InfoHub Logo

قۇلاقتا قۇلاققاپ، دالادا جاۋىن. جالعىز كەلە جاتقان مەن ءتۇرلى قيال ويعا ءشولىم قانىپ كەلەدى. زاڭعار جازۋشى مۇحتار اۋەزوۆ ايتپاقشى: «وي دا كوپ ۋايىم دا كوپ - ويلاي بەرسەڭ، وي دا جوق ۋايىم دا جوق - ويناي بەرسەڭ». ميدا سان ءتۇرلى وي.

جاقىندا عانا عالامتوردان مىنا قىزىق اقپاراتتى وقىپ قالدىم: «Windows-تا «Con» اتاۋىمەن بۋما (پاپكا) اشۋ مۇمكىن ەمەس، بيلل گەيتستى بالا كەزدەن وسىلاي مازاقتاعان ەكەن». بىلاي قاراپ تۇرساڭ كۇلكىڭ كەلەدى، دەگەنمەن، مۇنى تەكسەرىپ كورگەن مەن اۋىزىمدى اشقان كۇيى نە كۇلەرىمدى، نە قايعىراتىنىمدى بىلمەي تۇرىپ قالدىم. مۇمكىن، بارلىعىمىز بالا كۇنگى وسىنداي جاراقاتتى ەمدەيتىن زاتتاردى ويلاپ تاپساق شىنىمەن جەڭىلدەيمىز بە، الدە جاي جارانىڭ بەتىن جىلى جاۋىپ قويامىز با؟ كوكەيدەن ءقازىر كەتپەيتىنى انىق قوي، نەگە كوپشىلىكتىڭ ءسوزى ءبىزدى الاڭداتادى؟  نەگە ءاربىرى ءوز جونىمەن جۇرمەيدى. بىزگە بەرىلگەن ءبىر جىلداعى 31 557 600 سەكۋندىمىزدى ەلدىڭ ويىمەن وتكىزسەك نە بولادى؟  ءارى قاراي وسى سوزدەرگە ميىمدا جاۋاپ ىزدەي باستادىم...

قازىرگى تاڭدا ەرەسەكتەرمەن جارىسا جاسوسپىرىمدەر دە ەسىرتكىگە قۇمار ەكەنى بارىنە انىق. تەمەكىنىڭ قۇرامىنداعى شايىرلى (سمولا) زاتقا جاسالعان تاجىريبەنىڭ ناتيجەسىندە تىشقاننىڭ ارقاسىنا جاعىلعان جەردەن قاتەرلى ىسىك پايدا بولعان. عالامتوردان مىنا اقپارتتى وقىسا مۇمكىن جەر بەتىندە تۇتىنگە قۇمارلاردىڭ سانى از بولار ما ەدى؟ مۇمكىن، بارلىعى مەن سياقتى ويلاي بەرمەيتىن شىعار. دەسە دە، ءسىرا، مەنىڭ پىكىرىم وزىمدە قالسىن.

«دەنەمىزدەگى ەڭ كۇشتى بۇلشىق ەت – ءتىل». قىزىق اقپاراتتاردىڭ اراسىنان وسىنى كورە سالا جىميدىم دا، راس ەكەنىنە مويىنسۇندىم. 10 بالەنىڭ 9-ى تىلدەن ەكەنى انىق. كەيبىرى قالجىڭدايمىن دەپ اسىرەلەپ جىبەرەدى. جانىڭا باتاتىن وتكەنىڭمەن بايلانىستى جارانىڭ بەتىنە تۇز سەبەدى. ءتىلدىڭ كۇشتىلىگى سونشا جاندى جارالاپ الاتىن قاسيەتى دە بار. ءتىلدى اللا بەرىپتى دەپ ارتىق سويلەي بەرمەگەن ءجون.

مىنە، سان ءتۇرلى ويمەن كەلە جاتقان مەن جاتاقحانانىڭ الدىنا جەتىپ الىپپىن.  ءبىر تەرەڭ دەمالىپ الدىم دا، قيال الەمىمنەن تىسقارى شىعىپ، بولمەمە اياق باستىم.

---