قىمىزمۇرىندىق
نارتاي مەن اتاسى جايلاۋدا ءبىراز كۇن تۇردى. وعان سەبەپ قوناققا شاقىرعان كىسىلەردىڭ قولقاسى بولدى. «قىمىز ءىشىپ كەتىڭىزدەر» دەدى قيىلىپ. اسىعىس جۇمىس بولماعان سوڭ، ۇسىنىستى تەرىس كورمەدى.
بۇل جاعدايعا بارىنەن بۇرىن نارتاي قاتتى قۋاندى. كەلگەن ساتتەن-اق قۇلپىرىپ كەتكەن جايلاۋعا قۇمارتىپ قالىپ ەدى، ءبىراز كۇن قالاتىندارىن ەستىگەندە، شاتتىعى ەسەلەنە ءتۇستى. تاعى ءبىر جاعىنان ونىڭ وتكەلى تۇرعان «قىمىزمۇرىندىقتى» كورگىسى كەلگەن-دى.
سول كۇنى قوناق بوپ بارعان ۇيلەرىنە ادام كوپ جينالدى. كوبى ۇلكەندەر. جاياۋلاتىپ كەلگەن اق جاۋلىقتى اجەلەر دە بولدى. بالالار دا اعىلدى.
سولارعا ەرىپ نارتاي ويىننىڭ تۋىن تىكتى دەيسىڭ. تۇسكە تاياعان ءبىر كەزدە ابىر-سابىر باسىلىپ، جۇرت ۇلكەن ءۇيدىڭ الدىنا قاراي جينالدى. نارتاي سوندا بارىپ ۇيگە كىردى. اتاسىنىڭ قاسىنان ورىن الدى.
كەشىكپەي الدىعا داستارقان جايىلىپ، تاباق تارتىلدى. نارتايدىڭ اتاسى باتا بەردى. ءسوز اراسىندا «ءورىس شۇيگىن بولسىن»، «قىمىز مول بولسىن» دەگەن تىلەكتەر ايتىلدى. وسى تىلەكتەردەن نارتاي «قىمىزمۇرىندىقتىڭ» الدەقاشان باستالىپ كەتكەنىن ءبىلدى.
بەت سيپالىپ، تاباقتار جينالعان سوڭ، تەگەنە تولى قىمىز كەلدى الدىعا. ءبىرىنشى توستاعاندى قولىنا العان جىگىت اعاسى بۇگىنگى باسقوسۋدىڭ ماعىناسىن تۇسىندىرە كەلىپ، مۇنىڭ بيىلعى العاشقى قىمىز ەكەنىن جەتكىزىپ، ۇلكەندەردەن قايتارا باتا سۇرادى.
كەشىكپەي سالەم بەرىپ ىشكە كىرگەن اقىن جىگىت دومبىراسىن الىپ، توگىلتە ولەڭ باستادى. ول اۋەلى بيىل ەرەكشە تۇرلەنىپ كەتكەن جايلاۋدىڭ كوركىن ايتتى. سونان سوڭ ەلدىڭ بەرەكە-بىرلىگىن جىرعا قوستى. وسىعان مۇرىندىق بولعان اقساقالداردىڭ كورەگىندىگىن ماداقتاپ ءوتتى. سوڭىندا، بۇگىنگى مەرەكەنى ۇيىمداستىرىپ وتىرعان ۇيگە كوپ تىلەك تىلەپ، العىس جاۋدىردى. ولەڭ شۋماقتارىن ءار قايىرعان سايىن ءازىل ايتىپ جۇرتتى كۇلكىگە قارىق قىلدى. وتىرعاندار جاس اقىننىڭ تاپقىرلىعىنا ءسۇيىنىپ، ريزاشىلىقتارىن ءبىلدىردى.
— ءاي، بارەكەلدى! شىن ءسوز! بۇل ءۇي — اۋىلىمىزدىڭ بەرەكەسى عوي! — دەپ، ءۇي يەسى تۋرالى تولعاعان تۇستا قول سوعا قولپاشتادى.
نارتاي تاڭعالا تىڭدادى. بارلىق ءسوزىن ءتۇسىندى. اراسىندا قۇرمەتتى قوناق رەتىندە اتاسىنىڭ ەسىمىن دە ەرەكشە اۋىزعا الىپ، «اياعى قۇتتى بولسىن» دەدى.
ولەڭ ءبىرازعا سوزىلىپ بارىپ، ىزگى تىلەكپەن ءتامامدالدى. ەل ىقىلاسىنا لەڭ بولەنگەن جىگىت ءيىلىپ تاعزىم جاساپ، شىعىپ كەتكەن سوڭ، ءسۇيىنىشتى سوزدەر تالايعا دەيىن تولاستامادى.
نارتاي دا ريزا ەدى. مۇندا قالىپ، از كۇن ايال بولعانىنا كوڭىلى قوش بولاتىن. ىشتەي جايلاۋدان كورگەن-بىلگەن جايلاردى ويداعى دوستارىنا تۇك قالدىرماي ايتىپ بەرۋدى ويلاپ وتىردى.
You Might Also Like
-
نارتايلار «تەڭگە ءىلۋدى» كورىپ بولىپ، كەلەسى توپقا بەت الدى. مۇندا دا جارىس قىزىپ جاتىپتى. كورەرمەندەر قاتارىنا كەلىپ تۇرا قالدى.
-
تاۋعا اپاراتىن جالعىزاياق جول نارتايلاردىڭ اۋىلىنىڭ شەتىندە. ونىمەن كوبىندە ويعا تۇسكەن مالشىلار، كەيدە مىلتىق اسىنعان اڭشىلار وتەتىن.
