قۋاتبەك پەن مەدەتبەك
قالماق اسكەرىمەن بولعان ءبىر جولعى سوعىستا ايلاسىن اسىرعان جاۋ جاعى قۋاتبەك پەن مەدەتبەك باتىرلاردى قولعا ءتۇسىرىپ، ەلدەرىنە الىپ كەتەدى.
قالماق حانى بۇل ەكەۋىن باسقا تۇتقىنداردان بولەك ۇستاتقىزىپ، ەرەكشە كۇزەت قويادى. بۇل ەكى جاس باتىردىڭ قازاق ەكەنىن بىلگەن جانە ولاردى كورگەن حاننىڭ قازاق ايەلىنەن تۋعان ايپەرى دەگەن قىزى قۋاتبەك باتىرعا عاشىق بولىپ قالادى. ەندىگى ويى وسى باتىرلاردى تۇتقىننان بوساتىپ، ەلىنە جەتكىزىپ، قۋاتبەك باتىرعا جار بولۋدى اڭسايدى. باتىرلارعا وڭاشا كەزدەسىپ، ويىن ولارعا اشىق ايتىپ، قاشىپ كەتۋ تۋرالى كەلىسەدى. ءسويتىپ، استىرتىن ءۇش تۇلپاردى دايىنداپ، ەكى باتىرمەن بىرگە ءوزى دە قاشۋدى ۇيىمداستىرادى.
كەلىسىلگەن ۋاقىتتا حاننىڭ قىزى ەكى تۇلپاردى جەتەلەپ كەلىپ، ەكى باتىردى مىنگىزىپ، جاۋ تۇتقىنىنان قاشىپ شىعادى. «ەندى قاۋىپ-قاتەردەن، قۋعىننان قۇتىلدىق-اۋ!» — دەپ، ىلە بويىنداعى قالىڭ توعايعا كىرىپ دەم الادى. سودان كەيىن ىلە وزەنىنىڭ سۋىنا جۋىنىپ-شايىنىپ الۋدى ۇيعارادى. اعايىندى ەكى جىگىت وزەننىڭ جوعارعى جاعىنداعى سۋعا تۇسەدى، ال ايپەرى قىز وزەننىڭ تومەنگى اياعىنا بارىپ جۋىنۋعا كەتەدى.
ەكى باتىر جۋىنىپ بولىپ، اتتاردى جەتەلەپ، ايپەرى سۋعا تۇسكەن جەرگە كەلگەندە، ونىڭ جولبارىس جارىپ كەتكەن ءولى دەنەسىنە تاپ بولادى. ونى كورگەن قۋاتبەك پەن مەدەتبەك قاتتى قايعىرىپ، قىزدىڭ دەنەسىن اق جۋىپ، ارۋلاپ وزەننىڭ جاعاسىنا جەرلەيدى. «جاتقان جەرىڭ جايلى بولسىن، اللا الدىڭنان جارىلقاسىن!» — دەپ قوس باتىر اتتارىنا ءمىنىپ، ەلگە قاراي بەت بۇرادى. قولدا قارۋ، قورجىندا اس جوق، ابدەن جۇدەگەن قۋاتبەك پەن مەدەتبەك جيىرما تاۋلىكتەي جول ءجۇرىپ، ەلگە جەتەدى. وسى كۇندەرى ەكەۋى كەزدىكتەرىمەن استارىنا ءمىنىپ كەلە جاتقان اتتارىنىڭ قۇلاعىن تاۋلىگىنە ەكى رەتتەن كەرتىپ، قانىن سورىپ قورەك ەتكەن ەكەن. اۋىلعا جەتكەندە اتتارىنىڭ قۇلاقتارى شۇناق بولعان ەكەن...
وقۋعا كەڭەس بەرەمىز:
You Might Also Like
-
ابىلايدىڭ ءبىر جاقسى كورەتىن بالاسى ءولىپ، باس كوتەرمەي جاتىپ قالعاندا، كوڭىل ايتۋعا كەلگەن بەلگىلى ادامدارمەن ەرىپ حان ورداسىنا كىرگەن جاۋعاش ورىندى جۇباتۋ ءسوز تاۋىپ ايتىپ، العىرلىعىمەن ەل اعالارىنى...
-
قازاق-قالماق سوعىسى زامانىندا جەتىسۋ جەرىندە قالماقتار بىرەر جىل تابان تىرەپ تۇرىپ قالادى. سول كەزدەردە ولار سۋىقتوبەنىڭ كۇنگەيىن قىستاپ، تەرىسكەيىنە ەگىن سالىپ، تاۋدىڭ بوكتەرىن، باسىن جايلاعان. وس...
