InfoHub Logo

قوجا ەل ارالاپ ءجۇرىپ، ءبىر ساراڭ بايدىڭ ۇيىنە تۇسەدى.

— ۇيدە تاماق جوق، بار بولسا، ءوزىمنىڭ دە ىشكىم كەلىپ وتىر، — دەپ باي اۋزىن قۋ شوپپەن ءسۇرتىپ، قۇدايى قوناققا ءدام تاتتىرعىسى كەلمەيدى. سوندا قوجا:

— مەن كەسپە جاساي قويايىن، — دەپ قازاندا قايناپ تۇرعان سۋعا تۇز سالىپ جانە وجاۋدى باتىرىپ ارالاستىرا باستايدى. وجاۋدان كەسپە ىستەۋدى ۇيرەنىپ ال، — دەپ بايعا ءازىل-وسپاق ايتادى. پايدالى ءىس بولسا، ۇيرەنىپ الايىن، — دەپ باي قازاننان كوز الماي قاراپ وتىرادى. ءبىرازدان سوڭ قوجا قازانداعى سۋدى تاتىپ كورىپ:

— جامان كەسپە بولاتىن ءتۇرى جوق، ءبىراق مىنا وجاۋمەن كوپتەن مايلى سورپا ساپىرىلماعان ەكەن، كەسپەنىڭ ازداپ قاتىعى جەتپەي تۇر. باي بولساڭ دا، جالعىز وجاۋىڭدى اسقا جارىتا الماپسىڭ، — دەپ، قوجا بايدى تاعى دا قاعىتادى.

قوجا ءسوزى نامىسىنا تيگەن باي ورنىنان تۇرىپ:

— وجاۋ اسقا جارىماسا، ىشكەن-جەگەنىن بويىنا سىڭىرە الماي جۇرگەن ءوزى داعى، ايتپەسە اۋزى استان كەتپەيدى، — دەپ كەبەجەدەن ءبىر ءتىلىم الىپ، قازانعا تاستايدى.

ەت قايناپ، پىسە كەلگەندە، قوجا تاعى دا سورپانىڭ ءدامىن تاتىپ:

— ازداعان ۇن مەن پياز بولسا، كەسپەنىڭ تورەسى بولعالى تۇر ەكەن، — دەيدى. باي قوجانىڭ تاعى ءبىر شەنەۋىنە ۇشىرارمىن دەپ ويلاپ، بۇل ايتقانىن دا اكەپ بەرەدى. ال قوجا بولسا، ءوزى ىستەگەن كەسپەگە تويىپ الىپ:

— بايەكە، مىناۋ وجاۋ سەنىڭ قازان-وشاعىڭا نۇقسان كەلتىرەتىن، اتاق-ابىرويىڭدى اياققا باستىراتىن دۇنيە ەكەن، مۇ- نىڭ ورنى كۇل باسى بولۋ كەرەك، — دەپ وجاۋدى ەكى بۇكتەپ، وتقا لاقتىرىپ جىبەرىپ، ۇيدەن شىعىپ جۇرە بەرىپتى.

---