InfoHub Logo

ءبىر جىلى ابايدىڭ ۇيىندە كوپ كىسى تۇستەنىپ وتىرسا، كوتباق قارا قازىبەك دەيتىن ءبىر وسەكشى، قىدىرماشى كىسى ەسىكتەن كىرە سالەم بەرىپ:

— ە، قۇداي ايداپ، بۇيىرعان تاعامعا كەز كەلە قالعانىمدى قاراشى، — دەپ قولىن ەش جۋماستان تاباققا قاراي ەنتەلەپ كەلە جاتقاندا اباي ءزىلدى ۇنمەن:

— قايدا باراسىڭ وڭمەڭدەپ، وتىر سول جەرگە، — دەپتى.

قازىبەك نە دەرىن بىلمەي سىلق ەتىپ وتىرا كەتىپتى. اباي قازىبەكتى قايىرىپ تاستاعان سوڭ ءبىر ءسوز ايتپاستان ارى قاراي قوناقتارىمەن ەتىن جەي بەرىپتى.

ەت ارتىنان شاي ىشىلەدى. قازىبەكتى ءتىپتى شايعا دا شاقىرماپتى. تاماق ءىشىپ بولىسىمەن جۇرتتىڭ ءبارى شىعىپ بارا جاتقاندا قازىبەك تە كەتە بەرمەك بولىپ تۇرەگەلگەندە، اباي «وتىر» دەپ يشارا جاساپتى. قازىبەك قايىرا وتىرىپتى. سوندا اباي:

— سەن ءوزىڭ وسەك جينايسىڭ، بىرەۋدىڭ داۋىن ساتىپ الىپ، ايتىسقا تۇسەسىڭ. وسىنىڭ ءبارى ءبىر قۇدايدىڭ بۇيرىعى ما؟ — دەپ سۇراپتى.

قازىبەك ەشتەڭە دەپ ۇندەي الماپتى.

— ال سەن جاڭا عانا «قۇداي ايداپ، بۇيىرعان تاعامعا تاپ كەلدىم-اۋ» دەپ ەدىڭ. بۇيىردى ما سول تاعام، جوق پا؟ — دەپتى. قازىبەك: «بۇيىرمادى»، — دەپتى. اباي:

— ول سولاي. سەن اس ءۇشىن ارىڭدى ساتىپ، بۇيىرماعان استان ىشەمىن دەدىڭ. ونى بۇيىرىپ تۇر دەدىڭ. كانە، بۇيىرعانى. ونان دا «قاڭعىرىپ ءجۇرىپ اس ۇستىنە كەز بولدىم-اۋ» دەپ نەگە ايتپادىڭ؟ جەيتىن تاماعىڭدى شىنىڭدى ايتىپ جەسەڭ نەڭ كەتەدى، — دەپ ۇرىسىپتى.

سوندا قازىبەك ءبىراز ءۇنسىز وتىرىپ: «اباي، قازاقتىڭ ءبىر ىرىم سالتى بار عوي. ۇلكەنىن سىيلاۋشى ەدى، تىم بولماعاندا ساقالىمدى سىيلاساڭ ەتتى»، — دەپتى.

سوندا اباي: «ساقالىن ساتقان كارىدەن، ەڭبەگىن ساتقان بالا ارتىق. سەنىڭ ۇلكەندىگىڭ مەن ساقالىڭنىڭ ءقادىرلى ەكەندىگى راس. ءبىراق سونىڭ ءقادىرىن ءوزىڭ كەتىرىپ ءجۇرسىڭ عوي. ءوزىڭ سىيلاماعان ساقالدى جۇرت نە قىلسىن»؟ — دەپ جاۋاپ قاتقان ەكەن.

---