يەسىز ادام
— نارتاي! — دەدى اجەسى سىرتتان. — نارتاي!
نارتاي ۇيدە كىتاپ وقىپ وتىرعان بولاتىن. اجەسىنىڭ داۋىسىنان ءبىر ماڭىزدى شارۋاعا كەرەك بوپ قالعانىن شامالاپ، اتىپ شىقتى. سويتسە، اجەسى ەسىك الدىنداعى قۇرت ورەنىڭ قاسىندا تۇر ەكەن. قولىندا دوربا، قاسىندا ورىندىق.
— كەل بەرى، — دەدى نارتايدى كورگەن سوڭ. — انا ورىندىققا شىق. كەپكەن قۇرتتان مىنا دوربانى تولتىرىپ، الىپ ءتۇس!
نارتاي اجەسىنىڭ ايتقانىن ىستەدى. شارۋانى بىتىرگەن سوڭ، انشەيىندە ماڭىنا جولاتپايتىن قۇرتىن دورباعا تولتىرىپ العانىنا تۇسىنبەي، ادەتى بويىنشا سۇراۋ تاستادى.
— اجە، بۇل قۇرتتاردى كىمگە بەرەسىز؟
دورباعا تۇسكەن قۇرتتاردى قولىنا الىپ، كەپكەن-كەپپەگەنىن ءبىلىپ، وزىمەن-وزى بولىپ كەتكەن اجەسى بىردەن جاۋاپ بەرگەن جوق. جۇمىسىن ءتامامداعان سوڭ بارىپ:
— ا؟ — دەدى باسىن كوتەرىپ.
نارتاي جاڭاعى ساۋالىن تاعى ءبىر رەت قايتالادى.
— وي، الگى… — دەدى اجەسى الدەنەگە ريزا بولا جىميىپ. — باياعى مارتا بار ەمەس پە… مىنا وڭ جاعىمىزدا وتىرعان كورشى… گەرمانياعا كوشىپ كەتكەن… سونىڭ… وي، الجىعان باسىم، سەن ونى بىلمەيدى ەكەنسىڭ عوي، راس… — دەدى وسى ارادا ءبىر توقتاپ، قولىن سىلتەپ قويىپ. سونسىن وزىنە-وزى سويلەگەندەي، باستالعان اڭگىمەسىن ارى جالعاپ اكەتە بەردى. — ولار كوشكەلى دە، مىنە، ون نەشە جىل بولدى. وندا سەن جوقسىڭ… سونداي ءبىر جاقسى كورشىمىز بولعان. ۇلتى — نەمىس. نەمىس بول عانمەن، قازاققا بەرگىسىز جاندار بولاتىن. جاقسى ادامدار ەدى، شىركىن! سونىڭ وسىدان كەتەردە ەس كىرىپ قالعان ۇلى بار ەدى، سول كەلىپتى. قازاقشاسىن ۇمىتپاپتى الگى بالا. كادىمگىدەي قول بەرىپ امانداسادى. اكە-شەشەسى ۇيرەتكەن عوي، جارىقتىقتار. «اكە-شەشەم سىزدەردى ساعىنىپ جىلايدى» دەيدى. ەندى ءقايتسىن، بەيشارالار! وڭاي دەيسىڭ بە؟! قانشا دەگەنمەن ۇيرەنگەن ەل عوي! ساعىنادى. «جول الىس، وزدەرى كەلە المايدى. سەن بارىپ، كورىپ كەل دەپ مەنى جىبەردى» دەيدى. ازامات! اقىلدى بولىپ ءوسىپتى ءوزى. سول بالا بىر-ەكى كۇندە كەتەدى ەكەن. بىرگە جۇرگەن كىسىلەر عوي، بالاسىنىڭ قولىنا قارايتىن شىعار، اكە-شەشەسىنە سالەمدەمە بەرىپ جىبەرەيىن دەپ…
— سالەمدەمە دەگەن قۇرت پا، اجە؟
— جوعا. قۇرتى نەسى؟! مەن قۇرت بەرەم. باسقا قازى-قارتا، جەمىس-جيدەك بەرۋگە كۇن ىستىق، بۇزىلىپ كەتەدى. قۇرتتى دۇرىس كوردىم. ونىڭ ۇستىنە، مارتا قۇرتتى قاتتى جاقسى كورەتىن. كەرەك بولسا، ءوزى ايران ۇيىتىپ، قۇرت جاسايتىن. ول جاقتا سيىر جوق شىعار، بولسا، جاسايدى عوي تالاي. قازاقتىڭ اس-تاماعىن جاساۋدى ەشكىمنەن سۇرامايدى ول. مىناۋ، ەندى، جۇرگەن جەرىنىڭ، ەلدىڭ ءدامى دەگەنىم عوي… ماۋقىن ءبىر باسىپ قالسىن اسىل قۇربىم!
اجەسى اڭگىمەسىن ايتا ءجۇرىپ، ۇيگە كىرىپ كەتتى. نارتاي ەسىك الدىندا قالدى. «سالەمدەمە» دەپ قويدى سالدەن سوڭ ۇمىتىپ قالمايىن دەگەندەي تاعى ءبىر قايتالاپ. «سالەمدەمە».
You Might Also Like
-
نارتايدىڭ جايلاۋدا كورگەن قىزىقتىرى كوپ بولدى. سولاردىڭ ءبىرى — كۇرەس. بالۋان كۇرەس. اتاسى ەلگە قۇرمەتتى ادام عوي. ونىڭ جايلاۋدا جۇرگەنىن ەستىگەن جۇرت ءجيى تويعا شاقىرادى. بۇل جولى نارتاي اتاسى...
-
نارتاي بۇگىن كۇندەگىدەن ەرتە تۇردى. ويتكەنى، قالادان قىسقى دەمالىسقا كەلگەن ستۋدەنت كوكەسى نارمان ساباعىنا قايتپاق.
