InfoHub Logo

اتباسار ۋەزىندەگى نايمان ىشىندە ءار ىستە ۇقىپتى، تىلىنە شەبەر، سوزدە ۇتىمدى، ءوز ەلىندە جانە كورشىلەس ەلدەردە بىلىكتى ادامداردىڭ ءبىرى. مۇقىش اتتى زيالى قارت ءومىر ءسۇردى.

بىردە، قىسقى مەزگىلدە، ول ءبىر ۇيگە كەلىپ تۇسە قالدى. ءۇي ادامدارى كەشكى تاعامعا وتىرا باستاعان ەدى. ۇزاق ءجۇرىپ توڭىپ كەلگەن مەيمان ىستىق شايمەن بوي جىلىتقىسى كەلىپ، جايۋلى داستارحاندى جيعىزباي، دايار اسقا وتىرا قالدى.

داستارحاندا شايدىڭ سالقىن جەمدەرىمەن بىرگە ىستىق قۋىرداق بار ەكەن. ول سىيلى مەيماننىڭ الدىنا قويىلدى. مۇقاڭ مايلى قۋىرداقتان ءبىر قاسىق الدى دا، ءۇي يەسىنە قاراپ:

— بۇل نەنىڭ ەتى؟ — دەدى.

— سوعىمعا قولدان سويىلعان مالدىڭ ەتى، — دەپ جاۋاپ قايىردى ءۇي يەسى.

— جوق، بۇل مال ەتى ەمەس، ءيتتىڭ نەمەسە قاسقىردىڭ، ايتپەسە شوشقانىڭ ەتى. ال سەن قولدان سويعان مالدىڭ ەتى دەپ وتىرسىڭ عوي. ولاي بولسا، بۇل قوشقار مەن تەكەنىڭ، بۇقانىڭ، بۋرانىڭ نەمەسە ايعىردىڭ ەتى، — دەپ قارت-اتا داستارحان اينالاسىندا وتىرعانداردى تامساندىردى. ءبىراق ولار اقساقالدان بۇل وداعاي ءسوزدىڭ شەشىمىن سۇراي المادى. مۇقاڭ ءوزى ايتىپ بەردى:

— مەن ومىرىمدە الگى اتالعان حايۋانداردىڭ ەتىن تاتىپ كورگەنىم جوق. قۋىرداقتاعى ەتتى مەنىڭ تالعامىم قابىلدامادى، سوندىقتان مەن ونى ومىرىمدە تاتىپ كورمەگەن ەت ەكەن دەپ ۇعىندىم.

ءۇي يەسى مويىندادى، قۋىرداق قوشقار ەتى ەكەنىن ايتتى.

---