InfoHub Logo

گازەت ءاربىر ماقالاسىمەن حالىقتىڭ قۇقىقتىق ساناسىن ارتتىرىپ، زاڭدى بىلۋىنە اتسالىستى، تاۋەلسىزدىكتىڭ العاشقى كەزەڭدەرىندە ەلىمىزدە بولىپ جاتقان ساياسي وقيعالارعا، قۇقىق سالاسىنداعى وزگەرىستەرگە ايرىقشا ءۇن قوستى. گازەتتە ق ر پرەزيدەنتىنىڭ جارلىقتارى مەن وكىمدەرى، حالىققا جولداۋلارى، ق ر پارلامەنتى قابىلداعان زاڭدار، ۇكىمەت قاۋلىلارى جاريالانادى. كولەمى 4 باسپا تاباق. تارالىمى 17000 دانا(سول كەزدەگى). بۇگىندە جالپى تارالىم - 40640. يراك ەلەكەيەۆ «زاڭ گازەتىن اشۋ ارمانىمىز ەدى» اتتى ماقالاسىندا: «سوندا عوي «قۇقىق» دەگەن ءسوزدىڭ العاش قولدانىسقا ەنگەنى. ءوزىمىزدىڭ بۇرىن زاڭ جاساۋ تاجىريبەمىز بولماعاندىقتان زاڭ تەرميندەرىن قازاقى قالىپقا ءتۇسىرۋ وڭاي بولعان جوق. پىكىر قايشىلىعى، كوزقاراستاردىڭ سايكەسپەۋى ءجيى ورىن الاتىن. سولاردىڭ ءبىر پاراسى وسى «قۇقىق» ءسوزى توڭىرەگىندە ءورشىدى. «بۇل قايدان شىققان ءسوز؟ قۇقىق دەپ تۇتىعۋدىڭ قاجەتى قانشا؟» دەگەن سوزدەر ايتىلدى. الايدا، وسى ءسوزدىڭ قولدانىسقا ەنۋىنە قارسى بولعان نەبىر مىقتى ءتىل سالاسىنىڭ مامانى مەن عالىمى «پراۆو» دەگەن ورىس ءسوزىنىڭ «قۇقىقتان» ارتىق بالاماسىن تابا المادى. اقىرى، وسى ءسوز زاڭنىڭ ءتول تەرمينى سەكىلدى قولدانىسقا ەنىپ كەتتى». پارلامەنت ماجىلىسىندە تالقىلانىپ جاتقان ءاربىر زاڭدى گازەت بەتىندە ساراپقا سالىپ،  تاۋەلسىزدىكتىڭ العاشقى جىلدارى زاڭ تەرميندەرىنىڭ قالىپتاسۋىنا ىقپال ەتكەن باسىلىم جىل وتكەن سايىن قاناتىن كەڭ جايىپ كەلەدى. ۋاقىت وتە «زاڭ» جانە «فەميدا» جۋرنالدارىمەن قاتارى تولىققان كورپوراسيا ۋاقىت كوشىنەن قالماي، Zanmedia.kz سايتىن دا ومىرگە اكەلدى. ادىلدىك ىزدەگەن تالاي جاننىڭ ارىز-شاعىمدارىن ءتيىستى ورىندارعا جەتكىزىپ، زاڭدى شەشىمىن تابۋىنا ىقپال ەتىپ كەلە جاتىر.

گازەتتىڭ العاشقى رەداكتورى مارات توقاشبايەۆ: «بۇگىندە ەلىمىزدىڭ بۇقارالىق اقپارات كەڭىستىگىندە ءوز ورنى بار وسىناۋ باسىلىمدى قۇرۋعا، العاشقى نومىرىنەن باستاپ گازەتتى ءۇش جىل باسقارۋ باقىتى ماعان ءناسىپ بولىپتى. بۇل باسىلىمنىڭ دۇنيەگە كەلۋىنە مۇرىندىق بولعان، قيىن ساتتەردىڭ بارىندە قول ۇشىن بەرىپ وتىرعان ەلىمىزدەگى قۇقىقتىق رەفورمالاردىڭ اتاسى، تاۋەلسىز قازاقستاننىڭ تۇڭعىش ادىلەت ءمينيسترى، كورنەكتى زاڭگەر، مارقۇم ناعاشىباي شايكەنوۆ ەدى. دەموكراتيانىڭ اتاسى سانالاتىن توماس دجەففەرسون «تابيعات زاڭدارىنا قايشى زاڭدار قابىلداۋ – ارتىنان ءوزىمىز ولاردى جازالايتىنداي قىلمىستار تۋعىزۋ» دەگەن ەكەن. گازەت ءوز قىزمەتىندە مەملەكەتتى تەك حالىققا پايدالى زاڭدار قابىلداۋگا شاقىردى. ءار ازاماتتى ءوز قۇقىعىن بىلۋگە ۇندەدى. قۇقىقتىق تۇرعىدان شولىركەگەن وقىرمانعا قۇقىقتىق كاۋسارلاردان ءدام تاتۋعا مۇمكىندىك بەردى» دەيدى.

گازەتتىڭ مىناداي ايدارلارى بار: «بۇگىن»، «قۇقىق»، «الەۋمەت»، «قازىنا»، «ادۆوكات»، «بيىك مىنبەر»، «دەموگرافيا»، «القا»، «اشىق اڭگىمە»، «وقىرمان حاتتارى»، «زاڭ ءتاپسىر»، «بەزبەن»، «قوعام»، «ءتورتىنشى بيلىك»، «ايماق»، «شارتاراپ»، «ىزكەسەر»، «رۋحانيات»، «سوڭعى بەت»، «سپورت»، «ەكسكليۋزيۆ»، «ءنورماتيۆتى قۇقىقتىق اكتىلەر». ەلىمىزدىڭ ساياسي، الەۋمەتتىك، ەكونوميكالىق، مادەني، ەڭ باستىسى – قۇقىقتىق ومىرىندەگى تاقىرىپتاردى ارقاۋ ەتكەن ماقالالار “زاڭ گازەتى” باسىلىمىنىڭ تۇراقتى وقىرماندارىن قالىپتاستىرىپ، قازاقستاندىق جۋرناليستيكا سالاسىندا ءوز ورنىن ايشىقتاپ بەردى.

---