InfoHub Logo

شىمكەنت قالالىق ءبىلىم ءبولىمىنىڭ باسشىسى جانات تاجييەۆا جۇمىسقا تەگىن تۇرۋ نەعايبىل ەكەنىن جاسىرمايدى. ول بۇل تۋرالى ويىن ءبىلىم سالاسىنداعى جاڭا جوبالاردى جۇزەگە اسىرۋعا ارنالعان كەزدەسۋدە ايتىپ بەردى، دەپ حابارلايدى NUR.KZ.

شىمكەنتتە رەسپۋبليكادا العاش بولىپ ءبىلىم سالاسىنا قاتىستى ءتورت جوبانىڭ تانىستىرىلىمى ءوتتى. ەندى اتا-انالار ۇيىندە وتىرىپ-اق بالالارىن بالاباقشا مەن مەكتەپكە ينتەرنەت ارقىلى كەزەككە تۇرعىزا الادى. ول ءۇشىن ءبىلىم ءبولىمىنىڭ رەسمي سايتىنا كىرۋى قاجەت. كەزەككە تۇرۋشىلار بالا مەن اتا-انانىڭ جسن ەنگىزىپ، ەلەكتروندى پوشتاسى جانە تەلەفون ءنومىرىن جازسا بولدى. بۇل جۇيە ارقىلى اتا-انا بالاباقشا نە مەكتەپتى تۇرعىلىقتى مەكەنجايى بويىنشا تاڭداپ، ءتىپتى ول ءبىلىم مەكەمەسى تۋرالى كەڭىنەن اقپارات الۋعا مۇمكىندىگى بار.

«ءبىلىم جۇيەسىن اۆتوماتتاندىرۋ» تاقىرىبىندا وتكەن كەزدەسۋدە ودان وزگە وقۋشىنىڭ ساباق ۇلگەرىمى مەن ساباققا قاتىسقانى تۋرالى مالىمەتتى ەلەكتروندى باقىلاۋ جۇيەسى دە تانىستىرىلدى. تاعى ءبىر ايتا كەتەرلىگى، جاڭا جوبالاردى تانىستىرۋ بارىسىندا مۇعالىمدەردى ەلەكتروندى تۇردە تاعايىنداۋ جۇيەسى دە ءسوز بولدى. ياعني، ەندى الداعى ۋاقىتتا كەز كەلگەن مامان اكىمدىكتىڭ رەسمي سايتى ارقىلى بوس جۇمىس ورىندارىنا ءوتىنىش قالدىرىپ، ءتىپتى ونلاين-تەست ارقىلى جۇمىسقا ورنالاسا الادى. ولاردىڭ بىلىكتىلىگىن ارنايى كوميسسيا باقىلاپ وتىرادى. قالالىق ءبىلىم ءبولىمىنىڭ باسشىسى جانات تاجييەۆانىڭ ايتۋىنشا، مۇنداي ەلەكتروندى جۇيەلەر سىبايلاس جەمقورلىقتىڭ الدىن الۋعا ۇلكەن كومەگىن تيگىزەدى.

«بۇل كوررۋپسيانىڭ الدىن الۋ عوي. وسى ماسەلەنىڭ بارلىعى ءبىز ءۇشىن جاڭالىق بولىپ وتىر. ال الەمدىك ستاندارتتا تاجىريبەگە ەنىپ قويعان. شىمكەنتتە «ەلەكترون» دەسە تىرقىلداپ كۇلەدى شەتەلدىكتەر، ماسكەۋدىڭ ءوزى كۇلەدى بىزگە. بۇل ءبىزدىڭ العا قاراي جىلجىپ جاتقانىمىزدىڭ دالەلى. اشىقتىققا كەلىپ جاتقاننىڭ دالەلى»، - دەدى شىمكەنتتىڭ باس پەداگوگى.

«جاسىراتىنى جوق بىزدە جۇمىسقا تۇرۋ اقشامەن، تەگىن تۇرا المايسىڭ. ماعان كەلەسىڭ، جانات اپكە، مەنى تانيسىز عوي، اپكەم ماتەماتيك، ورنالاستىرىڭىزشى» دەيسىڭ... دۇرىس پا؟ ال بۇل جۇيەدە ولاي دەمەيسىڭ. كومپيۋتەرگە تىركەلەسىڭ، بۇل جاقسى عوي»، - دەدى تاجييەۆا حانىم.

ءبىلىم ءبولىمىنىڭ باسشىسى بۇل جاڭا جوبالاردى سىناۋشىلاردىڭ بولۋى مۇمكىن ەكەنىن جوققا شىعارمادى.

«سىناۋى مۇمكىن، جامان دەۋى مۇمكىن. ءيا، كەمشىلىك بولادى. مەن ايتا المايمىن كۇشتى بوپ كەتەمىز دەپ. سۇرىنەمىز، ءبىراق ءبىر ناتيجە شىعارامىز» دەپ ءسوزىن ءتۇيدى تاجييەۆا. ايتا كەتەيىك، رەسمي تۇردە تانىستىرىلىمى وتكەن جوبالارعا 42 ملن تەڭگە قارجى جۇمسالعان.

---