InfoHub Logo

حالقىمىزدىڭ سالتى بويىنشا، ەڭ اۋىر قىلمىس، كەشىرىمسىز كۇنا — قوس باسۋ. سالت بۇزۋ جامان ىرىمعا سانالسا دا، قوس باسىپ، جىلقى بارىمتالاۋ كەزدەسىپ تۇرعان. بىردە كورشىلەس حالىقتىڭ ءبىر توپ سۋىق قول سۇعاناقتارى ەل توناپ، قوس باسۋ ەمەس، قىز باسۋ، ولجا سالۋعا دەيىن بارىپ، ەكى ەلدىڭ اراسىن شيەلەنىستىرگەن قىرعىن بولىپتى. شىرىق بۇزىپ، ىرىق كەتىرگەن توڭ مويىنداردىڭ قىلىعى ەكى ەلدىڭ دە شىدامىن توزدىرىپ، ءتوزىمىن تاۋىسىپتى. شىداي الماعان ەكى جاقتىڭ كورەگەندەرى باس بىرىكتىرىپ، كۇناھارلاردى جازاعا تارتۋعا بەكىنەدى. تورەلىكتىڭ ءبىر جاق تىزگىنىن — تۋما بي، ەكىنشىسىن سونا بي ۇستاپتى.

تورەلىكتىڭ تورىنە، توپتىڭ الدىنا قۇنىكەرلەر مەن كۇناھارلاردى شىعارادى. «شىراقتارىم كىم ەدى، كوزىن تىگىپ، ارىڭا تيگەن، نامىسىڭدى جەر ەتكەن، جۇرەككە جارا سالىپ، اق ءجۇزىڭدى قورلاعان. تاپ باسىپ تانى دا، ءدال كوزدەپ كوزىنەن ات كىرىپتاردىڭ. جەبەڭ ءتيىپ كوزى شىقسا، قولى سىنىپ، باسى جارىلسا، جۇرەكتەن ءوتىپ، دەمى بىتسە — ارىڭنىڭ ساداعاسى. جازا باسىپ ءمۇلت كەتسەڭ — جانىڭنىڭ ساداعاسى. كۇرمەلگەن ءجىپ، كۇيىنگەن جۇرەك جاراسىنىڭ شەشىمى، تورەلىگى سول بولار، شىراقتارىم، ساداعىڭ بەرەر جازاسىن...» — دەپ، سونا تورەلىكتىڭ تورىندە تۇرعان ون ەكى قىزعا قورامساقتى ۇسىنا بەرگەن كەزدە، كەك كەرنەگەن ىزالى قىز گۇلسانا سۋىرىلىپ العا شىعادى. بولعان جاعدايدى شۇبىرتىپ ايتا كەلىپ، اشۋ قىسىپ بۋلىققان ول ساداعىن شىرەنە تارتىپ، ۇزىن سويىل ۇر دا جىق قارا دويىردى مۇرتتاي ۇشىرىپ ءتۇسىرىپتى. كۇي اتاسى اتانعان باجەڭ وسى وقيعانىڭ جەلىسىن، ونىڭ كۇيىنىش-سۇيىنىشىن، تورەلىگىن «قوسباسقان» دەپ ات قويىپ، دومبىرانىڭ كومەيىنەن وسىلايشا كۇي سويلەتىپتى.

 

---