ساقتىقتا قورلىق جوق
بىردە كوگەرشىن شولدەپ، سۋ ىشپەككە جەرگە تۇسكەندە، اڭدىپ تۇرعان مىسىق كەپتەردى ۇستاپ الادى.
— سەنى مە، پالەم. ءقازىر مەن سەنى جەيمىن.
— جەمەشى مەنى. سەن ودان دا تىشقاندى نەگە اۋلامايسىڭ؟
— ماعان اقىل ۇيرەتپە. كىمدى جەيتىنىمدى ءوزىم بىلەمىن.
جانى القىمىنا كەلگەن كوگەرشىن قۇدايدان كومەك سۇراي باس-تايدى. ءبىر كەزدە قايدان ەكەنى بەلگىسىز ەگەۋقۇيرىق شىعا كەلەدى.
— ءاي، مىسىق، كوگەرشىنگە تيىسپە. الدىمەن مەنىمەن الىسىپ كور. ەگەر جەڭسەڭ، مەنى جەيسىڭ. جارالى كوگەرشىن قايدا كەتەر دەيسىڭ. ونى دا قوسا ازىق ەتەرسىڭ.
مىسىق جالت ەتىپ بۇرىلىپ قاراسا، الىپ دەنەلى ەگەۋقۇيرىق تۇر ەكەن الدىندا. ەگەۋقۇيرىققا ءالى جەتپەيتىنىن ىشتەي سەزگەن مىسىق كوگەرشىندى تاستاي سالا قاشا جونەلەدى.
— راقمەت ساعان. سەن مەنىڭ ءومىرىمدى قۇتقاردىڭ.
— وقاسى جوق، دوستىم. الايدا مەن سەنى جەگەلى تۇرمىن.
— قالايشا؟
— سولاي، دوستىم. مەنەن ءبارى قورقادى. كەرەك دەسەڭ، ەڭ كۇشتى دەگەن ادامدى دا جەيمىن. سەن مەنىڭ ازىعىما اينالدىڭ.
— مىسىقتان دا ءقاۋىپتى بولعانىڭ با؟
— مەن مىسىقپەن توبەلەسىپ، ونىڭ سازايىن بەرەيىن دەگەنمىن. مىسىقتى دا، سەنى دە جەگەندى ءجون ساناعانمىن، — دەپ ەگەۋقۇيرىق جارالى كەپتەرگە ءتونىپ كەلە جاتادى.
وسى ساتتە ءبىر يت پايدا بولىپ، ەگەۋقۇيرىققا شاپ بەرەدى. ەگەۋقۇيرىق جارالانىپ، قاشا جونەلەدى.
— راقمەت ساعان، — دەيدى كەپتەر تاعى دا. — مەنى جەگەلى تۇرعان جوقسىڭ با؟
— جوعا. مەن جىرتقىش ەمەسپىن. ادامنىڭ دوسى مەن بولامىن. قازاقى تازى تۇقىمىنانمىن. ەسىمىم — جولاياق.
— ال مەنى جاي عانا داري دەسەڭ بولادى.
— جاقسى. ەندى ۇشپايسىڭ با؟
— جارالىمىن.
بۇل ۋاقىتتا «جولاياق، جولاياق» دەپ ءيتتىڭ يەسى دە كەلە قالادى. جارالى كوگەرشىندى كورگەن ادام كەپتەردى قولىنا ۇستاي كەتەدى. سويتسە بۇل ادام زوولوگ ەكەن. ۇيىنە كەلە سالا كوگەرشىندى ەمدەيدى. كوپ ۇزاماي كوگەرشىن جازىلىپ ۇشا جونەلەدى.
وسىلايشا كوگەرشىن ادام بالاسىنىڭ بەرگەن نان قيقىمىنا قورىقپاستان جەرگە تۇسەتىن بولىپتى. ادام مەن ءيتتى دوسىنداي كورەتىنى وسىدان قالسا كەرەك. الايدا جەرگە قونار الدىندا مىسىق نەمەسە ەگەۋقۇيرىق جوق پا ەكەن دەپ جان-جاعىنا شولىپ قارايدى ەكەن. «ساقتىقتا قورلىق جوق» دەگەن ءسوزدى ەستەن شىعارماي جۇرگەن كوگەرشىن ءاردايىم ويلانىپ ۇشاتىن كورىنەدى. ال ادامعا قالاي جاقسىلىقپەن قايتارارىن بىلمەگەن كوگەرشىن ۇنەمى العىس ايتۋمەن كەلەدى. سونىڭ اسەرىنەن بولار، كەپتەر جۇرگەن جەردە تىنىشتىق ورنايدى ەكەن. ادامدار بولسا كوگەرشىندى بەيبىتشىلىك قۇسى دەپ سانايدى.
You Might Also Like
-
افريكا قۇرلىعىنىڭ باتىس بولىگىندە ورنالاسقان تانگانيكا وزەنىنە قاراي ءبىر توپ ارىستان اقىرىپ كەلە جاتادى. ارىستانداردىڭ اقىرعان داۋسىن ەستىگەن مايمىل شوشىپ كەتىپ، اعاشتىڭ باسىنا ورمەلەپ شىعىپ كەتەد...
-
سەكىرگىش دەگەن لاقاپ اتى بار ليتوريا ناسۋتا تۇقىمىنا جاتاتىن ءبىر باقا وتە ماقتانشاق بولىپتى. ءوزىنىڭ ۇزىن قاشىقتىققا سەكىرەتىندىگىن ۇنەمى ماقتانىش تۇتاتىن ول باسقا باقالارعا قاراعاندا ءىرى بولىپتى. ءى...
