ءسابىز
ءسابىز ساباعىنىڭ بيىكتىگى 1 مەترگە دەيىن جەتەتىن، ەكى جىلدىق، ءشوپ تەكتەس وسىمدىك. ءبىرىنشى جىلى جۋان، ەتتى تامىرىنان بىرنەشە جاپىراقتار شىعادى. ەكىنشى جىلى ساباعى ءوسىپ گۇلدەپ، جەمىس بەرەدى. ساباعى تىك، جايىلا وسكەن، قىرلى، ءون بويىن قولعا قاتقىلداۋ تيەتىن تۇك باسقان. جاپىراقتارى سوپاقشا، قاۋىرسىن ءتارىزدى تىلىمدەلگەن، ساعاقتارى ۇزىن، كەزەكتەسىپ ورنالاسقان، گۇلدەرى اق، مايدا شوعىر بولىپ تۇرادى. ءسابىز كوپشىلىككە بەلگىلى مادەني وسىمدىك. دارىلىك ماقسات ءۇشىن ءسابىزدىڭ ءتۇبىر تۇينەگى مەن تۇقىمى پايدالانىلادى.
قۇرامىندا ۆ توبىنداعى ۆيتاميندەر، ا ءۆيتامينى، كراحمال، قانت، كاروتين بار. حالىق ءسابىزدى نەسەپ جۇرگىزەدى، قۋىقتاعى تاس پەن قۇمدى ەرىتەدى دەپ ەسەپتەيدى. ءسابىزدىڭ تۇقىمىنان جاسالعان تۇنبانى اس قورىتۋ جۇمىسى بۇزىلعاندا، ءىش جەلدەنگەندە، بۇيرەككە تاس بايلانعاندا قولدانادى.
حالىق مەديسيناسىندا ءسابىزدىڭ ءتۇبىر ءتۇيىنىن كۇيىكتى، ۇسىگەندى جانە ءىرىڭدى جارالاردى ەمدەۋ ءۇشىن پايدالانادى. راك اۋرۋى كەزىندە ءسابىزدىڭ ءسولىن ىشەدى. عىلىمي مەديسينادا ءسابىزدىڭ تۇقىمىنان الىنعان داۋكارين دەگەن ءدارى قولدانىلادى. بۇل ءدارى جۇرەكتىڭ قان تامىرلارىن كەڭەيتىپ، ونداعى قان اينالىسىن جاقسارتادى. ءسابىزدىڭ ءسولىن قان ازايعاندا، ناۋقاس ادامنىڭ كۇش-قۋاتى كەمىگەندە جانە جۇقپالى اۋرۋلاردان كەيىن السىرەگەن ورگانيزمدى الدەندىرۋ ءۇشىن قولدانادى. ءتىس ءتۇبىنىڭ ەتتەرى جانە تاماق بەزدەرى قابىنعاندا، اۋىز ۋىلعاندا دا ءسابىزدىڭ ءسولىن پايدالانادى.
ءدارىنى دايىنداۋ جانە قولدانۋ ءتاسىلى
ءسابىز تۇقىمىنىڭ 1 اس قاسىعىن 1 ستاكان قايناعان سۋعا سالىپ، تۇنگە قاراي جىلى پەشتىڭ ىشىنە قويادى. وسىلايشا بىرنەشە ستاكان ءدارى دايار بولعاننان كەيىن ونىڭ 3 ستاكانىن ءبىر كۇن ىشىندە ىستىق كۇيىندە ىشەدى. بۇل اسىرەسە، بۇيرەككە تاس بايلانعاندا وتە جاقسى ناتيجە بەرەدى.
وقۋعا كەڭەس بەرەمىز:
You Might Also Like
-
تايتۇياق (كوپىتەن ەۆروپەيسكيي، Asarum europaeum) — ۇزىن، جىڭىشكە، كولبەۋ وسكەن تامىرى بار، كوپ جىلدىق، ءشوپ تەكتەس وسىمدىك. جاپىراقتارىنىڭ شەتتەرى ءبۇتىن، اتتىڭ ىزىنە ۇقساس، ساعاقتارى ۇزىن، تۇك...
-
سارىمساق — بيىكتىگى 1 مەترگە دەيىن جەتەتىن، ەكى جىلدىق، ءشوپ تەكتەس وسىمدىك. جەر استىنداعى ءتۇبىر ءتۇيىنى اق نەمەسە سۇر ءتۇستى بىرنەشە مايدا بولىكتەردەن تۇرادى. ساباعى جۇمىر، ۇزىنشا كەلگەن، ءجىڭىش...
