ق ر پرەزيدەنتى ق.ك.توقايەۆ ۇسىنعان رەفورمالار تىزبەگى قازاقستاننىڭ جاڭا داۋىرگە قادام باسۋىن كورسەتەدى
بۇگىن 16 ناۋرىز 2022 جىلى ەلدە جىل باسىندا ورىن العان قايعىلى قاڭتار وقيعاسىنان كەيىن قازاقستان جۇرتشىلىعى اسىعا كۇتكەن جاڭاشا رەفورمالار كەشەنىنەن تۇراتىن ق ر پرەزيدەنتى قاسىم-جومارت توقايەۆ ءوزىنىڭ قازاقستان حالقىنا جولداۋىن ارنادى. جاڭا قازاقستاندى قۇرۋدا پرەزيدەنتىمىز ساياسي جۇيەنى جاڭعىرتۋعا باعىتتالعان ون نەگىزگى رەفورمالار تىزبەگىن ۇسىندى. جالپى اتالعان رەفورمالاردىڭ باسىم باعىت-باعدارى نەگىزىنەن قازاقستاننىڭ 30 جىلدىق تاۋەلسىزدىك تاريحىندا اۆتوريتارلىق باسقارۋ جۇيەسىنە نەگىزدەلىپ جانە حالىق ساناسىنا نىقتاپ ورنىققان «سۋپەرپرەزيدەنتتىك» باسقارۋ فورماسىن وزگەرتۋ، وركەنيەتتى ەلدەردە تاجىريبەدە تابىستى ىسكە اسىرىلىپ وتىرعان بيلىكتىڭ تارماقتارىن كۇشەيتۋ، جەرگىلىكتى باسقارۋ ورگاندارىندا بيلىك وكىلەتتىلىگىن ارتتىرۋ مەن ولارعا ەركىندىك بەرۋ بولىپ تابىلادى. ءبىر ادامنىڭ قولىنا شوعىرلانعان ءابسوليۋتتى بيلىكتىڭ تۇبىندە تىعىرىققا تىرەلەتىنى بەلگىلى. سەبەبى بيلىك جۇيەسىنىڭ باسقا سالالارى ەركىن شەشىم قابىلداۋدا باتىلى جەتپەۋى جانە ءوز ەركىمەن ناقتى ىس-ارەكەتتەرگە بارا الماۋى دامۋدى كەشەۋىلدەتەتىنى انىق.
بۇل وزگەرىستەر ءوز كەزەگىندە جاڭا قازاقستاندىق قوعامنىڭ تالابىنان تۋىنداعان قاجەتتىلىكتەر بولىپ تابىلادى. سوڭعى جىلدارى قازاقستان تۇرعىندارىنىڭ ساياسي بەلسەندىلىگىنىڭ ارتۋى، ازاماتتىق قوعام ينستيتۋتتارىنىڭ جاندانۋى ەلدە دەموكراتيالىق ۇردىستەردى شىنايى تۇردە ىسكە اسىرۋدى قالايدى. جولداۋدا كوتەرىلگەن تاعى ءبىر ماڭىزدى ماسەلە پرەزيدەنت ق.ك. توقايەۆ: «ءبىز مەملەكەت پەن قوعام اراسىنداعى ءوزارا قۇرمەت پەن سەنىمگە نەگىزدەلگەن جاڭا ساياسي مادەنيەتتى قالىپتاستىرامىز» – دەپ اتاپ ايتتى. بۇل دا ءوز كەزەگىندە جوعارىدا ايتىلعان ازاماتتاردىڭ بويىنا جاڭا دەموكراتيالىق قۇندىلىقتار مەن باعىت-باعدارلاردى بارىنشا ءسىڭىرۋ مەن جاڭاشا كوزقاراستى قالىپتاستىرۋ قاجەتتىلىگىن تاعى ءبىر دالەلدەي تۇسەدى. وسى ورايدا قازاقستاندىق جاستاردىڭ جاڭاشا ساياسي مادەنيەتىن قالىپتاستىرۋ قوعام الدىنداعى باستى مىندەت. قورىتا كەلە بيىلعى جولداۋدىڭ باعىتى قازاقستاننىڭ جاڭا داۋىرگە اياق باسۋىن، دەموكراتيالىق جانە مودەرنيزاسيالىق دامۋ جولىنا ءتۇسۋىن كورسەتەدى.
ايتىمبەتوۆ نۇركەن ىسقاق ۇلى
You Might Also Like
-
الداعى اپتادا وقۋشىلارىمىزدىڭ كوكتەمگى كانيكۋلى باستالادى، دەپ حابارلايدى قازاقپارات ق ر ءبىلىم جانە عىلىم ءمينيسترى اسحات ايماعامبەتوۆتىڭ Telegram كانالىنا سىلتەمە جاساپ.
-
قازاقستان وسى ۋاقىت ارالىعىندا كوپتەگەن كۇردەلى وزگەرىستەر مەن سىندارلى شاقتاردى باستان كەشىرىپ كەلدى. ءوز باسىنا وتاۋ تىگىپ، ىرگەلى مەملەكەت بولۋ جولىندا ساياسي، ەكونوميكالىق، الەۋمەتتىك، رۋحان...
