InfoHub Logo

كارىم دەگەن مەشەر ءوزى جۇمىسقا ءتاۋىر جىگىت تە بولسا، جۋىنىپ، كىرسىز كويلەك كيىپ، تازا جۇرۋمەن ءىسى جوق ەدى. اركىم ايتۋشى ەدى:

— ساعان نە بولدى، كارىم، بويىڭنان كىرىڭدى اعىزىپ جۇرگەنشە، جۋىنساڭ بولماي ما؟ — دەپ.

— قولىم تيمەيدى، — دەۋشى ەدى ول.

ءسويتىپ ءجۇرىپ، تۇلابويىن شيقان قاپتاپ جانە قوتىر بولدى. بۇل كۇيدە قۇرىسىپ-تىرىسىپ جاتقانىندا، اركىم سۇرايدى:

— كارىم، ساعان نە بولدى؟ — دەپ.

كارىم ايتادى ەكەن:

— كۇنام ءۇشىن قۇدايدىڭ ءبىر بەرگەن سازايى-داعى، — دەپ.

وعان قارسى تانىستارى:

— راس، كارىم، قۇداي-تاعالا تازا جۇرمەگەن بىلعانىش كىسىنى سۇيمەيدى، تىم بولماسا جۇماسىنا ءبىر مونشاعا ءتۇسىپ، نە بولماسا ۇيىندە سابىنمەن جۋىنۋدى ادەت ەتسەڭ، بۇ بالەگە دۋشار بولماس ەدىڭ.

سونىمەن، كارىمدى اۋرۋ جاتاتىن ۇيگە الىپ بارىپ، تازا جۋىندىرىپ، تازا كيىم كيىندىرىپ، ەم قىلعان سوڭ از با، كوپ پە جاتىپ جازىلدى. مۇنان سوڭ، كارىم ءبىر زاۋىتقا بارىپ جالدانىپتى. وزدەرىڭە دە بەلگىلى شىعار، زاۋىتتا نارسە بويايتىن بوياۋلاردىڭ ءبارى دە ۋ بولادى. ءبىر كۇنى قوجاسى كارىمگە ءبىر بوياۋدى بىلعاپ قوي دەپ بەرىپتى. بىلعاپ وتىرىپ-وتىرىپ، كادىمگى ۇيرەنگەن قالىبىنشا، قولىن جۋماستان بارىپ، تاماققا وتىرىپ نان جەپتى. قولىنداعى بوياۋدىڭ جۇعىنىنىڭ ءبارى دە جەپ وتىرعان نانىنا جابىسىپ وتىرعاندا، ءبىر مەزگىلدە كارىمنىڭ ءىشى ءبۇرىسىپ، اۋىرا باستاپتى. ارلى-بەرى، ولاي-بۇلاي اۋناقشىپ، ءبىراز جاتىپ، كارىم ۇزاماي-اق جان تاپسىرىپتى. الگى بوياۋ ۋ بوياۋ ەكەن.

---