«شاش قىرقۋ» تۋرالى
(تۇسىنىك رەتىندە)
«ەڭبەكشى قازاقتىڭ» 19-نويابردە شىققان 457 نومەرىندە مەنىڭ «سوۆپارتتاعى قارىنداسىما (گۇلبارامعا)» دەگەن ولەڭىم باسىلدى. ونى وقىعان جۇرتقا ولەڭنىڭ قانداي ءماڭدى ەكەنىن بۇل ارادا تاعى دا ايتىپ ءوتۋدىڭ قاجەتى جوق.
ولەڭنىڭ سوڭىندا باسقارما ولەڭدەگى ايتىلعان پىكىر تۋرالى ءوز پىكىرىن جازىپتى.
مەنىڭ ويىمشا، باسقارما ولەڭنىڭ ىشىندەگى پىكىرىن، ءمانىن اۋا تۇسىنگەن ءتارىزدى. قاتەلەۋ تۇسىنگەن ءتارىزدى. باسقارما ايتادى: «ساكەننىڭ وزگەلەرى دۇرىس، ءبىراق شاشىندى «نە قىلسا دا» ۇزىن قىل، ۇيتپەسەڭ «دىننەن» شىعارسىڭ». «ەل ۇركەدى» دەگەنىنە قول قويمايمىز. «شاشىندى شۇبالتىپ جۇرسەڭ عانا كوركەيەسىڭ دەگەن پىكىر كوممۋنيستەر سالتىندا جوق. بىرەۋ ۇزىن شاشتى جاراتادى. بىرەۋ قىسقا شاشتى جاراتادى. بۇل اركىمنىڭ ءوز تىلەۋىنشە بولاتىن نارسە عوي. شاش ۇزىن، نە قىسقا بولسىن دەپ زاڭداۋعا بولمايدى — مۇنى كوممۋنيست اقىنىمىز دا ەسكەرۋ كەرەك ەدى» دەيدى. ولەڭنىڭ نەگىزگى پىكىرىن باسقارما قاتەرەك تۇسىنگەن ءتارىزدى. ارينە، مەن «شاشىندى قىرىقپاساڭ عانا دۇرىس بولعانىڭ» دەگەن پىكىردى ايتپايمىن. گاپ تەك شاشتا عانا دەپ وتىرعانىم جوق. «قۇر سىرتىڭدى عانا وزگەرتىپ، ونەر-بىلىمنەن بوس قالىپ جۇرمە» دەگەن پىكىردى ايتام.
جاڭارماسىن دەمەيمىن
سىرتقى كورنەك ءتۇرىڭدى.
جاڭارت، ءبىراق بىردەي قىل
سىرت پەن ىشكى سىرىڭدى —
دەگەن ءسوز تۇسىنىكتى ەمەس پە؟
ولەڭگە وقۋشىلار قاتە ءتۇسىنىپ جۇرمەسىن. «شاشتىڭ ورالىپ، اش بەلگە بۇرالىپ، توقپاقتاي بولىپ ءتۇسىپ جاتۋى» كوركەيتەدى دەپ كەسىپ-پىشۋ جارامايدى دەگەمىز!»
1926 جىل
گازەت رەداكسياسى وسىعان مىناداي ەسكەرتۋ جاساپتى: «ساكەننىڭ سىرتىڭدى وزگەرتىپ اۋرەلەنبە، ونەر-بىلىمنەن بوس قالما دەگەنىنە دەنى دۇرىس كىسى قارسى بولماس. مۇنىسىنا باسقارما تۇگەلىمەن قوسىلادى. ءبىراق، ءبىزدىڭ وقۋشىلارعا ەسكەرتكەنىمىز ساكەننىڭ:
قىرعاۋىلدى كوركەيتكەن
باتسايى ءجۇن ورنەگى.
كوركەيتپەي مە سەنى دە
جىبەك شاشىڭ ورالعان،
تۇسكەن اسىل توقپاقتاي،
اش بەلىڭنەن بۇرالعان... —
دەگەنى عوي!
You Might Also Like
-
جاقسى بولسىن، جامان بولسىن، دۇنيە جۇزىنە شىققان ءاربىر كىتاپشاعا، كىتاپقا كەدەي قازاقستان سياقتى ەلدەر جالقاۋ قاراماي ىقتيقاتتاپ سالەم بەرۋ كەرەك.
