتەر كوپتەگەن ورتالىقتارىمىز بار، سولاردىڭ ىشىندە-جىل سايىن حالىقارالىق، مەملەكەتتىك دەڭگەيدە ءارتۇرلى جيىندار مەن كونسەرتتەر وتكىزىلىپ تۇراتىن ءو.ا.جولداسبەكوۆ اتىنداعى ستۋدەنتتەر سارايى. ستۋدەنتتەر سارايى قازاقستانداعى ەڭ ادەمى كونسەرت زالدارىنىڭ ءبىرى، مادەني-ىس شارالار وتكىزىلەتىن باعىتتاعى نىساندار اراسىندا ۇلكەندىگى جاعىنان رەسپۋبليكا سارايىنان كەيىنگى ەكىنشى ورىندا. قازۇۋ-دىڭ ستۋدەنتتەر سارايىندا 1620 ورىن بار جانە ستۋدەنتتەر مەن جاستاردىڭ ءارتۇرلى مادەني ونەرلەرىن شىڭداۋ، شىعارماشىلىق قابىلەتتەرىن دامىتۋ  ماقساتىندا بارلىق مۇمكىندىكتەر قاراستىرىلعان. سونىمەن قاتار، قالاشىق توڭىرەگىندە سپورتقا جانى قۇمار جالىندى جاستار ءۇشىن دە جاعداي جاسالىپ، اۋقىمى كەڭ سپورتتىق كەشەندەر كوپتەپ سالىنعان. ستۋدەنتتەردىڭ بارلىق قاجەتتىلىكتەرى مەن ماسەلەلەرى شەشىلەتىن «كەرەمەت» ستۋدەنتتەرگە قىزمەت كورسەتۋ ورتالىعى دا ءوز جۇمىسىن جوعارى دەڭگەيدە اتقارادى. قازۇۋ قالاشىعى تۇگەلدەي دەرلىك تەگىن WI-FI ينتەرنەت جەلىسىمەن قامتىلعان.

قازۇۋ-دىڭ كوركى مەن بەدەلىن ارتتىرار تاعى ءبىر ءبىلىم ءورتالىعى-ال-فارابي كىتاپحاناسى. كىتاپحانا ورتا ازياداعى جوعارى وقۋ ورىندارى اراسىنداعى ەڭ ۇلكەن كىتاپ قورىنا يە، قازىرگى ۋاقىتتا كىتاپحاناداعى كىتاپتار قورى 2 ميلليون اسقان. كىتاپحانادان ستۋدەنتتەر وزدەرىنە كەرەك كەز-كەلگەن وقۋلىق پەن ادەبي شىعارمالاردى تابا الادى، ەگەر قاجەتتىلىك تۋىنداعان جاعدايدا ستۋدەنت جەتىسپەي قالعان كىتاپتىڭ ەلەكتروندى نۇسقاسىن دەرەۋ تاۋىپ، وقي الادى.

سونىمەن قاتار، قازاق ۇلتتىق ۋنيۆەرسيتەتى ءوزىنىڭ نەگىزىن 1934 جىلى 15 قاڭتاردا قالاعان ۋاقىتتان باستاپ قاي سالادان بولسا دا قازاقستانداعى ەڭ جوعارى ءبىلىم بەرۋ ۇيىمدارىنىڭ تىرەگى، ولاردىڭ ىشىندەگى ەڭ بەدەلدىسى، بىلىمگەرلەردىڭ ورداسى بولىپ كەلەدى. ۋنيۆەرسيتەت  2012 جىلعى قورىتىندى بويىنشا الەمدىك ۇزدىك جوعارعى وقۋ ورىندارىنىڭ ىشىنەن 390-شى ورىندى يەلەندى، «التىن ساپا» پرەمياسىمەن ماراپاتتالدى. قازىرگى تاڭدا، قازۇۋ-كوپ ەلدەر مەن قالالاردىڭ، شەتەل ازاماتتارىنىڭ باسىن قوسىپ، قارا شاڭىراققا اينالىپ وتىر. ۋنيۆەرسيتەت 37 سالا بويىنشا ماماندار دايىندايتىن جوعارعى وقۋ ورنىنا اينالىپ، جاقىندا عانا عىلىمي-زەرتتەۋ ورتالىعى اتاعىن الدى. ۋنيۆەرسيتەتتىڭ ءبىلىم دەڭگەيى جوعارى دارەجەدە، 2000 مىڭنان استام جوعارى بىلىكتى ماماندار ءدارىس بەرەدى، ونىڭ ىشىندە 1000-نان استامى عىلىم دوكتورى مەن كانديداتى.

قازۇۋ-دىڭ ستۋدەنتتەرگە بەرەتىن مۇمكىندىكتەر قاتارىنا ولاردىڭ شەت ەلدەرگە شىعىپ، ءوز بىلىمدەرىن جالعاستىرۋىن جاتقىزا الامىز، ياعني ستۋدەنتتەر كورشىلەس شەت ەلدەرگە بارىپ وقىپ، تاجىريبە الماسىپ كەلە الادى.ارينە، بۇل ءۇشىن ستۋدەنتتىڭ ءتىل بايلىعى مەن وزگە تىلدەردى جەتىك مەڭگەرۋى وتە ماڭىزدى. وسى ورايدا، ۋنيۆەرسيتەت قابىرعاسىندا قازىرگى زامان تالابىنا ساي، ءۇش تىلدىك دەڭگەيدە وقىتۋ جۇيەسىنىڭ قارقىندى دامىعانىن تىلگە تيەك ەتكىم كەلەدى. ۋنيۆەرسيتەتتە ءدارىس بەرەتىن ءتىل ماماندارىنىڭ دەڭگەيى وتە جوعارعى دارەجەدە، مىسالى قازىرگى ۋاقىتقا ەڭ كەرەك اعىلشىن ءپانىنىڭ كۇندەلىكتى ءدارىس ءوتۋ بارىسى باسقالاردان ەرەكشە دەپ تولىق ايتا الامىن. ءبىلىم بەرەتىن ۇستازدىڭ ستۋدەنتتەرمەن ارا-قاتىناسى وزىنە ءسوزسىز باۋرايدى، ءاربىر دارىستە ساباقتىڭ ەرەكشە تاسىلمەن قىزىقتى ءارى پايدالى ءوتىلۋى-ۇستازدىڭ ۇلكەن جاۋاپكەرشىلىگى مەن ءوز ءپانىنىڭ ناعىز مايتالمانى ەكەنىنىڭ دالەلى.  ساباق بارىسىندا ستۋدەنتتەردىڭ ءوز ويلارىن اشىق ايتىپ، ءتىل بايلىقتارىن دامىتىپ، اعىلشىن تىلىندە ەركىن سويلەۋلەرىنە ۇلكەن ءمان بەرىلەدى.

قازۇۋ-دىڭ تاعى دا ءبىر ەرەكشەلىگى مۇندا  ستۋدەنتتەر تەك ءبىلىم تۇرعىسىنان دامىپ قانا قويماي، وزدەرىنە جاڭا ورتا سىيلايتىن ءارتۇرلى ۇيىمدارعا قوسىلىپ، ستۋدەنتتىك ومىرلەرىن اكتيۆيستيكامەن قىزىقتى ەتە الادى. سونىڭ ىشىندە «كومەك» قوعامدىق قورى، «سۇڭقار» ستۋدەنتتەر مەن ماگيسترانتتار كاسىپ وداعىنىڭ قوعامدىق بىرلەستىگى، جانە قازۇۋ قالاشاعى مەن جاتاحانا ءومىرىنىڭ تازالىعىنا، تارتىبىنە جاۋاپتى «جوعارى ستۋدەنتتەر كەڭەسى» مەن «قۇقىقتىق ءتارتىپ ساقتاۋ جاساعى» سىندى ۇيىمدار ءوز جۇمىستارىن بەلسەندى تۇردە اتقارادى. ستۋدەنتتەرگە جىل سايىنعى وتكىزىلەتىن عىلىمي-پراكتيكالىق كونفەرەنسيالارعا، رەسپۋبليكالىق جانە ايماقتىق جوبالارعا، وليمپيادالار مەن كونكۋرستارعا قاتىسۋعا تولىقتاي مۇمكىندىك جاسالعان.

قورىتىندىلاي كەلە، ءقازۇۋ-بىلىمنىڭ التىن كەنىشى مەن مۇمكىندىكتەر مەكەنى دەپ ءسوزسىز ايتا الامىز. ۋنيۆەرسيتەت قابىرعاسىندا وقىعان ءاربىر جالىندى جاس ستۋدەنت-ەلىمىزدىڭ ەرتەڭى، ۇلتىمىزدىڭ ايناسى بولار ەرەكشە تۇلعا بولىپ قالىپتاساتىنىنا ەش كۇمان جوق. سول سەبەپتى دە، مەن ءوزىمنىڭ قازاق ۇلتتىق ۋنيۆەرسيتەتىنىڭ ستۋدەنتى بولىپ ءبىلىم الىپ جاتقانىمدى-ومىرىمدەگى ەڭ ۇلكەن جەتىستىگىم مەن ساتتىلىگىم دەپ ويلايمىن.

اقپاراتتىق تەحنولوگيالار فاكۋلتەتىنىڭ 1-كۋرس ستۋدەنتى: باتىربەك ارايلىم قايرات قىزى

جەتەكشىسى: جەميلوۆا مادينا ماراتوۆنا

---