شولپان ءولدى
شولپان ءولدى... وكتيابر تاڭى اتقاننان كەيىن ويانا باستاعان قازاق قىزدارىنان شىققان جانا تالاپ، جاس اقىن شولپان 1926 جىلدىڭ 28-سەنتيابرىندە جوق بولدى. ايماقتىق پارتيا كوميتەتىنىڭ ايەل ءبولىمى شىعاراتىن «ايەل تەندىگى» جۋرنالىنىڭ 5 — 6 نومەرىندە شولپاننىڭ قىسقاشا كىم ەكەنى ايتىلىپ، سۋرەتى باسىلدى. شولپاندى قازاق وقۋشىلارى بىلە باستاعان ەدى. شولپان قازاق قىزدارىنان شىققان ءبىرىنشى اقىن ەدى. كەدەي تابىنىڭ اقىنى ەدى. شولپان جىل قۇسى ەدى، جاڭا گۇلدەگەن قىزعالداق ەدى. ءوسىپ جەتپەي تەز سولدى. كوكتەي سولدى.
شولپاننىڭ جاسى جيىرما ۇشتە ەدى. اكە-شەشەسى اقمولا ۋەزىنىڭ نۇرباي بولىسىنىڭ قازاعى. كەدەي، ناشار ادامدار. شولپاندى 1918 جىلى قازاق ادەتىمەن ال دوڭعار بالاسى بوكەي دەگەنگە بەرگەن. بوكەي سۇيمەگەن ادامى بولعاندىقتان شولپان سوۆەت زاڭىنىڭ ارقاسىندا بوسانىپ شىققان، سودان وقۋ ىزدەگەن. اقمولادا 1923 جىلى كوممۋنا مەكتەبىندە تاربيەلەنۋشى بولعان. 1924 جىلى ورىنبورعا كەلىپ، ايەلدەر مەكتەبىندە وقىعان. شولپاننىڭ ولەڭى ەڭ ءبىرىنشى رەت 1923 جىلى «ەڭبەكشى قازاققا» باسىلىپ شىقتى. سوندا-اق اقىن ەكەنى كورىنە قالعان ەدى. جىل سايىن ولەڭ كەستەسىن ادەمىلەپ كەلە جاتىر ەدى. نە كەرەك، كوك شىبىق جەتپەي قيىلدى!
شولپان 1923 — 1926 جىلعى جازعان ولەڭ جيناقتارىن ولەر الدىندا ماعان جىبەرىپتى. جازعان حاتىندا:
«وتە ناشارلادىم. دوكتوردىڭ «ەلەسىن» دەگەن كۇنى جەتىپ قالدى. قوش بولىڭىز! شولپان باتتى دەپ ەسەپتەرسىز... ولىمگە بەرىلگەن قارىنداسىڭ شولپان» دەپتى.
ايتقانداي كەشىكپەي شولپان ءولدى...
ءسوزىنىڭ باسىندا:
ۇلگىلى ءسوز،
بولا ما كەز
وقىپ، ءبىلىپ جازباسا.
التىن مەن جەز
الىنباس تەز،
ەڭبەكتەنىپ قازباسا.
تىلىڭنەن شىعار،
باسقالار ۇعار،
كوڭىلدىڭ شەرىن قوزعاسا، -
دەپتى.
سۇيدەگەن شولپان ەڭبەك جولىندا ءولدى. قازاقتىڭ كەدەي ايەلدەرىنىڭ كوڭىل شەرىن جىرلاۋعا الاسۇرىپ ىزدەنگەن شولپان جەتپەي جوق بولدى.
قوش، قارىنداس! قوش، جولداس!
1926 جىل
You Might Also Like
-
1. تەگىستىك جولىن قۋعان توڭكەرىستەردىڭ ءتاۋىرى، تاپقا بولىنگەن الەۋمەتتى جويىپ، تاپسىز الەۋمەت — كوممۋنا الەۋمەتىن جاسايتىن كوشپەلى ءداۋىر. بۇل ءداۋىر رەسەيدەگى بولعان وكتيابر توڭكەرىسىنەن باستا...
