شاقىرۋ
ەستە جوق ەسكى زاماندا ەن دالانى ەركىن جايلاپ، مۇڭسىز-قامسىز عۇمىر كەشكەن ەل كۇتپەگەن ءبىر ناۋبەتكە تاپ بولادى. ەل شەتىنەن بىلىنگەن قالىڭ جىلان ورداسى كوزىنە كورىنگەن مال-جانعا شابۋىل جاساپ، قىرىپ-جويا باستاپتى. نەبىر اق وردا ۇيلەردى ساقينالاپ وراپ الاتىن جىلاندار كۇتىرلەتە سىققاندا كۇل-تالقان ەتەدى ەكەن. الىپ جىلانداردىڭ قىسپاعىنا تۇسكەن اتان تۇيەلەردىڭ ءوزى تاناۋىنان قانى دىردەكتەپ، اياق سەرپۋگە شاماسى كەلمەپتى.
مۇنداي سۇمدىقتان دۇرلىككەن قالىڭ ەل شوشىنىپ، باس ساۋعالاي قاشادى. تاۋ-تاستى، ۇڭگىر-وقاپتى پانالايدى. ءبىراق جىلان نوپىرىنەن سوندا دا قۇتىلا المايدى. اسىرەسە وسىناۋ وردالى جىلانداردىڭ كوسەمى — قوس ءمۇيىزدى ايداھار ءتىرى جانعا ساۋعا تاپتىرمايدى. ونىڭ قوس ءمۇيىزى دەم تارتىپ، ۋىتىن شاشقاندا ادامداردىڭ ەتى اعىپ ءتۇسىپ، ساۋدىراعان قۋ سۇيەكتەرى قالادى ەكەن.
ابدەن ايلاسى تاۋسىلعان ادامدار قۇرىپ بىتەتىن بولعان سوڭ، تاڭىرىگە جالبارىنىپ كومەك سۇرايدى. ادامداردىڭ زارى ءتاڭىرىنىڭ قۇلاعىنا جەتسە كەرەك، كەشىكپەي كوكتەن بەلگى بىلىنەدى. الدىمەن، اسپاننان جولاق جاساپ جارىق ساۋلە كورىنەدى. سونسوڭ، سول جارىق ساۋلەنى جول ەتىپ، قوس وركەش تۇيەگە تەرىس قاراپ مىنگەن ءنۇرتولى اتتى بالا تۇسەدى. بالانىڭ قولىندا اققۋ مويىن قارا قوبىز بولسا كەرەك، نەبىر سيقىرلى ساز شىعارىپ، كۇي توگە كەلەدى. جەر بەتىنەن كۇيدىڭ سارىنى ەستىلۋى مۇڭ ەكەن، قاپتاعان وردالى جىلان شيىرشىق اتۋىن قويىپ، سىلتىدەي تىنادى. بۇرىنعى قان قۇمار وبىر مىنەزىن ۇمىتىپ، كۇيدىڭ داۋىسىن ۇيىپ تىڭداعانداي بولادى. وسى كەزدە كوكتەن تۇسكەن ءنۇرتولى قوبىزىن سارناتقان قالپى قاراتەڭىزدى بەتكە الىپ جۇرە بەرەدى. ونىڭ سوڭىنان كۇيدى ۇزدىگە تىڭداعان جىلاندار دا قالماي جىلجىپ، تەڭىز تۇڭعيىعىنا بىرگە كىرەدى.
ءسويتىپ، ەن دالانى ەركىن جايلاعان حالىق يىقتارىنان اۋىر جۇك تۇسكەندەي كوڭىلدەرىن دەمدەپ، قايتادان مۇڭسىز-قامسىز كۇيلەرىمەن قاۋىشادى.
ادامدارعا اراشا تۇسكەن ءنۇرتولى كۇنى بۇگىنگە دەيىن قاراتەڭىزدىڭ استىندا توقتاتپاستان كۇي توگىپ وتىرسا كەرەك. ال ءمۇيىزدى اجداھا باستاعان جىلاندار ورداسى قوبىزدىڭ سازدى سارىنىن جالىقپاي تىڭداۋدا كورىنەدى.
ءنۇرتولى قوبىز كۇيىن توقتاتپاۋعا ءتيىستى. ەگەر قوبىز كومەيىنەن كۇي سارىنى ۇزىلسە، جىلاندار ورداسى قايتادان جەر بەتىنە شىعىپ، تىرشىلىك اتاۋلىعا قىرعىن تاپتىرماق.
ءنۇرتولىنىڭ جىلانداردى كۇيمەن شاقىرىپ، سوڭىنان ەرتكەن سيقىرلى سازىن ەستىگەن ءبىر قۇيما قۇلاق قوبىزشى كەيىن «شاقىرۋ» كۇيى دەپ جۇرتقا جايسا كەرەك.
You Might Also Like
-
كىشى ءجۇزدىڭ جاراباي دەگەن جۋان تۇقىمى قىپشاقتىڭ ءبىر ادامىن ءولتىرىپ، تەڭدىك بەرمەيدى. ءبىر جولى قىپشاقتىڭ تالاپكەرلەرىنە ىلەسىپ جاس بالا بارادى.
