شىلدەحاناعا ارنالعان قۇتتىقتاۋلار، تىلەكتەر
ارداقتى اعايىن! ءقادىرلى قوناقتار! قىمباتتى قۋانىش يەلەرى!
قازاقتا «بالالى ءۇي – بازار، بالاسىز ءۇي – قۋ مازار» دەگەن قاناتتى ءسوز بار. كوكتەگى جاڭا ءبىر جۇلدىز جارقىراعانداي، ادامزات قاتارىنا تاعى ءبىر نارەستە قوسىلدى. باۋى ونىڭ بەرىك، ىرىس وعان سەرىك بولسىن! تەزىرەك ەر جەتىپ، قولقاناتتارىڭا اينالسىن! وعان دا، وزدەرىڭە دە باستاي ب ا ق، شاشتاي داۋلەت بەرسىن! قۋانىش قۇتتى بولسىن! ۇزاعىنان ءسۇيىندىرسىن!
*** *** *** ***
اينالايىن باۋىرلارىم مەنىڭ! اسا ءقادىرلى دوسىم!
بالا – ادامنىڭ باۋىر ەتى. ادامنىڭ بار قىزىعى – بالانى مەيىرلەنە يىسكەۋ بولسا، سول باقىتقا بۇگىن وزدەرىن دە جەتىپ وتىرسىڭدار. بەيبىت ەلدىڭ اق كوگەرشىنى بولىپ ومىرگە ىڭگالاپ كەلگەن جاس نارەستەنىڭ شىلدەحانا تويى قۇتتى بولسىن!
سەندەردىڭ شاڭىراقتارىڭدى قۋانىشقا بولەگەن دۇنيەگە كەلگەن ءسابيدىڭ باۋى بەرىك بولسىن، ءومىر – جاسى ۇزاق بولسىن. اتا-اناسىنىڭ ءۇمىتىڭ اقتايتىن، ماڭدايى جارقىراعان ۇل بولىپ ەر جەتسىن!
*** *** *** ***
جارىق دۇنيەگە شىر ەتىپ كەلگەن سابيىمىزگە اناسىنىڭ كوركىن بەرسىن، اكەسىنىڭ بوركىن بەرسىن، اجەسىنىڭ اقىل-ويىن بەرسىن، اتاسىنىڭ ابىرويىن بەرسىن! ءوسسىن – ءونسىن، جاماندىق كورمەسىن، وسكەن سوڭ ەرلەسىن! قۋانىش قۇتتى بولسىن! بارىمىزگە جۇعىستى بولسىن!
*** *** *** ***
اللا بالانى ماڭدايىنان سۇيسە – ول اتاقتى عالىمعا اينالادى ەكەن، ەرنىنەن سۇيسە – ودان ايگىلى شەشەن شىعادى دەسەدى، اياعىنان سۇيسە – بەلگىلى ءبيشى، قولىنان سۇيسە – كەرەمەت كۇيشى بولادى-مىس. اللانىڭ بالاعا كوزى وڭ بولسىن، ءبىزدىڭ تىلەگىمىز سول بولسىن! ءومىرى ۇزاق، نەسىبەسى زور بولسىن! قىسقاسى، كۇلەيىك، وينايىق، تويلايىق – قويمايىق!!!
*** *** *** ***
بالامىزدىڭ باۋى بەرىك بولسىن! داۋلەت-ىرىس وعان سەرىك بولسىن! ماڭدايىنان جۇلدىزى جارقىراپ، ەلىنىڭ العا اپارار ءۋازىر بولسىن، وسىناۋ جۇكتى موينىمەن كوتەرۋگە ءوزى دە ءازىر بولسىن! دەنى ساۋ بولسىن، شىققانى تاۋ بولسىن!
*** *** *** ***
دۇنيەدە تۇڭعىش پەرزەنتتىڭ كەلۋى ءاربىر وتباسى ءۇشىن ۇلكەن قۋانىش. ومىرگە جاڭا كەلگەن ءسابي – كەشە عانا ۇيلەنۋ تويىن وتكىزگەن جاس-جۇبايلاردى «اكە-شەشە»، ال ولاردىڭ اتا-اناسىن «اتا-اجە» اتاندىرىپ، وسى ءبىر شاڭىراققا ەرەكشە ءبىر مەيىرىمدىلىكتىڭ نۇرىن سىيلايدى.
ولاي بولسا ومىرگە كەلگەن جاس ءسابيدىڭ اكە-شەشەسىنە، اتاسى مەن اجەسىنە مىقتى دەنساۋلىق تىلەپ، تۇڭعىشتارىڭىزدىڭ باۋى بەرىك بولسىن دەيمىز. ال جاس سابيگە تىلەرىمىز: اتا-اناسىنىڭ ءۇمىتىن اقتايتىن ماڭداي جارقىراعان ۇل بولىپ ەر جەتسىن! ءومىرلى بولسىن!
*** *** *** ***
قازاقتا «بالالى ءۇي – بازار، بالاسىز ءۇي – قۋ مازار» دەگەن ءسوز بار. دۇنيەگە ءسابيدىڭ كەلۋى - ءومىردىڭ ءبىر عانيبەت – عاجابى دەۋگە بولادى.
دوستىم، سەنى اكە بولۋىڭمەن، ال جارىڭدى انا بولۋىمەن قۇتتىقتايمىز. سەندەردىڭ شاڭىراقتارىڭدى قۋانىشقا بولەگەن دۇنيەگە كەلگەن ءسابيدىڭ باۋى بەرىك بولسىن، ءومىر جاسى ۇزاق بولسىن. تەزىرەك ەر جەتىپ، سەندەردىڭ قولقاناتتارىڭا اينالسىن. ارتىنان ءىنى-قارىنداستارىن ەرتە بەرسىن! ەندەشە وسى كىشكەنتاي ءومىردىڭ جالعاسى جانە ونى دۇنيەگە كەلتىرگەن اتا-اناسى ءۇشىن!
ۇلى عۇلامالار «ءاربىر ادام دۇنيەگە كەلگەندە اسپاندا جاڭا ءبىر جۇلدىز جانادى» دەپ ايتقان ەكەن.
مىنە، ءدال ءقازىر تۇنگى اسپانعا نۇرىن شاشىپ تۇراتىن جۇلدىزداردىڭ سانى بىرەۋگە كوبەيدى. جارىق دۇنيە ەسىگىن جاڭا اشقان مىناۋ پەرىشتەمىز دە سول جۇلدىزداي جارقىراپ ورتامىزعا قۋانىش الىپ كەلدى.
ومىرگە كەلگەن سابيىمىزگە اللا تاعالام مىقتى دەنساۋلىق، باقىت، ۇزاق ءومىر بەرسىن. امان-ەسەن ەر جەتىپ، ەلىنىڭ ايتۋلى ازاماتى بولسىن!
*** *** *** ***
ءقادىرلى قوناقتار! بۇگىنگى قۋانىشتىڭ قىمباتتى يەلەرى!
وسى اق داستارحان باسىنا ادال نيەتپەن جينالىپ وتىرعان قوناقجاي حالقىم، بۇگىنگى تويدىڭ قانداي توي ەكەنى بارشاڭىزعا ءمالىم. سوندىقتان مىناۋ زاماننىڭ،بەيبىت ەلدىڭ اق كوگەرشىنى بولىپ ومىرگە ىڭگالاپ كەلگەن جاس نارەستەنىڭ شىلدەحانا تويى قۇتتى بولسىن!
*** *** *** ***
بالا – ادامنىڭ باۋىر ەتى. ءبىرىن-بىرى جاقسى كورەتىن ەكى ادامنىڭ جانى مەن تانىنەن جارالعان بالا ەرەكشە ىستىق. وتباسى مۇشەلەرىنىڭ ءتاتۋ-تاتتى ءومىر ءسۇرىپ، بىر-بىرىنە مەيىرىممەن قاراۋىنا نەگىز جاسايتىن العى شارتتاردىڭ ءبىرى – ولاردىڭ بىر-بىرىنە دەگەن سۇيىسپەنشىلىگى بولسا، ەكىنشى شارت – پەرزەنت. سوندىقتان اتامىز قازاق «بالالى ءۇي – بازار» دەپ ورىندى ايتقان. ادامنىڭ ءبىر قىزىعى – بالانى مەيىرلەنە يىسكەۋ ۇلكەن باقىت بولسا، سول باقىتقا مىنە، بۇگىن سەندەر دە جەتىپ وتىرسىڭدار.
سول سەبەپتى مەن سەندەرگە تويلارىڭ تويعا ۇلاسسىن، ومىردەگى كورەتىن قىزىقتارىڭ كوبەيە بەرسىن دەمەكپىن.
مەنىڭ وسى ايتقانىم توي – تىلەگىم ءۇشىن داستارحانداعى دامنەن الىپ وتىرىڭدار!
*** *** *** ***
كوك اسپانداعى جۇلدىزدارعا جاڭا ءبىر جۇلدىز، جەردەگى ادامزات قاتارىنا تاعى ءبىر ادام قوسىلدى. ومىرگە شەكەسى تورسىقتاي ءسابي كەلدى!
بەيبىت ەلدىڭ اق كوگەرشىنى بولىپ دۇنيە ەسىگىن اشقان ءسابيىمىزدىڭ باۋى بەرىك بولسىن!
ماڭدايى جارقىراعان ۇل بولىپ ەر جەتىپ، اتا-اناسىنىڭ عانا ەمەس، بۇكىل ەلىنىڭ ماقتانىش ەتەر ازاماتىنا اينالسىن!
قۋانىش قۇتتى بولسىن، ۇزاعىنان ءسۇيىندىرسىن! ءاربىر باسقان قادامى وڭعارىلىپ، قىدىر اتا قولداپ ءجۇرسىن.
*** *** *** ***
كىشكەنتايىڭىزدىڭ بال قىلىعىن قىزىقتاپ، انالىق مەيىرىمىڭىزگە بولەي بەرىڭىز. شاڭىراعىڭىزدان شاتتىق-قۋانىش، جۇزىڭىزدەن كۇمىس كۇلكى ارىلماسىن!
*** *** *** ***
نارەستەلى بولعان قۋانىشىڭىز قۇتتى بولسىن! دۇنيەگە شىر ەتىپ كەلگەن التىن اسىقتاي ۇلىڭىز كەلەشەكتە قىرانداي العىر، سۇڭقارداي ءور، ارىستانداي ايباتتى، جولبارىستاي قايراتتى، قاسقىرداي وجەت جىگىت بولىپ ءوسىپ، اۋلەتىڭىزدىڭ جارقىن جالعاسى، شاڭىراعىڭىزدىڭ لايىقتى يەسى بولار ەرگە، ەلىنىڭ ارقا سۇيەر ەڭسەسى بيىك ازاماتىنا اينالۋىن تىلەيمىز. جاس ءسابيدىڭ اتا-اناسى رەتىندە جۇبايىڭىز ەكەۋىڭىزگە دەننىڭ ساۋلىعى مەن جاننىڭ جىلىلىعىن، تاۋدان بيىك اكەلىك جۇرەكتىڭ قامقورلىعى مەن تەڭىزدەن تەرەڭ انالىق جۇرەكتىڭ مەيىرىمىن تىلەيمىز. شاڭىراقتارىڭىز شاتتىققا، قۇشاقتارىڭىز قۋانىشقا تولسىن!
*** *** *** ***
قۇتتى بولسىن بەسىگىڭ
ارتىق بولىپ نەسىبىڭ.
داستارحانىڭ جايىلىپ،
اشىق بولىپ ەسىگىڭ،
ورە بەرسىن بالالار.
دۇشپاندارىڭ بولماسىن،
كۇنشىلدىكپەن تابالار.
الپامىستاي تاعى دا،
ۇل ارتىنان ۇل تاپقىن.
جارقىراعان شولپانداي،
قىز ارتىنان قىز تاپقىن.
قۇتتى بولسىن بۇگىنگى،
شىلدەحانا تويلارىڭ.
تىلەكتەرىن قابىل بوپ،
ورىندالسىن ويلارىڭ.
*** *** *** ***
بالانىڭ كوڭىلى جاي بولسىن،
مىڭ جىلقىلى باي بولسىن.
ايداعانى قوي بولسىن،
شايناعانى ماي بولسىن!
ازىن-اۋلاق داۋلەتى
كۇندە وزىنە توي بولسىن.
جۇرتتا قالعان جۇرىنى
دومالاپ كەلىپ قوي بولسىن!
جۇرتتا قالعان تۋلاعى
تۋلاپ كەلىپ تاي بولسىن.
*** *** *** ***
ايدارى كۇن ءسۇيىپ، كۇنگە كۇيسىن ماڭدايى!
جوتاسىنا ماي ءسىڭىپ، قۇرعاماسىن تاڭدايى!
ەرى بولسىن ەلىنىڭ، ار-نامىسىن ساقتايتىن!
گ ۇلى بولسىن جەرىنىڭ، شاڭ-توزاڭعا باتپايتىن!
الدى بولسىن تەڭىنىڭ، يمەنبەستەن اتتايىن!
*** *** *** ***
مەكەن ەتسىڭ جانۇياڭدى جاقسىلىق،
وسە بەرسىن بوبەكتەرىڭ شات كۇلىپ.
ورتايماسىن قۋانىشىڭ، باقىتىڭ،
الديلەسىن جاقسى تىلەك، ءتاتتى ءۇمىت.
*** *** *** ***
قۇتتى بولسىن نەسىبىڭ، ارتىق بولسىن نەسىبىڭ!
داستارحانىڭ جايىلىپ، اشىق بولسىن ەسىگىڭ!
قۇتتى بولسىن بۇگىنگى شىلدەحانا تويلارىڭ،
تىلەكتەرىڭ قابىل بوپ، ورىندالسىن ويلارىڭ!
*** *** *** ***
ءسابي كوڭىلى جاي بولسىن، مىڭ جىلقىلى باي بولسىن!
ايداعانى تاي بولسىن، شايناعانى ماي بولسىن!
ازىن-اۋلاق داۋلەتى كۇندە وزىنە توي بولسىن،
جۇرتقا قالعان جۇرىنى دومالاپ كەلىپ قوي بولسىن!
جۇرتتا قالعان تۋلاعى تۋلاپ كەلىپ تاي بولسىن،
تاي بولسىن دا تۋلاسىن – ءبىر قۇرداسى سۇراسىن...
*** *** *** ***
نارەستەمىز ءومىرلى بولسىن،
تۇرمىسى ونىڭ كوڭىلدى بولسىن!
اتا-اناسىنا مەيىرلى بولسىن،
اعايىن-تۋىسقا پەيىلدى بولسىن!
ونەگە پەيىلگە زەيىندى بولسىن!
تۇلا بويى تۇنعان ونەر بولسىن،
ون ساۋساعى مايىسقان شەبەر بولسىن!
ەل قورعايتىن باتىر بولسىن،
شىندىق ايتار اقىن بولسىن!
ەل بيلەيتىن اكىم بولسىن،
ادىلدىككە جاقىن بولسىن!
حالقىم دەگەن جۇرەگى بولسىن،
جۇرتىنىڭ قامقور تىرەگى بولسىن!
ابىرويى ورلەسىن،
ەل الدىندا ەرلەسىن!
قازاق ءۇشىن تەرلەسىن،
ەش جاماندىق كورمەسىن.
*** *** *** ***
بالا باۋى بەرىك بولسىن، اناسىنا سەرىك بولسىن!
ازامات بوپ ەر جەتسىن، اقساقال بوپ تورلەتسىن!
ادام بولسىن كورىكتى، عۇمىرى ۇزاق بەرىك-تى،
قولقاناتى كوپ بولىپ، ەرتە بەرسىن سەرىكتى!
ەلىنە بوپ ارداقتى، مىنەزى دە سالماقتى،
ونەرى ورلەپ جان-جاقتى –
وسى ايتقانىم تەز كەلسىن، ءتاڭىر بەرىپ زور باقتى!
*** *** *** ***
ءسابيىمىز سۇيكىمدى بولسىن، ونەر-بىلىمگە يكەمدى بولسىن!
بايتەرەكتەي بويشاڭدانىپ ورەن، ءورشىل، وركەندى بولسىن!
جاقسى جولدى تاڭداسىن، جاماندىق ءتالىم الماسىن –
دانالاردىڭ ءداستۇرىن جاڭالاسىن، جالعاسىن!
شۇعىلالى شۋاق كۇن كەشسىن، باسىن سۇر بۇلت شالماسىن!
قوس توپشىسى تالماسىن، قىرانداي بيىك سامعاسىن!
ارى ادال، جانى جاز، قۇربىسىنان قالماسىن!
*** *** *** ***
ءۇيىڭىزدىڭ بولمەسىن ءسابي ءۇنى كەرنەسىن،
ۇل ەرجەتىپ، قىز بويجەتىپ، بىلىمگە قۇلاش سەرمەسىن.
الۋان ونەر ۇيرەنىپ، ءدال باسسىن كوڭىل پەرنەسىن،
قىزمەت ىستەپ ەلى ءۇشىن ابىرويى ورلەسىن.
سول بەدەلىن قورعايتىن، ومىردەن تاپسىن تەڭدەسىن،
باقىتتى، ۇزاق جىل جاساپ، جامانشىلىق كورمەسىن.
ءوسىپ-ونىپ وركەندەپ، بار ورتادا تورلەسىن -
قىسقاسى، ۇرپاق مىڭ جاساپ، جارىعىڭىز سونبەسىن.
*** *** *** ***
اتىڭ-اتىڭ اتۋ بول، تۋىستارمەن تاتۋ بول!
ايداعىسىز مالدى بول، اعايىننىڭ الدى بول!
باعانالى تايداي بول، جەمىس بەرەر باۋداي بول!
جاقسىلىققا سەمىز بول، شاعالالى تەڭىز بول!
دۇشپان قۋسا جەتپەسىن، قاز ۇستىڭنەن وتپەسىن!
تاعدىر ونى تەپپەسىن، ىرىس-داۋلەت وتپەسىن!
*** *** *** ***
اكەنىڭ تىلەگى
بالام، وزىق ورەن بول، قىز كوزىندەي تەرەڭ بول،
ەل سىناسىنا – قۇلاق سال، ال ماقتاسا – كەرەڭ بول!
ادىلدىككە جۋىق بول - ءالجۋاز بوپ تۋىپتى ول،
كۇن كوزىندەي جىلى بول، كوك سۇڭگىدەي سۋىق بول!
قاتتاپ تۇرسا تىستان قول – باسقارۋعا ۇستا بول،
اقىل-ويعا ۇزىن بول، قىزىل تىلگە قىسقا بول!
جاقسىلىققا شەگەن بول، جاماندىققا شەمەن بول،
ءوز اكەڭنەن بيىك بول، ءوز ۇلىڭنان تومەن بول!
قارالى ەلدىڭ تاڭى بول، جارالى ەلدىڭ جانى بول،
ءسونىپ ولمە، ولسەڭ دە - ءوز وتىڭا جانىپ ءول!
*** *** *** ***
انانىڭ تىلەگى
اينالايىن، بالاشىم، امان بولسىن اناشىڭ!
امان بولسىن اكەڭ دە، اعاتايىڭ، تاتەڭ دە!
ءوزىڭ ءتاتتى بالداي بول، تامىرى تەرەڭ تالداي بول!
بيىك زاڭعار تاۋداي بول، جەمىسى مول باۋداي بول!
ءومىر جولىن تاڭداي ءبىل، تۋرالىقتى قولداي ءبىل!
*** *** *** ***
اعايىننىڭ تىلەگى
ءبىر ءۇيدىڭ بالاسى ەمەس – كوپ ءۇيدىڭ ساناسى بول،
ءبىر ەلدىڭ بالاسى ەمەس – بار ەلدىڭ داناسى بول!
ءبىر توننىڭ جاعاسى ەمەس – كوپ قولدىڭ اعاسى بول!
اقتى اق دەپ باعالا، قارانى قارا دەپ قارالا!
وزەگىڭ تالسا، وزەن بويىن جاعالا،
باسىڭا ءىس تۇسسە، كوپشىلىكتى ساعالا!
وزىڭە-وزىڭ كامىل بول، حالقىڭا ءادىل بول!
جاۋىڭا قاتال بول، دوسىڭا ادال بول!
*** *** *** ***
اتا ايتار ءبىر تىلەك
ءسوزىڭ اتالى بولسىن، اتىڭ جوتالى بولسىن!
بيەڭ قۇلىندى بولسىن، تۇيەڭ بوتالى بولسىن!
قويىڭ ەگىزدەن تاپسىن، ەشكىڭ سەگىزدەن تاپسىن!
كەلىن اياعىمەن جاقسىن، قويشى تاياعىمەن جاقسىن!
كوڭىلىڭ دۋالى بولسىن، باسىڭ سىيلى بولسىن!
قىزىڭ يبالى بولسىن، ۇلىڭ ميلى بولسىن!
كەمىمەي پارقىڭ، ءقادىرلى حالقىڭ باسىڭدى باعالار بولسىن!
ءوزىڭ سارى ءتىستى قاريا، داۋلەتىڭ ءداريا بولسىن!
*** *** *** ***
اجە ايتار ءبىر تىلەك
ءفارابيدىڭ باسىن بەرسىن،
جامبىلدىڭ جاسىن بەرسىن!
جولبارىستىڭ جۇرەگىن بەرسىن،
جورتقان ەلدىڭ بىلەگىن بەرسىن!
ءجۇسىپتىڭ ديدارىن بەرسىن،
مۇحاممەتتىڭ يمانىن بەرسىن!
جانىڭا دالانىڭ كەڭدىگىن بەرسىن،
ازىرەت ءالىنىڭ ەرلىگىن بەرسىن!
امىرەنىڭ ءانىن بەرسىن،
ساكەننىڭ ءسانىن بەرسىن!
قۇرمانعازىنىڭ كۇيىن بەرسىن،
شارانىڭ ءبيىن بەرسىن!
قاجىمۇقاننىڭ قايراتىن بەرسىن،
يساتايدىڭ ايباتىن بەرسىن!
ابىلايدىڭ بايراعىن بەرسىن،
باۋىرجان باتىردىڭ ايبارىن بەرسىن!
*** *** *** ***
ۇيا سالعان بيىك قۇزعا ءوز جەرىم دەپ،
وزىمنەن باسقا ەشكىم بارماسىن دەپ،
شىڭدا جاتىپ شىڭدالاد وزدىگىنەن،
اكەمدەي بولامىن دەپ بالا بۇركىت.
بۇل ءوزى كوپتەن كۇتكەن ارمانىڭ ەد،
قۋانىپ جاتىرسىڭ-اۋ ومىرگە ....... كەپ
تىلەرىم زور دەنساۋلىق ۇشەۋىڭە
ءالى-اق ەرتەڭ جۇرەسىڭدەر جەتەكتەپ.
بولسىن دەيمىن دۇشپانىڭنان دوسىڭ باسىم،
ءار ۋاقىتتا دومالاپ ورگە تاسىڭ.
قوساعىڭمەن قوسا اعار قىزىقتاي بەر
كورسەتسىن قىزىقتارىن ەر ........
*** *** *** ***
بارشا تويدىڭ باسى ەكەن شىلدەحانا،
باسى اينالىپ باقىتتان تۇر بوساعا.
ۋىلدەيدى بەسىكتە جاس شارانا،
شۋىلىنا تىرلىكتىڭ ءۇن قوسا ما؟
جۇرەكتەردى بالقىتىپ قورعاسىنداي،
ءسابي كەلدى ءومىردىڭ جالعاسىنداي.
كەشىرىمدى اتا-انا شالقاقتاسا،
ششالقىپ جۇرسە شاتتىقتان جولعا سىيماي.
جانارىنا اناسى شاشىپ ۇشقىن،
وبەكتەيدى ءسابيىن اسىعىپ تىم.
قۋانىشتان اكەسى شاپقىلاپ ءجۇر
يىسىنە ماس بولىپ ءجاس-يىستىڭ.
دەمەر ەرتەڭ قولتىقتان ۇلىمىز كەپ،
جاتىر ءقازىر جۇرەكتەن جىلۋ ىزدەپ.
بالا-تىرەك، باقىتتى بوساعانىڭ،
جارقىراسىن سونبەيتىن كۇنىمىز بوپ.
نە جەتەدى ءسابيدىڭ ىڭگاسىنا،
تولىسادى اقىلى، تۇلعاسى دا.
ات ۇستارىڭ ءتىل كوزدەن امان بولسىن،
ءالى-اق ورلەپ شىعادى شىڭ باسىنا!
*** *** *** ***
سابيگە ەسىم قويۋ
تەبىرەنىپ انا كوكىرەك،
ۇلاستى تويعا تولعاعى.
ەمىرەنەدى ەسى جوق،
ءسابيىن قۇشىپ قولداعى.
اكەنىڭ ءوستى مەرەيى،
كوڭىلىن كوردىك شالقىعان.
يىرگەن التىن كەنەيى،
قۋانتتى ءتۇسىپ الشىدان.
ۋىلدەپ ايتىپ ىڭگاسىن
اينالىپ اسىل ارمانعا.
اجەسى كورىپ جالعاسىن،
شاشۋىن شاشتى بار ماڭعا.
ماڭدايىن يىسكەپ بوتاسىن،
«نەمەرەم» دەيدى اتا دا.
ەرتەڭ-اق ءسابي اتاسىن
جەتەلەپ شىعار جوتاعا.
بولار ول ەرتەڭ ءبىر تۇلعا،
باسى بوپ ءومىر كوشىنىڭ.
جورالعى كوپ قوي ۇلتىمدا،
قويايىق ءسابي ەسىمىن.
*** *** *** ***
بەسىك توي
باستالىپتى ءومىردىڭ كوشى، مىنە،
بولەيىكشى بوبەكتى بەسىگىنە.
ءسالت-داستۇرىن ۇلتىنىڭ ءبىلىپ ءوسسىن،
جىگىت بولسىن لايىقتى ەسىمىنە.
ۋىلدەيدى بەسىكتە شىركىن، ءۇمىت،
بولا المايدى بەسىكتوي بۇل كۇن ۇمىت.
تالىمىنەن قازاقتىڭ ونەگە الىپ،
ادەبى مەن ءوسسىنشى عۇرپىن ۇعىپ.
كوزىن سالسىن بەسىكتەن بۇل عالامعا،
بيىكتەر كوپ قوس قانات تالماعانعا.
ءتۇزۋ ءوسسىن تال بويى، ۇيقى قانىپ،
شارشاماسىن عالامدى شارلاعاندا.
باباسىنىڭ بەسىك بۇل تەرى سىڭگەن،
قازاق بولسىن بەسىككە بەلى تيگەن.
اق بەسىكتى اناسى تەربەتەدى،
بولىپ ءوسسىن ازامات ەلى سۇيگەن.
وڭ قولىمەن بەسىكتى تەربەت، كەلىن،
الديمەن سەزدىر ءومىر ورنەكتەرىن.
داريدى ەكەن بەسىكتەن قۇت-بەرەكە،
تىلەيىن سانالى ۇلان ەر جەتكەنىن.
*** *** *** ***
You Might Also Like
-
... كەۋدە. التايدىڭ ەكىنشى بيىگى — بۇركىتتىڭ ەتەگىندە جاتىر. جارىلعاستىڭ «توپقايىڭ» دەيتۇعىن ەكىجۇز ءتۇتىندى مەكەننىڭ يىعىندا. ەكىنشى اتى — ىسقاق كوڭى. ىسقاقتان كەيىن دە سەكس...
-
ءماشھۇر ءجۇسىپ كوپەي ۇلى (1858-1931) بەس جاسىندا اۋىل مولداسىنان ساۋاتىن اشادى. ءماشھۇر ءجۇسىپ ودان سوڭ يسلام عىلىمىنىڭ ءنارىن شاشقان «كوكiلتاش» مەدرەسەسىندە ءبىلىم العان («كوكiلتاش&raqu...
